I Tecpatl xihuitl Nicân ypan in yn iuh quitohua huehuetque ypan in yn xihuitl yn tlacat ynic ompa monexti yn tlacatecolotl yn itoca Tetzahuitl Huitzillopochtli yn itocayocan Aztlan Auhtlan Colhuacatepec yn ompa onoya yn huehuetque yn Chichimeca ca yuh quitohua anepantla aytic yn onoya yn ompa huallaque çan oc nauhcalpoltin yn achto yn ompa onoya Azteca ynic ce calpolli ytoca Tlacatecco ynic ome calpolli ytoca Tlacochcalco ynic ey calpolli ytoca Calpilco ynic nahui calpolli ytoca Tolnahuac ynin ome calpolli çatepa pollihuico yn itoca Auh ynic huallamacehuaya ca acaltica yn quihualtemaya yn imacxoyauh yn oncan ytocayocan Quinehuayan Oztotl oncan cate ytoca Chicomoztotl yn oncan çatepan hualquizque Azteca ca mochipa yuh quihualchihuaya yn imacxoyauh quihualtemaya onca Auh yn oyuh ye ontzon xihuitl ypan matlacpohual xihuitl ypan matlactli on nahui xihuitl cate yn onca anepantla aytic yn ipân mitohua motenehua hueycan altepetl ciudad Aztlan in yehuantin huehuetq Chichimeca yn ye motenehua Azteca Auh yn iuh quitohua huehuetque yn iuh quimachiyotitihui Ce tecpatl xihuitl ypan yn intlapohuatl auh ynic quinamiqui yn in tt Dios yxiuhtzîn ya yehuatl in yn tlacpac neztica de oyuh ye ontzon xihuitl ypan matlacpohuali ypan epohualli onnahui xihuitl motlacatillitzimo y nelli Dios ypiltzîn yn iquac oquînnotz yn inteouh yn yehuantin Azteca ynin achto yc qu innoch ynic ça tepa oquimoteotique yuh quitohua yn achto ayamo miyac catca yn netlapolloltiliz yn iuhqui axcan ypan in xihuitl copehualtiq yn huey netlapoltiliztli yc oquimiztlacahuico tlacatecolotl

yn yehuatl yn quitocayotiaya tetzahuitl Huitzillopochtli quicaquia yn tlatohuaya yn Azteca auh yhuan quinanquilliaya auh yn amo quittaya auh yn în Tetzahuitl Huitzillopochtli oquinotz yn inteyacancauh yn intepachocauh yn inquauhtlatocauh yn Azteca yn oncan catca onoya yn ipân yn itic huey altepetl ciudad Aztlan yn quauhtlahto ytoca Yztac Mixcohuatzin auh quilhui yn yehuatl Huitzillopochtli yn Iztac Mixcohuatzin tlaxihuallauh Yztac Mixcohuatze yn axcân ca monequi cenca huel totech monequi nimitznahuatia ma nimân xontlatecpana yn iuh ônyez yn iuh onmochihuaz auh ihuan ynic tiquinmonhuicaz miyec tlacatl motlaonyazq yn Azteca Auh ma ixquich chicome calpolli yehuântin yn huel tlapaltique yn chicahuaque yn huehueyntin tlaca ma hualca yxachintin ynic miyequintin yn macehualtin Auh ca yehica ypampa ca tiazq yn axcan ca titotecatihui ca titotlallitihui yhuan titepehuatihui tiquinpehuatihui yn ipan nohuian cemanahuatl yn ye onoque macehualtin auh yehica ypampa yn nehuatl ca neltilliztica nelli namechilhuia ca namechihuatiuh antlahtoq anpipiltin antetecuiyohuân anyezque yn ixquichica nohuianpa cemanahuac auh ynic antlahtoque anpipiltin anyezque ca anquînpiazque anquintzitzquizque amo çan quexquichtin atzonquizque atlanque yezque yn amomacehualhuan yezque yn amechtlayecoltizque yn amechtlacallaquilizque yn amechmacazq yn amo çan achi yn amo çan quexquich yn hualca tlapanahuia yn chalchihuitl yn coztic teocuitlatl auh yn quetzalli yn quetzalliztli yn tapachtli yn tlapaltehuillotl auh yn tlaçotli tlaquentli

  Auh yhuan yn amotlacahuan miyec onyezque quinnemiltizque auh y nepapa yhuitl yxiuhtototl yn tlauquechol yn tzinitzca yn ye yxquich yn tlaçoyhuitl auh ytlapapalcacahuatl yn tlapapal ychcatl ca mochi anquittazque canel notequiuh yc onihuallihualloc Auh ca yehuatl ica ynin yn itlatol Huitzillopochtli ca nimân oquinquixti yn Iztac Mixcohuatzin teuhctli ye chicome calpoltin yn onpa onoya Aztlan auh yehuantin ynin chicome calpolli y macehualtin yn quihualquixti auh no ceceyaca quinpieya ce ce ynteohuan ynic mitohua motenehua ca oc no cequintin yn quihualhuicaq yn inteohuan auh no yhuan ynic mitohua motenehua yn chicome calpolli yn Mexica yn huallaq ompa Aztlan auh ynic ce calpolli Yopica ynic ome calpolli Tlacochcalca ynic ey calpolli Huitznahuac ynic nahui calpolli Cihuatecpaneca ynic macuilli calpolli Chalmeca ynic chiquacen calpolli Tlacatecpaneca ynic chicome calpolli Yzquiteca yhuan quihualhuicaq y mochintin hualcepayaque yn ihueltiuh yn Huitzillopochtli ytoca Mallinalxoch yn oncân quihualcauhtiquizque Michhuacân yn oncan Pazquallo ynic çatepan oncan huallehuac ynic motlallico yn oncan Malinalco quinhualhuicac yn ixquichtin yn imacelhuahuân yn motenehua Malinalca Auh yc niman ya huallehua ye huallolini yn huehuetq Chichimeca Azteca yn chicome calpoltin ye omito tlacpac ontzon xihuitl ypan matlacpohualxihuitl ypan matlactli onnahui xihuitl ynic catca onca anepantla aytic yn ipân hueyaltepetl ciudad ynitocayocan Aztlan yehica yn oncân ycac yn huey azquahuitl ynic yehuatl ypampa motenehua Aztlan auh yhuan ye o yuh nepa ya chiuhcnauhpohualxihuitl ypan onxihuitl ya qui ynic nemico nican Tollan yn Topiltzin Acxitl Quetzalcohuatl ynic ya ca ye omito tlacpac ca huey apan callaquito yquac

yc cen ya quitotia ca hualmocuepaz Auh ye on omito tlacpac ye o yuh nepa ontzon xihuitl ypan matlacpohual xihuitl ypan epohualli on nahui xihuitl motlacatillitzino yn tt¨ Dios Jesu Christo ynic huallolinque huallehuaq yn Azteca yc yehualnenemi yehuallotlatoca

Auh nimân oncân acico yn itocayocan Teocolhuacan yuh quitohua amo hueca quitztica ynin yn Aztlan yn oncân acico çan ye ypan yn ce tecpatl xihuitl auh yn ic amo hueca quitztica yn Aztlan yn Teocolhuacân ca no yntoca yn Azteca Teocolhuaque auh yn oncan ynpan acico yn inpan quiçaco chicuey altepeme yn oncân onoque macehualtin yn motenehua Teocolhuaque auh nican ca yntoca ÿn chicuei altepeme y Teocolhuaq ynic ce altepetl Huexotzînca ynic ome altepetl Chalca Totollinpaneca yniqu ey altepetl Xochimilca ynic nahui altepetl Cuitlahuaca ynic macuilli altepetl Malinalca ynic chiquacen altepetl Chichimeca ynic chicome altepetl Tepaneca ynic chicuey altepetl Matlatzinca auh ye ce ynin yzqui omoteneuh tocaytl nican yn iquac yn ipan in ayemo yntoca catca ca çan huel oquintoca Chichimeca Teocolhuaque catca auh ca yehica ypampa ca ye quin iquac yhuallaque yn ceceyaca acico yn ipan motlallico yn cece ymaltepeuh yn axcan oncan ypan cate onoque ca ye quin iquac tlatocamacatacico yn ipan ymaltepeuh yn chicuey altepeme omoteneuhq ca ayemo niman yntoca catca yn axcan yntoca mochiuhtica caçan huelloc yntoca catca Chichimeca Teocolhuaq yn iquac ynpan quiçaco Azteca yn oncan onoca yn Colhuacan

Auh ynic hualpanoq yn Aztlan yn Azteca oncan quinhuallantiquizque yn Colhuacân yn oncan chaneque {catca} yn oquimittaque in Colhuaque yn Azteca niman no quimilhuiq Totecuiyohuane Aztecaye ca anmohuica ma tamechtohuiquillican niman no quitoq yn Azteca can in tamechhuicazque yn iuh antech ilhuia nimân no quitoq yn chicuey altepeme ca amo totecuiyohuane ca tamechtohuiquilizque yn canin anmohuica

Auh nimân no quitoque in Azteca ca ye qualli ma tamechtohuiquillican Auh in Colhuacan yn iuh quitohua quin oncan huel quihuallantiquizque yn diablo yn Tetzahuitl Huitzillopochtli yn oquimoteotiaya yn Azteca yn huallaque yhuan ce cihuatl itoca Chimalma ompa quihualhuicaque yn Aztlan Chicoccân hualquiztiaque yn Azteca ynic hualnenenque auh no yhuan yn chicuey altepeme yn Chichimeca Teocolhuaque çan ic mochintin ônmocetilica yn Azteca oncan quihuallantiquizq yn Teocolhuacân ca quihualhuicaya ca hualcepanhuia auh ynic hualquizque oncan Teocolhuacân ynic hualnenenq çân ya yehuatl yn ipan ce tecpatl xihuitl yn tlacpac omoteneuh auh ynic hualleuhque yn oncan Teocolhuacân ca nahuintin yn quihualmamaque yn diablo yn itoca Tetzahuitl Huitzillopochtli yn ye quimoteotia Azteca auh yzca yntoca yn omoteneuhque Nahuintin teomamaque yn quihualmamaque Huitzillopochtli ynic ce tlacatl ytoca Quauhcohuatl ynic ome ytoca Apanecatl ynic ey ytoca Tezcacohuacatl ynic nahui ytoca Chimalma yc ye huitze yehualnenemi yn ipan ce tecpatl xihuitl

yn itzintla yn huey Quahuitl yn inpan poztec ynic huallaque Azteca

V Tecpatl xihuitl Nican ypan in yn acico yn Azteca in itzintla huey quahuitl auh in yehuantin yn teomamaq yn itoca Quauhcohuatl yhuân yn itoca Apanecatl yhuan yn itoca Tezcacohuacatl yhuân yn itoca Chimalma yn oacico yn quahuitl ytzintla nimân noncan motlallique ynin cenca tomahuac yn quahuitl niman noncan contlallique ytztintla ynin tlalmomoz ypan contlallique yn diablo Huitzillopochtli yn ocôntlallique niman concuique yn imitac auh yc niman ye tlaquazquia yn Azteca yniquac niman yn ynpan poztec yn huey quahuitl auh nimân nic quicauhque yn quiquazquia cenca huecauhtica yn oc totoloticatca yn Azteca Auh nimân quinnotz oncan yn diablo yn Huitzillopochtli quimilhui xiquinnahuatican yn amech huica yn chicuey altepeme yn Colhuaq xiquimilhuican camo tiazq yn campa otiazquia ca çân nican titocuepazque auh niman oquinnahuatique yn Colhuaq yn chicuey altepeme auh yn oyuh quimilhuique cenca yc tlaocoxque yn chicuey altepeme ynic oquinnahuatique auh niman oquitoque yn chicuey altepeme Totecuiyohuane campan tiazque ca ça tamechtohuiquillizque Niman no ceppa oquimilhuique camo huelitiz ca ça hanyazque auh yn oquicacq yn Colhuaque niman yc achto hualpeuhque ynîn yn omoteneuhque chicuey altepeme yn Colhuaque quimoncauhque yn oncan huey quahuitl ytzintla yn inpan poztec auh huecauhtica yn ompa

catca yn Azteca yn oncan ynpan poztec quahuitl Auh ca ça tepan yn hualpeuhque yn huallolinque yn otlica oncan ynpan acico yn tlatlacatecollo huey comitl ytlan huehuetztoq yhuan cequintin mizquitl ytzintlan huehuetztoque ca yehuantin ÿn quintocayotia Mimixcohua yn ce ytoca Xiuhnel ynic ome ytoca Mimich yniqu ey cihuatl yn hueltiuh auh oc ceppa oncan quinnotz yn diablo Huitzillopochtli quimilhui yn Azteca xiquimonanacan n on yn huey comitl ytzintlan huehuetztoque Ca yehuantin yacachto tequitizque Auh nimân ôncan quincuepilli yn itoca yn Azteca oquimilhui yn axcan caocmo amotoca yn amAzteca Nimechmaca yancuic amotoca ye an Mexitin Auh oncân no quin nacazpotonique ynic oqu icuepque yn intoca ynic ye Mexitin yhuan oncan oquinmacac yn mitl yhuan tlahuitolli yhuan chimalli yhuân chitatli yn tle yn aco yauh huel cominaya yn Mexitin ompa quiçaco yn Cuixtecatl ychocayan yhuan Cohuatl ycama

Auh niman ca oc centlamantli intlatol yn oc cequintin huehuetque yuh quitohua yn Auh nican peuh yn in netlapololtiliz yn huehuetq yn Chichimeca oncan peuh yn quahuitl yn inpan poztec oquinnotz yn tlacatecolotl yn Huitzillopochtli oytic callac yn ipepechtzin yn tt¨ Dios yn oquihualmamatiaque ynic oqu innotz Mexitin oquimilhui tiazque amo tihuecahuatihui çan tinauhxiuhtizque çan titlachiquizque ynic tihui Oncan peuhtica yn yn huehuetque yn innetlapolloltiliz ynic ytic ohualyetia yn oquihualmamatiaque yn iuh quimachiyotia cequintin huehuetque ynic ompa hualquizque yn Aztlan yn Azteca ayamo hompa quihualmamatiaque yn diablo

Huitzillopochtli ye quin huell otlipan quihuallantiquizque ynic quihualmomamaltique ynic yehuatl oquihualmoteotitiaque yn Azteca Mexitin ypampa yn ynic omeyollohua cequintin huehuetque yn iuh momati yn achto ca quimoneltoquitiaya y nelli Dios cemixquichyhuellitzin yn topampa momiquillitzino auh aço yuhqui acanoço mocamo huel mellahuac momati yn aço tlaneltocaya yniquac huallolinque yn ompa Aztlan auh ca çan in iuh mellahuac momati yeppa tlateotocani ynic motenehua Gentilesme auh ynin huey quahuitl yn inpan poztec yn iuh omito yn tlacpac yn ompa ypehuayan ynin amoxtli ca çan no yehuantin yn tlaaquil yn tlatocal yn Azteca auh in ixquich cahuiti ynin quahuitl ynic achto tlaaquilli yhuân ynic poztequico ontzon xiuhtica ypan matlacpohualxiuhtica ypan chicuexiuhtica Auh amo momati tle ytoca yn quahuitl

{Yhuan ypan in y cequintin quitohua yn hualquizque Chicomoztoc yn Mexica ynic motlallico oncan }

IX Tecpatl xihuitl Nican ypan in in omiquico yn itoca Nauhyotzin yn tlahtohuani catca Colhuacân auh yn tlahtocat onpohual xihuitl on chicome Auh nimân onmotlahtocatlalli yn itoca Quauhtexpetlatzin (glyphe) tlahtohuani Colhuacan

¨¨¨ ¨¨¨ ¨¨¨ ¨¨¨ yn Teocolhuacan yn inahuac Aztlan yn huehuetque Chichimeca yn Totollinpaneca yn axcan ye yntoca Amaquemeq ynic ompa huecahuaque ontzon xihuitl {ypan caxtolpohualxihuitl} ypan yepohualxihuitl ynic niman ye huallolinque ynic hualnenênque

VIII Tochtli xihuitl Nican ypan in huel mellahuac yn ic oncan acico ynic motlallico yn Tiçatepec {Cuitlahuac} yn huehuetque yn Chichimeca yn Eztlapictîn yn Teotenanca yn tlahtohuani hualmochiuhtia ytoca Totoltecatl Tzonpachtli Tlayllotlac teuhctli yehuatl quihualmamatia yn inteouh y Nauhyoteuhctli xipil ypial hualmochiuhtia auh yn icihuauh tlatohuani Totoltecatl Tzonpachtli ytoca Xiuhtoztzin yn cihuapilli tehuan hualla auh yz cate yn i mochintin huallaque yn întahuan yn înteuhc tlahtocahuan hualmochiuhtiaque yn tlaçopipiltîn ynic ce ytoca Tlahuipillatonac ynic ome ytoca Tonacachimal ynic ey ytoca Aopochtli ynic nahui ytoca Quatomahuac ynic macuilli ytoca Totonhuitztli ynic chiquacen ytoca Xipechimalle Ca yehuantin în yn quihualhuicatiaque yn tlahtohuani yn Tlayllotlac Teuhctli yn ipillohuan yn iteuhctlahtocahuan hualmochiuhtiaque auh yn ixquichcauh ynic ompa catca ÿn Teotenanca yn Temimilolco yn Cuixcoc macuilpohualxihuitl on caxtolli ypan ye xihuitl ynic axcân ypan in xihuitl VIII Tochtli ye tlahtocati oncân yn Tiçatepec yn Totoltecatl Tzonpachtli

XIII Acatl xihuitl {Tlaçolyaotzin}

I Tecpatl xihuitl Ypan in yn xihuitl y cequintin Mexica huehuetq yn quimachiyotia ynic ompa Aztlan hualquizque yn Azteca Mexitin ynic huallaq nican {Cohuatepec}

IV Acatl xihuitl Nican ypan in miquico yn Achitomecatl ÿn tlahtohuani catca Colhuacan yn tlatocat cenpohualxihuitl once

Nican ypan in yn omotlahtocatlalli yn Quauhtlahtonac (glyphe) yn Colhuacan tlahtohuani

VII Tochtli xihuitl Nican ypan in oncan momiquillico yn Itztepec yn Ecatzin teuhctli yn Chichimeca teuhctli yn in tlahtocauh yn Chichimeca yn Totollinpaneca yn Amaquemeque ynic huallaque yn tlahtocat caxtolxihuitl ynic ompa hualquizque Chicomoztoc Quinehuayan auh çân niman ypan in yn xihuitl motlahtocatlalli yn itoca Huehueteuhctli Chichimeca teuhctli yn in tlahtocauh Totollinpaneca Amaquemeque ça ya oc oncân yn Itztepec yc catca

IX Tecpatl xihuitl Ypan in yn ommiquanique Cuitlatetelco oncan Tiçatepec onehuaque yn huehuetq Chichimeca Eztlapictin Teotenanca ye ynpa onacito yn Acxoteca ye onoque yn oncan Cuitlatelelco oncan no ceppa ye tlahtocati yn Totoltecatl Tzonpachtli

V Calli xihuitl Nican ypan in omiquico Quauhtlatonac yn tlahtohuani catca Colhuacan yn tlahtocat matlactli on nahui xihuitl

VI Tochtli xihuitl Nican ypan in motlahtocatlalli yn itoca Mallatzin yn Colhuacan tlahtohuani

VII Acatl xihuitl Nican ypan in y momiquillico yn Totoltecatl Tzonpachtli tlayllotlac teuhctli yn tlahtocat oncan  Cuitlatetelco

matlac xihuitl auh yn Tiçatepec caxtolli once ynic mochi mo {cenpohua} cenpohualxihuitl onchiquacen yn quipacho Tenancayotl auh ça niman ipan in yn xihuitl y motlahtocatlalli in ipiltzin ytoca Qualtzin Tlayllotlac teuhctli mochiuh oncan ye tlahtocati yn Cuitlatetelco

XI Acatl xihuitl Nican ypan in nezque yn Mexitin yn oncan Chapoltepec yn Hueymacco ye yuh chiquacen xihuitl tlahtocati in Mallatzin Colhuacan tlahtohuani

II Acatl xihuitl Ypan in yn yancuican {yqu etetl} /yq ¨ cuican/ oquipilque yn in xiuh in Mexica auh yac ymixpan çan oc yneyxcahuil in Mexica yn huehuetque yn Chichimeca ye oncan yn /Chapultepec/ {Atletlayacyan}

VI Acatl xihuitl Auh nican ypan in yaoyahualloloque yn Mexica yn oncan Chapoltepec ynic nahualpolliuhque oquimilhuique yn cenhueytlalhuaque yn Xaltocameca oquimilhuique campa anmohuica Auh nimân quitoque ca tiyaoquiçazque in Xochmilco auh yn Teçoçomoctli yn Azcapotzalco tlahtohuani ocontlalli ytlatol in Xochmilco yhuan Colhuacan yhuan Xaltocan ynic nauhcanpa ohuicalloque yn Mexitin Auh yn tlahtohuani Huehue Huitzillihuitl oncan cacique ohuicalloc ompan Colhuacan yhuan ichpoch niman n ompa quintlamellahualtique yn ixpan yn intlacatecolouh yn Colhuaque ynic quinmictique oncan yxpan O yuhqui yn ynic nahualpoliuhque yn Mexica yni quimaceuhque yn tlalli ynic quiytztinenque yn huehuetque quimaceuhque in tlalli

VII Tecpatl xihuitl Nican ypan in ye e tzontli xihuitl yn omotlacatillitzino yn tt¨ Dios

Auh no ypan în {Tlalli yn Tlacomihua tlahtohuani mochiuh huexo¨¨¨}

auh ça no ypan oquichihuaco quatro mil años matlactzon xihuitl yn omocuecue ¨¨¨Babylonia ¨¨¨

yn xihuitl yn omiquico yn Mallatzin tlahtohuani catca Colhuacan yn tlahtocat caxtolxihuitl auh ça ce xihuitl yn quimitztia yn Mexica ynic quin mocallaquilli in calla yn Colhuacan nauhxiuhtique yn caltzauhctoca yn aoc can nezque yn iuh machoc opoliuhque yn Mexica Ypan in peuh yn ye quauhtlatollo yn Colhuacan

XI Tecpatl xihuitl {Quiyauhtzin /motlahtocatlalli/ Huexotla ipan in XI te conitlan in yn Chalchiuhcihuatzin ychpoch Huehuecacamatzin tlahtohuani Amaqmecan ynehuân Cohuaxochtzin yn icihuauh ymichpoch yhualla Huexotla }

I Tecpatl xihuitl {miquillico Nopaltzin yn tlahtocat Tetzcuco Auh ça niman ipan in motlahtocatlalli Tlotzin Pochotl }

III Tochtli xihuitl Yn ipan in yc cenpohualxihuitl omey ayac tlahtocat çan quauhtlatolloc auh oc ceppa ypan in conpehualtique ynic quauhtlatolloc yn Colhuacan

III Acatl xihuitl Nican ypan in tzônquiçaco ynic quauhtlatolloc yn Colhuacan ynic ye mochi quauhtlatolloc cenpohual xihuitl oncaxtolli

yhuan ce xihuitl auh niman yc omotlahtocatlalli yn itoca Chalchiuhtlatonac yn Colhuacan tlahtohuani

VI Tochtli xihuitl Nican ypan in yn omomiquilli yn Qualtzin Tlayllotlac teuhctli yn quipacho Tenâncayotl onpohualxihuitl onmatlactli ypan on xihuitl Auh ça niman yquac motlahtocatlalli yn ipiltzin yn itoca Quauhuitzatzin tlayllotlac teuhctli Chapantica ynic motlahtocatlalli in iuh quitohua huehuetque auh no yhuân yquac motlahtocatlalli yn Itzquautzin Huehue Atlauhtecatl teuhctli yn imomextin quipachoque Tenancayotl ynin ça ya oc oncan yn Cuitlatetelco

IX Calli xihuitl Nican ypan in ynic acico honcan Chalco atenco yn huehuetque yn Chichimeca yn Totollinpaneca yn Amaquemeque ynin acico yn oncan motlallico Chalco Atenco yehuatl yn tlahtohuani yn Huehueteuhctli Chichimeca teuhctli yhuan ypilhuan omêntin ynic ce ytoca Tliltecatzin ynic ome ytoca Atonaltzin yhuan oc cequintin huehuetque auh ynic ompa huallequaq yn Quinehuayan yn Chicomoztoc ynic tlayahualloque ynic ypan in xihuitl acico ye napohualxiuhtica yhuân onxiuhtica ynic motlallico auh ça niman ypan in IX Calli xihuitl yn momiquiquilli yn tlahtohuani yn Huehueteuhctli yn Chichimeca teuhctli yn tlahtocat yepohual xihuitl ypan chicue xihuitl yn quinhualpachotia yn Amaquemeq auh ça niman yquac motlahtocatlalli yn ipiltzin yn itoca Atonaltzin Chichimeca teuhctli mochiuh oncan yn Chalco Atenco

XIII Calli xihuitl Nican ypan in yn omiquico yn itoca Chalchiuhtlatonac yn tlahtohuani Colhuacan yn tlahtocat matlacxihuitl auh ça niman ypan in xihuitl y motlahtocatlalli yn Quauhtlix (glyphe)

tlahtohuani Colhuacan auh yn omotlahtocatlalli yn Quauhtlix yehuatl quinnexti pani quintlali in Mexica huehuetque Chichimeca

I Tochtli xihuitl Nican ypan in yn tlahtohuani Quauhtlix oquimilhui yn Mexica ximocaltican yn oncan Tiçaapan auh yn omocaltique mochi yn ipan ce Tochtli xihuitl auh yn oconchiuhque yn incal Mexica Niman no ceppa oquimilhui yn Quauhtlix yn Mexica ximoteocaltican tamechmacazque yn iyollo yez auh niman oquipehualtique yn inteocal Mexica auh ye tlatlaco quinemiltia yn oquinyollotilique yn înteocal yn ica cuitlatl poxaqua yhuitl quimichme auh yn oquittaque Mexica yn amo qualli yn oquiyollotillique yn inteocal niman oquiquixtique oquimayauhque oquitoque amo yehuatl monequi yn ca huitztli ca yyetl ca acxoyatl yn iyollo yez auh yn iquac yn oquipantlazque

II Acatl xihuitl Nican ypan in {yc nauhtetl} toxiuh molpilli {quilpillique ÿn Mexica oncan Tecpayocan Coxcoxtli tlahtohuani} Auh ypan in yn oquipantlazque yn inteocal Mexica auh oquimilhuique quitoque yn Colhuaque Mexicaye ca tiyaoquiçazque tiquinpehuazque yn Xochmilca yn ca momalliz yn amoteocal Niman oyaotlato yn tlahtohuani Quauhtlix oquinnahuati yn Mexica oquimilhui amehuantin ayacatiazque auh ic niman omonahuatique yn Mexica quimolhuique ayac ça ce caciz auh yc niman o yntech moquetzque y Xochmilca ye tlama y Mexica /ye quimaci/ yn Xochmilca ça moch quinacaztlaça moxixiquipilquentique auh ompa contlaztiaque yn in nacaz yn Xochmilca

Nican ypan in omiquico yn itoca Quauhtlix y tlahtohuani Colhuacan yn tlahtocat chicue xihuitl auh ça niman ypan in y xihuitl motlahtocatlalli yn Yohuallatonac Telpochtli (glyphe) yn Colhuacan tlahtohuani

I Acatl xihuitl nican ypan in omiquico in Yohuallatonac yn tlahtohuani Colhuacân yn tlahtocat chicue xihuitl

II Tecpatl xihuitl ypan in motlahtocatlalli yn Tziuhtecatl (glyphe) yn Colhuacân tlahtohuani

IX Acatl xihuitl Nican ypan în ynic onehuac yn tlahtohuani Quahuitzatzin Tlayllotlac teuhctli yn ihuan yn Huehue Ytzquauhtzin Atlauhtecatl teuhctli yn oncan Chalco Atenco anoço Ayotzinco yn oncan tlahtocatque ynic mochi Cuitlatetelco cenpoalxihuitl onmatlactli ynic onehuaque oncan Atenco niman onacique yn Tenanco Texocpalco oncan omotlallito ynic quimaceuhque tlalli yn ihuan yc tlatocamacaque Tenanco

XI Calli xihuitl Nican ypan in omiquico yn Tziuhtetl yn Colhuacan tlahtohuani yn tlahtocat matlacxihuitl auh ça niman in ipan în yn xihuitl motlahtocatlalli yn Xihuitl Temoc ÿn (glyphe) Colhuacan tlahtohuani Auh no yquac ypan in yn xihuitl ynic oncan onehuaque yn Tenanco Texocpalco y Quahuitzatzin yn ihuan Ytzquauhtzin ynic niman acito yn ômpa yn icpac yn tepetl yn Amaqueme ynic ompa monamiquito yn oc no omentin Chichimeca tlahtoque Totollinpaneca Tliltecatzin Chimeca yaotequihua yhuân

yn iteyccauhtzin Atonaltzin Chichimeca teuhctli yn ihuan momimihque yn Atonaltzin yn Quahuitzatzîn Tlayllotlac teuhctli auh yn çatepan yn omottaque yn omonenehuillique yneneuhque ynic Chichimeca nimân quimotlapanique yn tepetl Amaqme ynic nimân quitlallique yn altepetl Amaquemecan yn ipan în xihuitl yhuan quitlallique yn ixquich quaxochtli yc ye cate ye tlahtocati

XIII Acatl xihuitl Nican quinhualtocaq yn Mexica yn colhuaque yc motlallico yn Atiçapan oxiuhtica

I Tecpatl xihuitl Nican ypan in yn motlahtocatlalli in Huehue Huitzillihuitl cequintin huehuetque quimachiyotia yn iuh quitohua ye quin ypan in yn oncan acico Mexitin yn Amallinalpan yn Azcapotzalco ynic oncan quitlahtocatlalliq yn intlahtocauh Mexica /Auh yn oc cequintin quitohua huehuetque ye ypan in ynic motlallito Colhuacan Mexitin / { momiquilico Tlotzin Pochotl yn tlahtocat Tetzcuco años auh ça niman ipan in motlahtocatlalli ¨¨¨} {Ipan in yn Tecpatl xihuitl años yn motlahtocatlalli Quihnatzin /pochotl/ Tlaltecatzin niman ihcuac quimonamicti yn Cuauhcihuatzin tlahtoq Tetzcuco }

/III Tochtli xihuitl / Auh ypan in yn ome Calli xihuitl yn Itzquauhtzin Atlauhtecatl teuhctli yn ihuan huallaq yn Quahuitzatzin çân icuitlahuic mocuep in Atenco ça onmictacic çan macuilxiuhtico ynic tlahtocatico yn Tzaqualtitlan Tenanco auh ça niman ipan in yn ome calli xihuitl motlahtocatlalli yn ipiltzin Huehue Ytzquauhtzin ytoca Yllancueytl Atlauhtecatl teuhctli yn ômpa Atenco çan onpa motlalli ye tlahtocati ompa yn Atenco

yn tlahtohuani Colhuacan yn tlahtocat matlac xihuitl omey

Auh ça niman ipan in yn xihuitl yn motlahtocatlalli yn Coxcoxtli tlahtohuani Colhuacan

XI Tochtli xihuitl /Auh in oc cequintin huehuetq yn quimachiyotia ypan in ynic oncân matlactli oncexiuhtique yn Mexitin yn oncan Amalinalpan yn Azcapotzalco yhuan quitohua çân ya ypan in y xihuitl yn onmiquanique Mexitin yn Chapoltepec yehuantin in yn acico Huehue Huitzillihuitl Tenoch Acacitli Ocellopan Quauhcohuatl Quatlecohuatl oncân omotlallico ye cate ye o yuh ce xihuitl tlahtocati yn Cocoxtli yn Colhuacân /

VI Tochtli xihuitl Ypan in yn quicauh yn itlahtocayo yn Illacueytl Atlauhtecatl teuhctli yn itech catca yn tlahtocayotl yn ompa Atenco caxtolli omey xihuitl auh yehuatl quimixiptlati quicahuilli yn itlahtocayo yn ipiltzin in teomeca yn itoca Itzquauhtzin Telpochtli çan ya ypân yn chiquacen tochtli xihuitl yn quicuic yn itlahtocayo yn ompa Atenco auh ça no ypan ynic ya ynic motlallito y Tolteca Tzaqualtitlan Tenanco Atlauhtlan ynic ye tlahtocati auh yn Illancueytl ompa ya yn Cohuatlychan

Tequanipan tlaca yehuatl quinhualyacan yn Yaopol Tziuhtecatzin Tzonpahuaca teuhctli tlahtohuani hualmochiuhtia ynic motlallico Amaquemecân

I Tochtli xihuitl {Ipan in I yn ce Tochtli xihuitl mocetochhuiq Chichimeca Tezcoca ypan Quihnatzin Tlaltecatzin can monetechhuique y moyaotlaque ye yuh cenpohuallonchicome /nahui/ xivitl tlahtocati Quihnatzin } Ypan in yn cequintin huehuetque yn quimachiyotia ynic oncan caxtolli onnahuixiuhtique yn Chapoltepec yn Mexitin Auh ça no ypan in ynic quinyaoyahualloque ynic quinnahualpolloque yn Mexitin yn Chapoltepec ynic nauhcanpa huicoque ynic no yehuatl Huehue Huitzillihuitl oncan cacique quihuicaque Colhuacan ompa quimictique yn iquaquî în mochiuh ye o yuh caxtolxihuitl omey tlatocati in Coxcoxtli yn Colhuacân Auh ynic mocênpohua ynic tlahtocat huehue Huitzillihuitl cenpohualxihuitl onchicome yn ipan in yc mictilloc Colhuacân /auh nimân omiquanique ÿn Mexitîn yn Colhuacan /

III Tecpatl xihuitl Nican ypan in ynic yetzonxihuitl ypân macuilpohualxihuitl ynic motlacatillitzino yn tt¨ Dios

Panohuayan tlaca yn quinhualyaca yn quihualhuicac ytoca Tlotli Teuhctli oncan motlallico yn Amaquemecan Auh no yquac yn ipan in yn VII Tecpatl xihuitl yn momiquilli yn tlacatl yn tlahtocapilli yn Tliltecatzin Chichimeca yaotequihua yn itiachcauhtzin yn tlahtohuani Atonaltzin Chichimeca teuhctli yehuantin achto quitlallico yn altepetl Amaquemecan

IX Tochtli xihuitl Nican ypan in yn momiquilli yn tlacatl Atonaltzin Chichimeca Teuhctli tlahtohuani Amaquemecan yn tlahtocat yepohual xihuitl ypan chiquacen xihuitl auh ça oxihuitl yn quittaque yn Panohuayan tlaca Auh ynic tlahtocatico y nican Amaquemecan ynic acico yn achto yc quitlallico altepetl ye yuh nepa cenpohualxihuitl ypan caxtolli omey xihuitl ynic omomiquilli Atonaltzin Chichimeca Teuhctli

X Acatl xihuitl Nican ypan in omiquico yn Coxcoxtli tlahtohuani Colhuacan yn tlahtocat cenpohualxihuitl ypân chicoxihuitl oncan coton yn tlahtocayotl

/XI Tecpatl xihuitl / {auh no} Nican ypan in ÿn xihuitl y motlahtocatlalli yn Acxitzîn Chichimeca teuhctli mochiuh yn Amaqmecân ynin ypiltzin yn Atonaltzin Chichimeca teuhctli auh ynin çân huel ce xihuitl yn ontlahtocat moteuhcçauhtia yn momiquillito yn ompa Quauhquechollan ye ytlamian yn matlactli acatl xihuitl ynic momiquillito auh ça no nimân ypan y xihuitl y motlahtocatlalli yn Huehue teuhctli Chichimeca teuhctli mochiuh ynin ça no ypiltzin yn Atonaltzîn

XI Tecpatl xihuitl Nican copehualti yn ye tlahtocati yn Huehue teuhctli tlahtohuani Amaquemecan

IX Acatl xihuitl {Ipan in yn IX Acatl xihuitl años yn oyah Tlaxcallan Texcallan ahnoço Tetzcuco yn Tlacomihua ypiltzin Quihnatzin yaoyotica ya }

X Tecpatl xihuitl {Ipan in tlacat in Huehue Teçoçomoctli Azcapotzalco }

XIII Acatl xihuitl Ypan in tlamico ynic quauhtlatolloc yn Colhuacan caxtolxihuitl ypan ce xihuitl yn ayac tlahtocat {Ipan in in XIII Acatl xihuitl motlacatilico Techolalatzin Coxcotzin yn inconeuh Quihnatzin Tlaltecatzin yn inehuan ycihuauh Cuauhcihuatzin tlahtoque Tetzcuco }

{In ihcuac yn quitlacatillico ytlaçopiltzin Quihnatzin Tlaltecatzin yn itoca Techotlallatzin Coxcoxtzin ye iuh nepa onpohuallonmatlactli ipan ome xihuitl ye tlahtocati yn Quihnatzin Tlaltecatzin }

{Auh çan chitatli yhtic matlac yn quinhuapahuaya ynpilhuan Chichimeca Tetzcuca auh yn quihuapauh Colhuacan ychan yn cihuapilli ytoca Papaloxuchitzin nahuatlacatl yeuatl coçolco qui ¨¨¨yancuican quimachti nahuatlatolli yn tultecatlahtolli yhuan quitilmahti quimaxtlati achtopa auh yn intlatol achtopa catca yn Tetzcuca ca chichimeca tlahtolli popolocaya auh quin yehuatl in achtopa onahuatlato yn Techollalatzin Coxcotzin Auh quin chiuhcnauhxiuhtia yn momiquillico ytatzin Tlaltecatzin Quihnatzin momiquilli }

I Tecpatl xihuitl Nican ypan in motlahtocatlalli yn Huehue Acamapichtli yn Colhuacan tlahtohuani Auh no yquac yn ipan in xihuitl yquac peuhqui yn xochiyaoyotl yn ompa Chalco yehuantin quichiuhque yn Chalca yhuân Tlacochcalca

II Calli xihuitl Ypan in yn xihuitl ynic Nican pehua nican motenehua yn in tlatolli yn intechcopa ynic acico yn quenin ocallaquico y nican Mexico Tenochtitlan yn huehuetque yn Chichimeca Mexitin ynic tlalmacehuaco nican tenochtli ymancan yn acico huehuetque yn hualteyacanque matlactin ynic ce tlacatl Tenoch yehuatl in hualquauh tlahtotia ynic ome Ahuexotl yniqu ey Xomimitl ynic nahui Ocelopan ynic macuilli Acacitli ynic chiquacen Teçacatetl ynic chicome Quatlecohuatl ynic chicuey Quauhtlequetzqui ynic chiuhcnahui Cocihuatli ynic matlactli Axollohua

Ynin tenonotzaliztlatolli oquitecpan oquicenquixti yn Domingo de S¨ Anton Chimalpahin Amaquemecân chane

Auh yn axcan yn tictomacehuiticate yn tlalli yn Mexico Tenochtitlan Nachcahuane Noteyccahuane tla xichualmocaquiltican ca yn totahuan yn tocolhuan

yn huehuetque yn Chichimeca yn Mexica camo ycippa ynchan catca auh ca cecni ca hueca yn o yolqui yn oquînmotlacatillili yn tt¨ Dios auh ca umpa yn ohualmohuicaq ynic omocallaquico omotlaltico omochantico yn nicân Mexico auh ynic ancacicamatizque monequi yuh yec in yn amo yollo auh camo çan iceltin yn Mexica yn hueca yn ohualmohuicaque auh ca acachto ocalaquico chicuetlamantin yn macehualtin yn ompa hualquizque yn ompa huallehuaque ynchan yn itoca catca hueycan ciudad Aztlan yhuan Teocolhuacan yece camo cepan huallaque camo ompa cepan hualquizque camo huel ce tonatiuh ypan hualpeuhque amo cepan hualololiuhtiaque Auh yn izquicanme chicuetlamantin macehualtin onimechtenehuillihui ceceyacan ca cececni huallaque auh ypampa in yn yquac yç ocallaquico ohuacico camo no cemilhuitl ypan callaquico ca çan ceceyacan ca cecên tlatlantin ynic ohuacico Auh yehica ca yehuantin yhuel acachto ohuacico yn Xochimilca auh ynic ontlamantin ohuacico ca yehuantin yn Chalca auh ynic yetlamântin ohuacico ca yehuantin yn Tepaneca auh ynic nauhtlamantin ohuacico ca yehuantin yn Acolhuaque auh ynic macuillamantin ohuacico ca yehuântin yn Tlalhuicca auh ynic chiquacentlamantin ohuacico ca yehuantin yn Tlaxcalteca auh ynic chicontlamantin ohuacico ca yehuantin yn Teotenanca auh ynic chicue tlamantin ohuacico ca yehuantin yn Amaquemeq Auh xicmomachiltican No tiachcahuane no teyccahuane ca yn yehuantin in Xochimilca niman ompa omotlallito yn Xochimilco auh ca yehuantin Chalca niman ompa omotlallito yn Chalco auh y yehuantin ÿn Tepaneca niman omotlallito

ompa yn Tlacupan auh ynin tlahtocauh ca omotlallito omocallotito Azcapotzalco Auh y yehuantin yn Acolhuaque nimân ompa omotlallito yn Acolhuacan Tetzcoco auh yn yehuantin yn Tlalhuicca ca niman ompa tlamellauhque ompa yn omotlallito Aquauhnahuac yn axcan ye tiquitohua Quauhnahuac auh amo çan ixquich yn ôncan yn omotlallito Quauhnahuac yn Tlalhuicca ca no yhuian yn omotlallique yn ixquich Marques ytlal yn quitohua Castilteca Marquesado Auh yn yehuantin yn Tlaxcalteca niman ompa omotlallito yn Texcallan yn axcan mitohua Tlaxcallan Auh in yehuântin yn Teotenanca niman ompa omotlallito yn Tenânco Texocpalco Tepopolla yhuan cequintin ompa motlallito yn Tzaqualtitlan Tenanco Amaquemecân auh in yehuantin yn Amaquemeque Totollinpaneca nimân ompa omotlallito yn Amaquemecan auh monequi anquimatizque notiachcahuane noteyccahuane ca mieyc tlacatl yn ya huecauh huehuetque catca yn quitotihui yn iuh quimachiyotitihui yn nohuian y nican ca ayac ocatca tlacatl quitohua quil çan nohuian yn ocatticatca auh yn in ca oc cêntlamantli yn quimatica yn noyollo yhuan oc cêntlamântli onechmolhuillitiaque yn Dios oquinmohuiquilli huehuetque ca huell onicpix yntic yn noyollo yn intlatol auh quimitalhuitihui ca yn iquac oacico yn huallaque yn chicuetlamantin yn ye onimechtenehuilli macehualtin ca nican oquimittaque ynpan oacico oc ontlamantin macehualtin y nicân ocatca auh amo huel nican Mexico yn omochantiaya yehica ca moch atl ocatca ca tol quauhtla

ca acatepexitl catca yece ca in centlamantin yntoca catcaya Chichimeca auh yz cate yn Chichimeca ca ça pepetlauhtinemia atle y ma nel ce tzotzomatli quimoquentiaya y ma nel cihuatl y manel toquichtin ye ce çan huel yuhqui nacateme yn iuhqui quenin omotlacatilique ca çan iuhquin nemia ma nel ce maxtlatl amoquitlalliaya ca çan huel iuhqui yolcatzitzinti ypan pohuia atle ynyollo catca catle quimatia auh ca yehuantin yn quimittaque ynpan acico ca yehuan yn Tlaxcalteca auh xicmatican yn annotiachcahuan yn annoteyccahuan ca yehuantin yn Tlaxcalteca achitzin quimixtlamachtique quimilhuique yn quenîn nemonhuaz auh nimân yn yehuantin yn Chichimeca achitzin omozcallique nimân oquimoteotique yn tonatiuh ca in ye oc ye nepa yn ayamo huallaci yn Tlaxcalteca ca atle ynteouh catca ca ye onimechilhui catle quimatia auh ynic oquimoteotique yn tonatiuh ca çân yntech omixcuitique yn intemachticahuan yn Tlaxcalteca ca çan yehuan quinmachtique yehica ca çan no yehuantin quimoteotiaya yn tonatiuh auh yehuatl ynic quinepechtequiliaya ynic yxpan mocnomatiaya ynic quimocuitiaya ca yn teouh yn tonatiuh ca yz catqui yn quichihuaya ca yn iquac ytla oquiminque yn aço tototl yn aço tochtli yn aço maçatl y ma nel ytla oc cêntlamantli nimân yehuatl yn mitl ynic oquiminque yn çân ya yuhqui yeço yn quiquixtiliaya auh ca concuia quittitiaya yn tonatiuh ynic oncan quimocuitiaya ca yn teouh ca ytenco yn ocacic yn tle y oquimin auh in yehuantin yn onimechilhui yn Chichimeca ca çan no yuhqui quichihuaya ypampa ca oquinmachtique yn Tlaxcalteca

yn intlal yn inchan ocatca ca ye onimechilhui amo nican Mexico Tenochtitlan auh ca çan uncan ocatca ytlan yn tepetl yn motenehua Popocatepetl yhuan yn oc ce y motenehua Yztaccihuatl auh ca oncan yn onoya yn catca yn itocayocan Chalchiuhmomozco ycpac yn onoya tepetl yn omoteneuh chalchiuhmomoztli yn axcan ye ytoca yn tepetl Amaqueme yhuan atl yn quimoteotiaya auh yn macehualtin yntoca catca Xochteca Olmeca Quiyahuizteca Cocolca nauhtlamantin auh cenca tlahuelliloque catca tequannahualleque quiyauhnahualleque tequanime catca o ca yehuantin in yn quinpanahuique Tlaxcalteca yn oncan onoya yn catca yn axca Amaquemecan auh no yehuantin yn Chichimeca yn Totollinpaneca yn Amaqmeque yn iquac acico ynic huallaq oncan axcan Amaquemecan ca oc no quimitztacico oc no ynpa acico yn omoteneuhque macehualtin auh ca ye quin yehuantin quinpeuhtacico ca ye quin yehuantin quintocaco yn Amaqmeque ynic quincuillitacico yn imaltepeuh yhuan yn intlal catca auh ca noço Chalchiuhmomozco ytoca catca yn achto yn ayamo huallacia Amaquemeq auh yn iquac acico Amaqmeque quipatlatacico yn itoca tepetl yn achto ytoca catca auh ca quin yehuantin quitocayotitacico ynic Amaquemeque ypampa yn camaquentiquentique yn tepetl ynic axcan mitohua Amaqmecan auh yn macehualtin omoteneuhq yn anchto oncan onoya yn Xochteca yn Olmeca yn Quiyahuizteca yn Cocolca ynic quintocaque ynic oncan quinpeuhque Amaquemecân ¨¨¨

Ytoca yn Axollohua niman ye quimilhuia yn icnihuân ca oniquittato yn Tlalloc ca onechnotz ca quitohua oquimihiyohuilti ca ohuacico yn nopiltzin yn Huitzillopochtli ca nican ychan yez ca yehuatl ontlaçotiz ynic tinemizque yn tlalticpac ca tonehuan auh yn oquimonnonotz yn icnihuan niman ic yaque tlachiyato yn ompa yn quittato yn tenochtli yn oquittaque niman ye tlatlachpana yn itzintla tenochtli ye tlachichihua yn Mexica yc ônmotlallique ye cate yn toltzallan yn acatzallan yn Mexica ca tecococayotica yn onmotlallique choquiztica çan omotlatlamalliaya yn atlan auh yn otlatlachpanque yn otlacuicuique yn itzintla tenochtli oncan contlallique yn tlalmomoz

{Chicue xihuitl yn ôncan catca ynic motlallico tultzalla acatzallan ÿn Mexica çan oc motlatlamalliaya cênca hueichoquiztica }

III Tochtli xihuitl Ypan in yn xihuitl yn quitlallique yn tlalmomoz Mexica auh in yehuatl ytoca Xomimitl mahahuiltito yn ompa campa quinamiquito in Colhuacan tlacateccatl quitzitzquiq niman quihualhuicaque yn ocaxitico yn oquihualhuicaque Auh çan yohualtica yn ytic contlallique yn intlalmomoz quiyollotique yn tlacateccatl ytoca Chichilquauhtli yn Colhuacan tlacateccatl ye omito yn ipan xihuitl quitlallique yn intlalmomoz yey tochtli xihuitl {anoço ome tecpatl xiuitl}

Auh yn iquac yn ohuacico yn Chichimeca yn Azteca yn Colhuaque yn iquac yn otlachichiuhque yn tenochtli itzintla Auh nimân ye quitohua yn Tenoch yhyoyahue anca yehuatl yn ynic otihualnentlamatiaque ynic otenehuac yn toyollo yn tonacayo

Auh yn Quauhtliquetzqui ye quitohua oquimihiyohuilti yn tlacatl ca omaxitico yn Huitzillopochtli ca yehuatl

ontlaçotiz

Auh yn Xomimitl niman ye quitohua oncan yec in otacico Auh yn Ocellopan niman ye quitohua yn yoyaue anca yehuatl in in ynic otihualnentlamatiaque Auh yn Axollohua ye quitohua yn yoyahue totecuiyoye yn nehuatl ÿn n Axollohua tle yn ye nopan mochihua yn Tenochtitlan Auh yn Ahatl ye quitohua ypalnemohuanie otitechmocnellili ca yehuatl in ynic otinentlamatinenca ynohuian otiyaochihualloque Auh yn Acacitli ye quitohua in yoyahue tloquehenahuaquehe ca yehuatl in ynic nicocha yn n Acacitli yn Chapoltepec yn popoliuhtoc yn notatzin yhuân yn Azcatl Xochtzin yn noteyccaztzin Auh in Tecalle ye quitohua in nehuatl in niTecalle ca yc noyohua yn noyollo ca noconilnamiqui yn ompa Colhuacân yn Contitlan tinauhxiuhtiq Auh yn Tzepanxouh cihuatl nimân ye quitohua totecuiyo tle yn tictoqualtizque Auh yn Acpacuehe cihuatl niman ye quitohua tlacatl totecuiyo anca ye nican yez yn ihiyotl toconmatizque

Auh yn Huquitli Ytztolcatl atle quito auh yn Coquiatl ano tle quito Auh yn Ahuexotl anotle quito auh yz cate yn oc cequintin yn atle quitoque ytoca Olopantzincatl ytoca Atototl ytoca Tlaçotzin ytoca Quauhcohuatl oc ce ytoca Chiyauhtototl ytoca Quatecac ytoca Xippan ytoca Cecuiztli ytoca Epcohuatl ytoca Teuhcxollohua ytoca Cincohuatl ytoca Ytitlil ytoca Xopil ytoca Chichimeca Quatlecohuatl ytoca Atlacotl

  ytoca Calpilcatl ytoca Tolnahuacatl ytoca Matlaomi ytoca Acaten ytoca Tolnex yn itoca yn Apepetz ompa mic yn Apepetzpan motenehua Auh oc cequintin yzcate cihua ytoca Tolxochcihuatl ytoca Atencatzincihuatl ytoca Tequixquipanecatlcihuatl ytoca Quetzalmoyahuatzin yehuatl in y nican mixihuico yn motenehua Mixiuhcan çan no yehuatl yn quitemato yn oncan motenehua Temazcaltitlan auh yn iconeuh ytoca Contzalân oc cequintin quitohua ytoca Cohuatl ycue Auh yn Xiuhxahual niman ye quitohua ma titotlatlamallican auh ye omito yn tlacpac in iquac yn ohuacico yn Chichimeca yn Azteca yn Colhuaque yn iquac yn otlachichiuhque yn tenochtli ytzintla ca çan oc tolxacaltzintli yn inxacal yn oncân mochantique Auh niman yc conpehualtique in ye motlatlamallia yn ipan în omoteneuh yey tochtli xihuitl y nican toltzallan yn acatzallan auh chicue xihuitl yn çan oc motlatlamalliaya auh yn quiyahuallotoque yn tlalhuactli ypan tlaca yn huallachiya ye tlapopotztoque yn atlitic {auh ca} yuhquîn in tzoyac yehuatoc yn quihuallinecui ca mieyequintin ynic micque {yhuan} popoçahuaque auh yhuan miecpa yn quinpehuazquia ahuel quinchihuaya cenca tlapaltique catca yn Mexica

VIII Acatl xihuitl {Ipan in yn VIII Acatl xiuitl yn momiquillico nicân Quihnatzin Tlaltecatzin yn tlahtocat Tetzcuco epohual xihuitl yn ihcuac ÿn o iuh nepa xihuitl tlac Techotlallatzin Coxcoxtzin }

{Niman ipan in yn omoteneuh VIII acatl xihuitl oncan hualmotlahtocatlalli yn Techotlallatzin Coxcoxtzin yc macuilli tlahtohuani mochiuh yn Tetzcuco }

Nican ypan in yn ye quin canauhtli yn diablo yn Tezcatlipoca catca ye quilhuia Quetzalcanauhtle ma oc tihuiyan ma oc tictlalcahuican yn altepetl ye nellelaci ynic niquallani ma oc onpa tihuiyan yn Coyohuacan Auh ma oc omoçahua yn nohueltiuh yn Chalchiuhtlicue niman ye ontlamanti yn ompa in Coyohuacan çan ye ypan in yn chiuhcnahui tecpatl xihuitl auh yn quitenehuilli yn oc omoçahuaz yn ihueltiuh yn Chalchiuhtlicue yquac chichix yn atl auh yn iquac yn acito yn ompa yn Coyohuacân auh yn ompa tlaca yn Coyohuaque mochi tlacatl quinyacapictacic yn diablo yn ica yn tle yn ÿn itlatol auh ynic quimayacapictacic yc axcan motocayotia Yacapichtlan ya yquac peuh yn aocmo quiyahui ynic Chalco nohuian Chalco y mochiuh yn in tlatolli omoteneuh { ypan yn oncan chicuexiuhtique Tenochtitlan yn Mexica çan oc motlatlamallique }

X Calli xihuitl Nican ypan in çan oc toltzallan acatzallan ynic catca Mexica yn çan oc motlatlamalliaya ypan tlamico

XIII Tecpatl xihuitl Nican ypan in omiquico yn Huehue Acamapichtli yn tlahtohuani Colhuacan yn tlahtocat matlactli omey xihuitl auh ça niman ypan in yn xihuitl y motlahtocatlalli yn Achitomecatl telpochtli tlahtohuani Colhuacan auh ça no ypan in yn xihuitl ynic ompa nenca macuilxihuitl yn Coyohuacan yn Yacapichtlan yn diablo auh ye ypan in yn matlactli omey tecpatl xihuitl in yequene yxquichtin hui yn Chalca yn canazque yn quinotzazque yn diablo çan inneyxcahuil yn Chalca amo tehuanme yn Amaquemeque auh ayemo onaci

yn Chalca yn Yacapichtlan ocuel quinahuati yn Quetcanauhtli yn diablo quilhui Quetzalcanauhtle ye huitze techanazque yn Chalca cenca techtlatlauhtizque auh ye ticeyaz ma tihuiyan auh onacique in Yacapichtlan in Chalca ye choca yn ixpan Tlacatecolotl ye quinotza ye quitlatlauhtia auh quimilhui yn Quetzalcanauhtli ohuaquimocnellilique yn amoteouh yn amotlahtocauh ma tihuian niman ye huitze oncan quiçaco yn diablo yn oncan tzaqualtzintli ytic auh quen quicac quen quimol yn itoca Temizteuhctli yn in ipiltzin yn tlahtohuani yn Huehue Teuhctli Chichimeca teuhctli oncan quinamiquito yn tzaqualtzintli ytic yn diablo ynic quinamiquito yn quimacac chalchiuhquauhyahuallolli ynic quitlatlauhti quilhui noteohue notlahtocahue otontequitito otontlacotito tel ca matzin ipa ca motepetzin ipa auh quilhui yn teomama yn Quetzalcanauhtli yn diablo tla xictlatlani yn Temizteuhctli cuix itla quinequi Nimân ye quilhuia yn Quetzalcanauhtli yn Temiztzin cuix itla ticmonequiltia Yc quinanquilli quito yn Temiztzin cahamo ca ç nicnotlapalhuico ca çan ntlatlauhtillico ÿn nh yn notlatocauh ahu ¨¨¨çân yehuatzin quin ¨¨¨hiltia yn acitla nechm ¨¨¨lliliz

Niman qi yn diablo Quetzalc xoconilhui mhui onechicnelli nican ca aca notlahtocayo oncan quimacac yn tlahtotl yn teuhctzôntli in iuhqui corona ypan pohuia auh oncan yancuica yc peuhqui yn teohua teuhcyotl auh yn Temiztzin quitlania quimitlaniaya yn tlatquicayotl

yn tlatquicayotl ca çan nantiz ca çan tatiz yn quemanian ypampa yn amo quimacac yn amo cez yn tlacatecolotl çan yehuantin quinmacac in itoca xochpoyo yhuan yn itoca Tetzauhquacuilli yhuan yn itoca y nauhtene yn itahuan yezque auh yaqui yn diablo auh yc motlallico yn ipetlapa yn icpalpa yn Temiztzin ye teohua teuhcti yc chiquacen in mochiuh yn tlahtoque yn quipachohua altepetl Amaquemecan

I Calli xihuitl Nican ypan in yn moxelloque yn Mexica Tenochca ynic cequintin ompa motlallito yn Xaltillolco çan ompa ontlatlamaya ynic tlachiyato ynic ompa tlahuelmatito yn axcan ye mitohua Tlatillolco

II Tochtli xihuitl Nican ypan in yn momiquilli yn tlacatl Quahuitzatzin Tlayllotlac teuhctli tlahtohuani Tzaqualtitlan Tenanco Amaquemecan auh ynic tlahtocat ompa Tzaqualtitlan Tenanco Amaquemecan epohual xihuitl ypan matlac xihuitl yniico ynic quitlallico altepe auh ynic mocen ynic tlahtocat ompa Ate ynic huallaque l xihuitl ypan itl yc omomiq

III Acatl xihuitl n ypan in yn lahtocatlalli yn Nochhueayllotlac teuhctli mochiuh yn Tzaqualtitlan Tenanco Amaquemecân auh çan tlacoxihuitl yn in ontlahtocat çan niman in yn xihuitl momiquilli

y motlahtocatlalli yn cihuapillatohuani yn itoca Xiuhtoztzin Tlayllotlac teuhctli mochiuh yn Tzaqualtitlan Tenanco Amaquemecan ynin ychpochtzîn yn Tlahtohuani Quahuitzatzin

V Calli xihuitl Nican ypan in yn momiquilli Ytzquauhtzin Atlauhtecatl teuhctli Xocoyotl tlahtohuani Atlauhtlan Tenânco yn tlahtocat onpohual xihuitl ypan matlac ypan oxihuitl auh ça niman ypan in yn xihuitl yn motlahtocatlalli yn ixiptla yn itoca Tlotli Tlatquic Atlauhtecatl Teuhctli mochiuh yn Tenanco

VIII Tecpatl xihuitl Nican ypan in yn quitlalcahuique yn imaltetepeuh yn Tlalhuacpaneca ynic motecato yn Quauhximalpan oncan oxiuhtique niman no ceppa callacque yn Atzaqualloyan yn Quauhnepantla

XI Acatl xihuitl Ypan in yancuica quittaque yn Tlacochcalca Chalca yn popocac yn Popocatepetl yn quimatque quiniuhti opopocac auh ca ye amo ca yecpa in huecauhtica yn poca

{No ypan yn miquico ynic teomeca yn itoca Achitometl tlahman ipan ¨¨¨ catlalli y Nauhy }

XII Tecpatl xihuitl ¨¨¨ ¨¨¨ ¨¨¨ ¨¨¨ hualcallaque yn Tlalhuacpetl ynic ce Azcapotzal ca yn iquey Coyohuacan ¨¨¨ ¨¨¨ ¨¨¨ ¨¨¨ yic macuilli Quauhnahuac ynic ¨¨¨ ¨¨¨ ¨¨¨ ¨¨¨ an Huexotla Cohuatlychan yhuan  ¨¨¨ ¨¨¨ ¨¨¨ ¨¨¨ xiuhtica ynic tetlan hualcallaque ¨¨¨ ¨¨¨ ¨¨¨ ¨¨¨ quitillique in Mexica Auh no ypan ¨¨¨ ¨¨¨ ¨¨¨ ¨¨¨ yn momiquilli yn cihuapillatohuani tzin Tlayllotlac teuhctli yn ichpoch

Auh ynic tlahtocat Tenanco chiuhcnauh xihuitl auh ça niman ipan in yn xihuitl yn motlahtocatlalli yn itelpochtzin ytoca Ytztlotzin Tlayllotlac teuhctli mochiuh yn Tzaqualtitlan Tenanco Amaquemecan

II Acatl xihuitl {Nican ypan in yn Acatl yn motlahtocatlalli yn Techollalatzin tlahtohuani Tetzcoco auh ça no yhcuac yn ipan omoteneuh xiuitl motlacatilli in Huehue Yxtlilxochitzin yn inantzin ytoca Tozqtzin ychpoch in yn Acolmiztli tlahtohuani Cohuatlichân auh in icuac quichihuaco yn inconeuh ye cenpohuallonchiuhcnahuixiuitl nemi tlalticpac yn Techotlalla }

Nican neztica in yancuican ynic oquipilque yn inxiuh yn Huehuetque yn atlitic yn Mexico yn Tenochtitlan anoço tenochtli oncan ycac yn inecehuiayan in quauhtli ynic ye motenehua Tenochtitlan yn oncan ohuitza techyahuallotoc yancuican oncan otlequauhtlatzq yn huehuetque auh oncan no quicuico yn tletl yn techyahuallotoque tlaca

IV Calli xihuitl Nican ypan in yn omomiquillico yn Tlotli tlatquic Atlauhtecatl teuhctli yn tlahtocat matlac xihuitl omey yn Atlauhtlan Tenanco Amaquemecân

V Tochtli xihuitl Nican ypan in y motlahtocatlalli yn itoca Huecon Teuhctli Atlauhtecatl teuhctli mochiuh yn Tenanco

¨¨¨ ¨¨¨ ¨¨¨ ¨¨¨ ¨¨¨ Nican ypan in yn ¨¨¨ ¨¨¨ ¨¨¨ ¨¨¨ ctli Atlauhtecatl teuhc

ihuitl Nican ypan in y motlahçomatzin Atlauhtecatl teuhctli ÿn ¨¨¨ Atlauhtlan Tenanco

I Acatl xihuitl Nican ypan in yn momiquillico yn Huehue Teuhctli yn Chichimeca Teuhctli tlahtohuani Amaqmecan yn tlahtocat onpohualxihuitl ypan caxtolli on ce xihuitl Auh çan niman iquac yn ipan in xihuitl yn motlahtocatlalli yn Ipantlaqualloctzin Chichimeca Teuhctli mochiuh tlatohuani Amaquemecan yn in ipiltzin yn Huehue Teuhctli yn Chichimeca Teuhctli

IV Tochtli xihuitl Ypan in yn cequintin huehuetq quimachiyotia yn motlahtocatlali Acamapichtli achto tlatohuani Tenochtitlan

V Acatl xihuitl Nican ypan in y hualmocuep Techichco yaoyotl oncan yaomic oncân cacique yn Huehue Cacamatzin tlahtocapilli Amaqmecan Chalco

VI Tecpatl xihuitl Nican ypan in yn momiquilli Tenoch yn quauhtlatohuaya Tenochtitlan yn quauhtlahto Tenochtitlan onpohualxihuitl onnahui

VII Calli xihuitl Nican ypan in yn ye yuh onpohual xihuitl onmacuilli cate ÿn nican Tenochtitlan yn Mexica ynic acico Chichimeca Mexitin Colhuaque ypan in yn xihuitl yn mocentlallique mononotzque ynic quitlallique yn intlatocauh auh yehuatl quipepenque quixquetzque yn Acamapichtli tlahtocapilli Colhuacan Auh machitzin nican toconitocan yn iuhqui y catqui yn itlahtocatlacamecayo ynin omotocateneuh ynic ome Acamapichtli yn iuh oc campa tetechpa quiztica yn intech yn Colhuacân tlahtoq yhuan ÿntechcopa yn Mexica auh yehuatl ypampa ynic yehuatl canato

Acamapichtli ynic yntlatocauh mochiuh Mexica auh ca yuhqui in ynic peuhtica yn itlacamecayo yn Acamapichtli yn iuh quitohua yn iuh quimachiyotitihui huehuetq

Yn itoca Achitometl oncan tlahtohuani yn Colhuacan auh yn ipiltzin ytoca Acxoquauhtli ca no tlahtocat yn ça tepan yn Culhuacan auh yn Mexica yn itoca Huitzilatl yn ipilhuan omentin ynic ce itoca Azcaxotzin cihuatl ynic ome ytelpoch ytoca Teuhctlehuac auh yn Azcaxotzin ca quimocihuauhti yn tlahtohuani Acxoquauhtli auh oncan otlacatq oquinchiuhq omentin yn pilhuân ynic ce ytoca Coxcoxtli ynic ome ytoca Xihuitl Temoc auh ca ymomextin otlahtocatq yn çatepan yn Colhuacan auh yn tlahtohuani Coxcoxtli oquinchiuh omentin yn ipilhuan yn cequintin huehuetq yn iuh quitohua ynic ce ytoca Macuextzin anoço Teçoçomoctli auh amo huel momati campa tlahtocatito ynin auh ynic ome ytoca Huehue Acamapichtli ynin ca ompa tlahtocat yn çatepa yn Colhuacân auh ynîn Huehue Acamapichtli yn quimocihuauhti çan ihuayolqui ychpoch yn Teuhtlehuac Mexicatl auh ye yxhuiuh yn Huitzilatl ytoca yn cihuapilli Yxxochitl auh yn Huehue Acamapichtli yn ihuan ycihuauh Yxxochitl oncan quichiuhq ynic ome ytoca Acamapichtli yn tlahtocatico achto Mexico Tenochtitlan auh ynin

Acamapichtli yn quimocihuauhti ytoca Yllancueytl ynin ychpoch yn tlahtohuani Colhuacan yn itoca Xihuitl Temoc auh ca yehuatl yn ipampa ynic occampa tetechpa quiztica ynic ome Acamapichtli ynic ompa canato Colhuacan yn Mexica ynic yehuatl achto yntlahtocauh mochiuh tlahtocaquauhtzonyotl tlahtocanelhuayotl mochihuaco y nican Tenochtitlan yn ipan motlahtocatlalli ye omoteneuh

VII Calli xihuitl yehuatl contzinti yn tlahtocayotl Mexico Tenochtitlan ye tlahtocati Auh no yquac yn ipan in xihuitl yn momiquilli yn Oçomatzin Atlauhtecatl Teuhctli tlahtohuani Atlauhtlan Tenanco yn tlahtocat matlac xihuitl auh çan niman ypan in yn xihuitl motlahtocatlalli yn ipiltzin ytoca Huetzin Atlauhtecatl Teuhctli mochiuh yn Atlauhtlan Tenanco

I Tecpatl xihuitl Ypan in ye cequintin Huehuetq yn iuh quimachiyotia yn motlahtocatlalli Acamapichtli yn Tenochtitlan auh no iquac yn ipan in xihuitl yn acito yaoyotl yn ompa Chalco Atenco auh chicue xihuitl yn çan oc xochiyaoyotl yn mânca yn quimacia yn Mexica pipiltin çan oc quincahuaya yn Chalca auh no yhui yn quimacia yn Chalca pipiltin çan oc quincahuaya yn Mexica ca çan ic yn celtin yn macehualtin yn miquia

I Calli xihuitl Nican ypan in yn momiquillico yn tlahtohuani Tenochtitlan yn Acamapichtli yn tlahtocat cênpohual xihuitl once yn Tenochtitlan auh yn quîncauhtia yn ipilhuan yn quinchiuh ca cempohualli omey yn itlaçopilhuan yn tlahtocapipiltin ynic ce ytoca Quatlecohuatl ynic ome ytoca Yxehuatzin ynic ey ytoca Ometochtzin auh ynin ompa quitlanico yn Tollam ompa tlatocatizquia auh çan ômmomiquillito ynic nahui ynipilhuan yn Acamapichtli ytoca Cuetlachtzin auh no cuel yehuatl in ompa ommotlahtocatlalli yn Tollam auh ompa cihuapilli yn quimocihuauhtitacic ytoca Xillochotzin ynin ychpoch yn itoca Cuetlachihuitl tlahtohuani catca yn ompa Tollam auh yn çatepan yn ompa opiltique Tollam ca ytech oquizque yn Cuetlachtzin Ynic macuilli yn ipilhuan Acamapichtli ytoca Citlalcohuatzin ynic chiquace ytoca Macuextzin ynic chicome ytoca Ytzcohuatzin ynic chicuey ytoca Huehue çaca ynic chiuhcnahui ytoca Tetlepanquetza ynic matlactli ytoca Yaotlantzin ynic XI Yxcuitlantoc

III Tecpatl xihuitl Nican ypan în tzintic yn tlahtocayotl yn Quauhnahuac yn achto ompa tlahtocat yn motlalli ytoca Tehuehueltzin teuhctli

V Tochtli xihuitl Nican ypan in yn momiquilli yn Temiztzin teohua teuhctli tlahtohuani achto yn oncan Teohuacan Amaquemecan yn tlahtocat Epohualxihuitl on matlactli ypan ce xihuitl

VI Acatl xihuitl {ypan in pehuac Yacapichtecatl} Nican ypan in yn ya huitze yn Mexico Tenochtitlan yn cuezcônpiaya yn Amaquemecan quinonotzaco yn tlacateuhctli yn Itzcohuatzin yn iquac yn ayemo tlahtohuani ca çan oc tlahtocapilli y nicân Mexico auh ca yehuatl tlatocati yn Huitzillihuitl yn teomeca yn iuhqui ytoca yn auh ytlan teuhctlatohua yn Quatlecohuatl tlacochcalcati Auh yn yehuantin yn Amaquemeque yn Chalca ca çan oc quinechicohuaya in cintli ytech quipohuaya yn Huitzillihuitl yhuan yn Itzcohuatzin ca yehuatl yn quipiaya yn cuezconpixque eyntin yn cuezconpixque ynic ce tlacatl ytoca Tozmacuex ynic ome ytoca Xoquahue yniqu ey ytoca Tlaltecatl auh ynic quinnonotzaco yn Huitzillihuitl tlahtohuani yhuan yn Quatlecohuatl tlacochcalcatl yhuân yn Itzcohuatzin tlacateuhctli çan quintentlapiquico yn Chalca yn tlahtoque yehuatl yn Huehue Quetzalmaçatzin Chichimeca teuhctli yn Amaquemecân tlahtohuani auh yn yehuatl yn Chalco tlahtohuani ytoca Toteoci teuhctli yn tequachcauhtli yn ompa catca yn Acxotlan yn axcan

mitohua Calnahuac yntlan yn S¨ Miguel Auh ynic quintentlapiquico yn i quiztlacatico yn cuezconpixque quilhuico ÿn tlahtohuani yn Huitzillihuitzin yhuan yn Quatlecohuatzin yhuan yn Itzcohuatzin quimilhuique yn axcan tlahtoquehe anquimocaquitia yn yehuantin yn tlahtoque yn Chalco cenca moxicohua yn amohuictzinco amo ommocactoque auh yuh quicac yn Huitzillihuitzin yhuan yn Quatlecohuatzin yhuan yn Itzcohuatzin cenca quallanque quimilhuiq oc ximotlallican auh yn Huitzillihuitzin yhuan yn Quatlecohuatzin yhuan yn Itzcohuatzin Niman ye quinnonotza yn Tlatillolca yhuan yn Tepaneca quimilhuique yn Chalca cenca moxicohua yn ihuic yn Mexicayotl y mexcan ixti yn mononotzque auh yn oyuh mononotzque nimân yc ye huallehua yn Mexica yn achcacauhti yn quinmictizque yn Chalco tlahtoque auh quima yn Chalco tlahtohuani yn itoca Toteoci teuhctli in ye huitze yn quinmictizque auh yc quihto yn Toci teuhctli ma ça oc achi nocontoca cuix nican nicnochiyaltitiyez yn miquiztli ynic Totomihuacanpa ytztia auh no quimah yn Huehue Quetzalmaçatzin Chichimeca teuhctli yn Amaquemecan tlahtohuani quitho oyaqui

yn Tociteuhctli yn tequachcuauhtli auh y nehuatl cuix nicân nehuatiaz Ca tihuan yn ticpia yn Chalcayotl ma ça oc no achi nocontoca Auh yn oyaque ÿn tlahtoque auh no niman onyaque onacique yn Mexica yn quinmictizquia yntlahtoq auh ça ontlatlachiyato oyaque yn tlahtoque Chalca aocaque auh yn yehuatl Huehue Quetzalmaçatzin quicauhtehuac yn icihuapil yhuan ytlaçopiltzin ytoca Cohuaçacatzin auh yn ontlatlachiyato yn Mexica niman yc hualmocuepque yn Tenochtitlan quinonoco yn tlahtohuani yn Huitzillihuitzin yhuan Quatlecohuatzin yhuan yn Itzcohuatzin yn oquicacque y nican Mexico tlahtoque yc quintlahtocatlallique yn cuezconpixque auh nimân ya hui quincahuazq yn cuezconpixque quintlallito yn Amaquemecan ce tlacatl Chichimeca teuhctli auh ce tlacatl Teohuateuhctic Auh in yehuatl yn itoca yn Tlaltecatl tequachcauhtic ypatca mochiuh yn Toteoci teuhctli yn tequachcauhtli auh in yehuantin in yn cuezconpixque ca amoma Amaquemeque auh ca ye ompa Tlaelpan tlaca ÿn nitech chiconquiyauhtepetl ca Tlayllotlaque auh in yehuantin cuezconpixque ynic quintentlapiquico yn Chalco tlahtoque cenca yc motlamauhtillique auh yn ixquichtin yn ixtlamati yn achcacauhtin yn tequitlatoque in tiyacahuan yn ompa pipiltin mochi tlacatl ynhuic cetiyac quizqui yn chiquacen Acatl xihuitl

Nican ypan in yn momiquilli in Huehue Quetzalmaçatzin Chichimeca teuhctli yn tlahtohuani Amaquêmecan yn tlahtocat caxtolli on nahui xihuitl auh yn momiquillito ompa yn itocayocan Acahualtzinco auh ye yc nauhxihuitl in yn cactoca yn tlahtocayotl yn ayac tlahtocat Amaqmecan yhuan yn Acxotlan auh macihui yn tlahtocatque yn cuezconpixque ye ce ca çan macehualtin ca çan quichtecque ÿn tlahtocâyotl auh yn oyuh quimatque yn Chollolan yhuan Quauhquechollan yhuan yn Itzocan yhuan yn Tetzcoco yhuan yn Xochmilco yn tlahtoque cenca quallanque quihtoque ma titononotzacan ypan yn Mexicatl ma ticyaomanillicân tle ay quen mochihua yn oquichololti yn Chalco tlahtoque cuix amo tonan cuix amo tota yn Chalcatl auh ynin yn intlatol ynic mononotzaya yn nohuian tlahtoque auh nimân quimatque quicacq y nican Tenochtitlan tlahtohuani yn Huitzillihuitzin yhuan yn Quatlecohuatzin Tlacochcalcatl yhuan yn Itzcohuatzîn tlacateuhctli yn iuh quitohua yn Anahuaca auh yn iuh quitohuaya yn tlahtoque yn Anahuaca yn tonan yn tota yn Chalcatl anca ço in ye huecauh mochi tlacatl nican hualmotlahtocatlalliaya y nohuian tlahtoque yn oqu ic ayamo macocuia yn ayamo mocuecuetzohuaya yn Mexica {Ipan in y IX Tochtli xihuitl años nican motlahtocatlalli yn tlacatl Huehue Yxtlilxochitzin ome tochtli yc chicuacen yn tlahtocauh mochiuh yn Aculhuaq Tetzcuca ynin ytlaçopiltzin yn Techotlallatzin Coxcoxtzin O iuh xiuitl tlacat yn ipiltzin Yxtlilxochitzin yn itoca Neçahualcoyotzin }

{Auh matlactlonce xihuitl yn ayac tlahtocat Tetzcuco yn o iuh momiquilli Techotlallatzin Coxcoxtzin }

mononotzque quihtoque ma quicaqui yn totlatol ÿn teuhctli yn Huitzillihuitl yn Quatlecohuatl yhuan yn Tlacateuhctli yn Itzcohuatl ma yc hualmotlalli ma yhuihui ma mitica ma chimaltica yn techitta yn tahuaq yn titepehuaque O yhui n yn quallanque yn Anahuaca yn ipampa yn Chalco tlahtoque auh quicacque yn Huitzillihuitzin yhuan Quatlecohuatzin yhuan yn Itzcohuatzin yn iuh quitohua yn Anahuaca in ye quinyaoyahuallozque in yaoyotica cênca momauhti yn Huitzillihuitzin yn ihuân Quatlecohuatzin yhuan yn Itzcohuatzin quitoque camo ticmati yn queni ynic oyaque yn tlahtoq ca çan otechiztlacahuico maço huillohua ma quimanati yn tlahtoque ma motlalliqui yn ôncan yn inchantzinco auh in yehuantin yn onechiztlacahuico yn tlapalpopol ma quinmictiti yn quexquichtin yn i mochintin yn omotenmacaq ma mochintin quimmictiti ayac mocahuaz auh niman quicaque yn Anahuaca yc moyolcehuique ayocmo quichiuhque yn yaoyotl yn quitohuaya yn quichihuazquia yn îpan Mexica auh niman yc onehuaque in Mexica yn achcacauhtin yn quinmictizque yn cuezconpixque auh yn cacalloc yn quinquatetzotzonaco mochintin yn pipilhuan yn inhuayolq auh in yehuatl yn tlahtohuani yn Toci teuhctli anoto caxitico yn Mexico Tenochtitlan auh quilhui yn tlahtohuani yn Huitzillihuitzin yhuân

yn tlacateuhctli yn Itzcohuatzin oticmihiyohuilti tlahtohuanihe otimaxitico yn Tenochtitlan auh catlia yn Chichimeca teuhctli yn Quetzalmaçatzin auh quinnanquilli quimilhui yn Tequachcauhtli yn Toteoci Teuhctli ca omomiquilli ca ye monamicti yn momiquilli no ceppa quihto yn Huitzillihuitzin yuan yn Itzcohuatzin auh aquique yn tlahtocatizque yn Amaquemecân

Auh oncan ce tlacatl catca Mamalhuaçocan ychan ytoca Cohuatzin yn xochipixcauh catca yn Amaquemecan tlahtoque oncan ye quimonnextia yn tlaçopipiltin quihto ca oncate yn tlahtoque yn pilhuan ca nican nemitillo yn Cohuaçacatzin yn itlaçopiltzin yn Chichimeca teuhctli yn Quetzalmaçatzin yhuan y nantzin nican monemitia auh oc ce quinemitia yn Amaquemecan ytocayocan ytztolloytic yn monemitia ytoca Aoquantzin auh niman {quito} yn Huitzillihuitzin yhuan yn Tlacateuhctli yn Itzcohuatzin tla huallano auh canato yn Mexica caxitico in Mexico nimân ye quimitta yn Huitzillihuitzin yhuân yn Quatlecohuatzin yhuân yn Itzcohuatzin quihtoque ca oc cenca piltzintli yn Cohuaçacatzin Auh yn Aoquantzîn ca ye achi yxtlamati ma yehuatl Chichimeca teuhctli auh yn Cohuaçacatzin

ma yehuatl teohua teuhctli mochihua auh conmacaque yn Aoquantzin yn tlahtocayotl yn teuhctzontli yhuan yn xihuitzolli conaquique ynin ontlamantli yuhqui corona ypan pohuia yhuan yn ixquich ynic netlahtocatlalliloya yxquich comamacaque auh in yehuatl yn Cohuaçacatzin ca oc cenca piltzintli yn iquac ayamo yehuatl quichichiuhque çan yehuatl quichichiuhque yn cihuapilli yn inantzin yn Cohuaçacatzin ytoca yn cihuapilli Tlacocihuatzin contlallilique yn teuhctzontli yhuan yn xihuitzolli yhuan yn ixquich tlamantli tlahtocayotl conmamaque ÿn cihuapilli auh in yehuatl yn itoca Cohuatzin teuhctli yn Mamalhuaçocan ychan yn xochipixqui no quinahuatique yn Huitzillihuitzin yhuan yn Itzcoatzin quilhuique ynic quinahuatique Cohuatzin momac motepozteco ticcahua tictlallia yn piltzintli yn Cohuaçacatzin oc tiquizcaltiz tichuapahuaz auh ÿn tle ÿn tequitl oc tehuatl tiquitoz tixiptla oc motech ticahua yn teohuateuhcyotl auh yn quenmanian yn oyxtlamatito yn piltzintli ticcahuilliz yn ipetl yn icpal auh yz ca yn cihuapilli timitzmaca ye mocihuauh yuhquin mopiltzin ticchihuaz yn Cohuaçacatzin auh yuh quinnanquilli y nican Mexico Tenochtitlan tlahtoque yn Cohuaçacatzin teuhctli yniuh quichihuaz

X Acatl xihuitl Nican ypan in yn motlahtocatlatlallique in Aoquantzîn Chichimeca teuhctli yhuan Cohuaçacatzin macihui y çan oc yehuatl yn inantzin cihuatlahtocamacoc yn Amaquemecan tlahtoque yhuan yc oppa in oncan tlahtocatlalliloc yn Toci teuhctli yn tequachcauhtli tlahtohuani Acxotlan Calnahuac yn otlahtocatlalliloque auh nimân ya huillohua yn quincahuazque yn tlahtoque yn Aoquantzin yhuan

yn Cohuaçacatzin yhuan yn Toci teuhctli auh yn yehuântin yn cuezconpixque yhuân yn oc cequintin yn quimotenpotica yn an amo micque cenca momauhtique quitoque ye huitz yn tequachcauhtli yn Toci teuhctli auh yn Amaquemecan yn Aoquantzin yhuan ÿn Cohuaçacatzin yhuan yn inantzin yn cihuapilli yn Tlacocihuatzin teyacapan yn tlahtoque yn iuh momatque quinmictitacizque ynic acitihui auh yn Tlalmanalco ytoca Toçanteuhctli yn oquinmotenpotica yn cuezconpixque yn oquihualmatque in ya hui yn Chalco tlahtoque yc cenca tlaltecuin yxquich tlacatl momaquixti yn Chalca yn Amaquemeque yn pipiltin yn tiyacahuân yn achcacauhtin yn tequitlahtoque yn ixquichtin yn quinmotenpotica yn cuezconpixque mochintin momaquixtique yn ompa yaque motecato yn itocayocan Huitzillac yn Amomollocco auh onyaque acito yn tlahtoq ye cate auh in yehuantin yn Amaquemeque yn Chalca yn momaquixtito yn ômpa yn Amomollocco yn iuh momatque ye quinyaotlatlalhuia yn Amaquemeque yn Chalca ompa ye quinpehuatihui yn ônpa cate in Amomolloco nimân ye mononotza ye quimolhuia campa in tiyazq yntla ticallaquican tetlan in Huexotzinco ca toyaopan auh yntla noce tocuitlahuic titocuepacân yntla tihuiyan in Amaquemecan cuix amo ça temac tihuehuetzitihui auh oncan in momoyahuaque yn canpa yayaque auh oc cequintin hualyaque hualmocuepque yn ôncan Amaquemecan O yuhqui yn ynic momoyahuaque yn Chalca yn Amaquemeque ynic axcan mitohua motenehua yn Amomollocco Nexexelloloyan ca ypampa

yn Huehue Quetzalmaçatzin Chichimeca teuhctli yn Amaquemecan tlahtohuani auh in yehuatl yn Chalco tlahtohuani yn Toci teuhctli tequachcauhtli ca ymomextin yntech peuhtica yn tlatolli ynic nexexelloloc yn Amomollocco auh nimân ye no yehuantin ynpampa yn Aoquantzin yhuan yn Cohuaçacatzin çan no Amaquemecân tlahtoque yqu imontlamanixtîn in yn intechpa yn Amomollocco nexexelloloc auh oncan in yehuatl in yca ynin tlahtolli ynic neci ca huey altepetl huey ciudad catca yn Amaquemecan yn oc ya huecauh yn oc tlani ynic chiquacen tlahtoque catca quipachohuaya quipieya yn ompa altepetl yniquaqui atle ypan mochiuh yn tlahtohuani Ytztlotzin Tlayllotlac teuhctli çan pacticatca yn oncân ytecpan Tzaqualtitlan Tenanco auh ypan in yn xihuitl yn peuh yn ya tepitonahui altepetl Amaquemecan ynic nexexelloloc yn ompa Huitzillac yn Amomollocco quizqui yn matlactli acatl xihuitl

XII Calli xihuitl Nicân ypan in yn omomiquillico yn Nauhyotzin yn teuhctlamacazqui (glyphe) tlahtohuani Colhuacan catca {yhuân no yquac motlahtocatlallique ÿn omêntin tlahtoque Chalco Tlalco Quateotzin Ytzcahuacan yhuan Teciuhtzin Opochhuacân }

I Acatl xihuitl Nicân ypan in in ye quene cocoltic yn yaoyotl yn aocmo yequene quincahuaya yn Mexica pipiltin yn quimacia yn Chalca auh no yhui in yehuantin yn Chalca pipiltin yn quimacia yn Mexica aocmo quincahuaya oncan in yn ipan in xihuitl polliuh yn motenehua xochiyaoyotl ynin manca nauhonpohualxiuitl /ypan matlactli omome xihuitl/ { Auh ypan in Acatl xivitl yn mictilo Tetecoc ¨¨¨ Cihuacuecuenotzin Otompa yn mictiloc ycapitan catca yn Ixtlilxochitzin }

III Calli xihuitl {Ypan in yn Tecpatl xihuitl momiquillico ahnoço çan mictiloc yn Huehue Yxtlilxochitzin Ometochtli yn tlahtocat Tetz años }

{/Auh ça no ypan in in tlahcat y Neçahualcoyotzin Tecpatl/} {Yn nen tlaltipac Ueue Yxtlilxochitzin epohual xihuitl ypan chicuacen xihuitl auh yn iuh quimictilique Tepaneca auh yn itlaçopiltzin Neçahualcoyotzin ca cuauhticpac cuanmaxac yn quittac ytatzin yn iuh mictiloc ynic ça cholotinenca }

  III Calli xihuitl {No ypan in y momiquilli Teciuhtzin tlahtohuani Opochhuacân Chalco yn tlahtocat macuilxihuitl yn Tlalmalco} ypan in yn cequintin huehuetque quimachiyotia yn momiquillico yn Huitzillihuitl tlahtohuani Tenochtitlan auh niman iquac motlahtocatlalli yn Chimalpopoca tlahtohuani Mexico auh ypan in yn xihuitl yn momiquillico Ytztlotzin Tlayllotlac teuhctli tlahtohuani catca Tzaqualtitlan Tenanco Amaquemecan yn tlahtocat epohualxihuitl ypân matlacxihuitl auh omentin yn quicauhtia ypilhuan ynic ce ytoca Huehue Chimalpahintzin ynic ome ytoca Quauhtlehuanitzin

IV Tochtli xihuitl Nican ypan in yn momiquillico Huitzillihuitl tlahtohuani Tenochtitlan ynîn ypiltzin yn Acamapichtli yn tlahtocat cenpohualxihuitl ypan chiquacen xihuitl auh çân niman iquac motlahtocatlalli yn ipiltzin yn itoca Chimalpopocatzin auh yn Itzcohuatzin tlacateccati ytlan quinanamiqui auh yn ipilhuan quincauhtia yn tlahtohuani Huitzillihuitl yn tlahtocapipiltin macuiltin ynic ce ytoca Teotlatlauhqui ynic ome ytoca Huehue Cuitlahuatzin ynin ompa tlahtocatito yn Itztapallapan ynic ey ytoca Huehue Moteuhcçoma Ylhuicaminatzin ynic nahui cihuatl ytoca Yaocihuatl ynin ompa quihualmitlani yn Cohuatlychan tlahtocapilli ytoca Toyaotlancatzin ynîn ipiltzin yn Huehue Cuixtecatl tlahtohuani Cohuatlychan auh yc ompa tlacatito yn itoca Huehue Tepollomitzin auh macihui yn ompa quichihuato yn inântzin y Cohuatlychan camo ma ompa ne ca çan nican Mexico nemico ytlan yn itlatzin

Auh yn oc cequintin huehuetque yniuh quimachiyotia yhuan quinpiltzîntia yn Huitzillihuitl yn yzca yntoca ynic ce ytoca Huehue Eleltzin ynic ome ytoca Huehue çaca ynic ey ytoca Citlalcohuatl ynic nahui ytoca Aztacohuatl ynic macuilli ytoca Axicyotzin ynic chiquacen ytoca Quauhtzitzimitzin ynic chicome ytoca Xiconoc ynic chicue ytoca Tlacacochto

Auh çâ no ypan in yn IV Tochtli xihuitl y motlahtocatlalli Quauhtlehuanitzin Tlayllotlac teuhctli tlahtohuani Tzaqualtitlan Tenanco Amaquemecan ynin ypiltzin yn Itztlotzin Tlayllotlac teuhctli auh yehuatl tlahtocatizquia yn inyacapâ yn itoca Huehue Chimalpahintzin auh çan mocauh ynic mitohua motenehua Huehue Chimalpahintzin Mocauhqui {auh no yquac yn ipan in motlahtocatlalli ÿn Totequixtzin tlahtohuani Opochhuacan Chalco }

V Acatl xihuitl Nican ypan in in ye quitohua yn Cohuaçacatzin ye yxtlamati ye mozcallia yn quito aquin in yn ipân ca y nopetl ÿn nocpatl yn Mamalhuaçocatontli yquac quimicti auh chiuhcnauh xihuitl yn ipânpa tlahtocat yn inantzin yn Cohuaçacatzin yn Amaqmecan yn ihuan Cohuatzin teuhctli Mamalhuaçocân ychan

XI Calli xihuitl Nican ypan în moman temallacatl yn Tlalcocomocco

{yn in neltiliztli} Nican ypan in yn miquico yn Huehue Teçoçomoctli tlahtohuani Azcapotzalco yn tlahtocat epohualxihuitl auh quincauhtia yn ipilhuan macuiltin ynic ce ytoca Acolnahuacatl Tzaqualcatl ynin oncan quihuallatocatlalli yn Tlacopan ynic ome ytoca Quaquapitzahuac ynin oncân quihuallatocatlalli yn Tlatillolco ynic yey ytoca Epcohuatzin ynin ompa contlahtocatlalli yn Atlacuihuayan ynic nahui ytoca Maxtlatzin ynin ompa contlahtocatlalli yn Coyohuacan ynic macuilli ychpoch ytoca Ayauhcihuatl ynin /¨¨¨/ conmitlani yn Huitzillihuitl yn Tlahtohuani nican Tenochtitlan yn iqu iz quichihuaco yn tlahtocapilli Chimalpopoca in yehuantin in yn nican omoteneuhque tlahtoque ca oc yehuatl quintlahtocatlallitehuac ÿn omoteneuh yn inttatzin Teçoçomoctli auh çâ niman ipan in yn xihuitl motlahtocatlallico yn Maxtlatzin yn Azcapotzalco ynin cenca tlahuelliloc catca ynic ya Azcapotzalco çan temiccatlapalloto ynic ompa motlahtocatlalli yxiptla mochiuh yn ittatzin omomiquilli ompa onehuac yn Coyohuacan yc ye tlahtocati yn Azcapotzalco

XIII Acatl xihuitl {Ipan in hualcalaq Tenuchtitlan yn Aculhuaq Tetzcuca} Nican ypan in yn momiquilli yn Chimalpopocatzin tlahtohuani Tenochtitlan yn tlahtocat matlac xihuitl auh yn ipilhuan quincauhtia chiquacemin ynic ce ytoca Miquiztin ynic ome ytoca Maxihuatzin tlahtohuani auh amo huel momati campa ÿn tlahtocatito ynin ynic ey ytoca Yohualpopocatzin ynic nahui ytoca Quauhtzitzimitzin anoço Quetzalquauhtzin ynic macuilli ytoca

Yxconan ynic /¨¨¨/ chiquacen cihuatl amo huel momati yn itoca tley auh çâ niman ypan in yn XIII Acatl xihuitl yn motlahtocatlalli yn Itzcohuatzin yn in ypiltzin yn Acamapichtli achto tlahtohuani Tenochtitlan auh ytlan teuhctlahtohua tlacochcalcati yn Cihuacohuatl yn Tlacayeleltzin atenpanecatl auh yn Huehue Moteuhcçoma tlacateccati yqu imomextin quinanamiqui yn Itzcohuatzin auh ye ynpan yn mochiuh yn Tlatilolco temoc /¨¨¨/ chimalli quicahuaco yn Mexico auh niman quichiuhque centetl çan no yuhqui Auh no yquac yn ipan in xihuitl yn quipehualtique yaoyotl yn Tepaneca in ye quimixnamiqui yn Mexica

Auh ca yuhqui hin yn oquipehualtique yaoyotl ynic peuh çan quihuallitlan chinamitl yn Maxtlaton tlahtohuani yn Azcapotzalco conilnamiqui yn iuhqui tlayecoltique Mexica yn ittatzin catca Teçoçomoctli yn quinequia çan no yuh quichihuazguia yn iuh quichiuh yn pan Mexica yn Teçoçomoctli yn quihuallinque chinamitl yn conmacaya yn ompa Azcapotzalco ca yuhqui hin in ye quitohua Maxtlaton aquique y notlalpa yn omotlallico yn oncân ye onoque ma hualhuian ma oc cepa quihualhuicacan chinamitl yc hualtecpancallaquizque auh oncan huallapachotiaz ypan yn canauhtli yhuan yn quachilli yhuan yn cîncohuatl yhuan cenpohualxochitl yn izquitlamantli mochihua chinanpa yzquitlamantli ypan hualmochiuhtiaz auh yhuan yn aztatl {auh} yhuan quinhualhuicazq yn incihuahuan nican mocehuiquihui yn oquinnahuati yn ittahuan Maxtlaton niman quimonilhuico yn Mexica yn oquicaque nimân ye choca yhuân yn Itzcohuatzin niman ye quitohua can ticcuizq

yn chinamitl auh niman nic ye quinnotza yn diablo Huitzillopochtli quimilhui macamo xi motequipachocan mochihuaz in tle yn quitlani Maxtlaton auh yn tlalhuic ye oncan n onoc yn chinamitl niman ye quihuillana niman caxitique yn Azcapotzalco caltenco contetecato auh cenca quimotetzanhuique yn Azcapotzalca auh niman ye quitohua yn Maxtlaton aquique in camo tlaca aocmo yazque ma hueynahualtitin auh ynin ma oc oncuicacan xi quimontlauhtitin yn oquichtin ma ymichcue ymichhuipil auh yn cihua ma ymichmaxtli yhuân ymixtilma yhuan xiquimontlamacati amo yuhcciz anoço amo yuhccic yn tamalli yhuân yn molli auh yn atl atle cayotizque auh yn oquinmontlamauhtiq yn oquimontlamacaque yn Mexica yn ye yuhqui niman ye quimilhuia ca quimitalhuia yn tlahtohuani ma oncuicacân yn Mexica auh yn oquicacque Mexica niman ye yc choca auh niman ye noceppa oncan quimilhui yn diablo Huitzillopochtli maca ximotequipachocan tla toncuicacan auh çan oncan conpic yn icuic yn huehuetitlan ynic quimichcuetique auh yn cihua quimichmaxtlatique auh ca yehuatl yc quallan yn cuicatl yn quicuiqueuhque yn Mexica auh macihui yn cuica ca çan ic quicuicaahua yn Maxtlaton coneuhque otech ya maca ychuaya tocue tohuipil hui xa huiao Ypalnemohuani auh yn oyuh quicac yn Maxtlaton yn in yncuic Mexica

niman yc ye tetlahuizmaca quimilhuia yn itahuan camo tlaca ca yz popollihuizque auh niman ye quimilhuia yn diablo Huitzillopochtli yn Mexica yn axcan ye techmictizque xiccuitlacoyonican yn calli ompa xiquiçacan auh niman yuhqui quichiuhque yn Mexica quitlacoyonique yn calli niman n ompa mochquizque yn Mexica auh yn oquimittaque aoc aque niman ye yc tlacahuaca yc niman ye quitohua Tlacopanecaye Atzcapotzalcaye ye onquiça yn totetzanhuan xonnenemicân xiquintzitzquiti auh yn Mexica niman iqu intech motlapalloque yn Tlacopaneca yn Azcapotzalca çan oc yncaltenco yn quimoncahuato miyec in mic macehualli auh yn o ymellelquiz niman ye yc huitze omotlallico yn in xacalco auh niman quimhuallihua yn ittahuan yn Maxtlaton quimilhuico yn Mexica moztla anpopollihuizque auh yn oquicaque yn Mexica niman ye yc momitia quichiuhq yn tlatzontectli yhuan cueptli yn quimohuitique yc quitocayotique yn Cuepopan ynic axcan motenehua Cuepopan auh ynic moyaochichiuhque yc tlamico in xihuitl

I Tecpatl xihuitl Nican ypan in in yequene huel cocoltic yaoyotl in Tepanohuayan yn Azcapotzalco yquac pehualloque yn Azcapotzalca auh yn yehuantin Mexica yn ipan in xihuitl in ye yuhqui yn omocencauhque yn iyaotlatquitica auh niman ye ic huitze yn Tepaneca yn Azcapotzalca yn quinpehuazque Mexica oncan huitze oncan tlamatihuitze yn Cuepopan auh in ye huallacia yn oncan mamani yn ixacal Mexica auh niman n ic quintepotztique onca ye micalli {Ynin neltiliztli oncân tlapalehuico micalico Neçahualcoyotzin tlahtocapilli }

{Ypan in yn ce Tecpatl xihuitl yn motlatocatlalli Huehue Chimalpilli  latohuani ¨¨cochiuh Ecatepec coçoltica onoc yn quitlahtocatlallique}

oncan huel quimixpolloque yn Cuepopan yn Tepaneca yn Azcapotzalca oncan quimonehualtiq in ye quintoca niman ompa quintepehuato yn itocayocan Huizquillocan ompa ye hual monetoltia quitoque totecuiyohuane ma yxquich ma ohuameleltzinquiz o ytzinco ycpatzinco tinenque in tlacatl Totecuiyo auh ynin ma titlacallaquican yn oncan yn ihiyotl ancomomachiltizque ma tontlaquauhtzotzonati ma tontlatetemanati ma toncalquetzati ca ompa toteuhchuacan yez yn Mexico Tenochtitlan yn otonmaxitico yn ti Mexicatl yn ti Tenochcatl auh yn yehuantin yn Tlacopaneca ypan in yn xihuitl yhualmocauhque yn imac Mexicatl ynic tetlan hualcallacque yhuan Colhuaque tetlan hualcallacque yn Mexico ypan in yn xihuitl ya altepetl Azcapotzalco auh çan oc ômpa quauhtla motlallito yn Maxtlaton yhuan yn Azcapotzalca ompa ynpân quiz yn ce tecpatl xihuitl auh yn oc cequintin huehuetque yn iuh quimachiyotia ypan in yn ce Tecpatl xihuitl yn quimictique Mexica yn Maxtlahton tlatohuani Azcapotzalco auh ye ce ayemo mic yquac ca çan yehuatl yn altepetl polliuh yn ipan in xihuitl auh yn o yuh quimonpeuhque yn Azcapotzalca yhuan yn Tlacopaneca auh niman ye quitohua yn Acolhuacan y Cohuatlychan yn cihuapillatohuani yn itoca ¨¨¨  ¨¨¨

Momanaco yn yaoyotl yn Tetenco yn ye mamanah onmotecato çacatepec noceppa ommotecato Texcalnepantla o yhuin in quinpeuhque yn Tepaneca yn Coyohuaque ypan in xihuitl polliuh altepetl Coyohuacan auh y no ypan in yn ome calli xihuitl yn quimomamacaque Mexica yn tlalli Azcapotzalco in oqu ic ayamo ompa onyaotlatohuaya Chalco Amaquemecan yn Maxtlaton auh ca ye quin iquac yn oconmat yn oconmomamacaque yn Mexica yn tlalli Azcapotzalco ca yehuatl yc motequipachi ynic ompa yaotlatoto Maxtlaton yn Chalco Amaquemecan auh no ypan in yn xihuitl yn quinpehualtique Xochmilca yaoyotica ÿn Mexica ye teyaochihua

III Tochtli xihuitl {ynin nelli} Nican ypan in pehualloque Xochmilca ypan yn Itzcohuatzin ynic ompa tepehuato Mexica auh yn Coyohuaque ypan in yn ompa motecato Texcalla çan yaoctehuân yn Maxtlaton ynic no ceppa ompa quinpehuato Axochco yn quintlaxillito nahualli yn cacic Moteuhcçoma otontlamacazqui niman ye choca ÿn Maxtlaton

IV Acatl xihuitl Nican ypan in quinpeuhque Tlatillolca yquac tlahtocatia yn itoca Quauhtlatohuatzin yn ipan in yc ceppa pehualloque yn Tlatillolca auh no ypan in yn xihuitl yn motlahtocatlalli yn Neçahualcoyotzin yn Acolhuacan Tetzcoco tlahtohuani ye yuh macuilxihuitl tlahtocati yn Itzcohuatzin ye o yuh pehualloque yn Tepaneca yhuan Xochmilca auh ça no ypan in yn xihuitl yn pehualloque yn Acolhuaque ÿn Tetzcoca auh macihui yn pehualloque ca çan chicue oras yn onmanca yaoyotl ynic ceuh çan tlaquallizpan { años yn ayac tlahtocat Tetzcoco } {ynin nelli}

yn hualcallacque {Mexico} yn Tetzcoca auh çan yehuatl quichiuh Neçahualcoyotzin ynic pehualloq Tetzcoca auh in ipan xihuitl cenca ye choca yn Maxtlaton niman ic ya yn Tlachco çan moyohualpollo quinhuicac yn teyolloquanime auh yn oya Maxtlaton niman ic hualcallacq yn Tepaneca Coyohuaque yn Mexico quitoq ma tiquinmiltican ma tiquincaltican yn Mexica auh ynic hualcallacque ychcueytl ychhuipilli ychmaxtlatl chalchihuitl çan oc tepi o on teocuitlatl auh yn Maxtlaton yuh quitohua yn huehuetque ompa miquito yn Tlachco ynic aoc can nez y manel ypilhuan yxhuihuan ypampa ca yehuatl concahuilli yn altepetl yn Tepanecayotl

V Tecpatl xihuitl Nican ypan in quinpeuhque Mizquic tlaca ypan yn Itzcohuatzin auh no ypan in quinpeuhque yn Quauhquecholteca yaoyotl ynpan mochiuh ynic polliuhque

VI Calli xihuitl {ynin nelli} Nican ypan in poliuhque Cuitlahuaca yehuantin quipolloque in Mexica

VIII Acatl xihuitl {Nican ipan motlatocatlalli yn Quetzalmamalitzin in achto tlatoani mochiuh Teotihuacan }

IX Tecpatl xihuitl Nican ypan yn in Acolhuaque y Cohuatlychan tlaca yhuan Cohuatepeca yn Tetzmollocan motecato yc ompa yaque

XII Acatl xihuitl Nican ypan in polliuhque yn Quauhnahuaca yn oquimonpeuhque ce xihuitl yn tequitque tlacallaquique yn ichan tlahtohuani Ytzcohuatzin {çan on xihuitl}

XIII Tecpatl xihuitl Ypan in yn cequintin huehuetque quimachiyotia ÿn momiquillico Ytzcohuatzin tlahtohuani

Tenochtitlan auh nimân iquac motlahtocatlalli ÿn Huehue Moteuhcçoma Ylhuicamina

I Calli xihuitl Nican ypan in y momiquillico mellauac yn Itzcohuatzin tlahtohuani Tenochtitlan yn tlahtocat matlactli onnahui xihuitl yn ipiltzin ynin yn Acamapichtli auh ça niman iquac motlahtocatlalli yn Huehue Moteuhcçoma Ylhuicamina Chalchiuhtlatonac Quetzaltecolotl ynin ypiltzin yn Huitzillihuitl tlahtohuani Tenochtitlan auh yn tlahtohuani Ytzcohuatzin yn quincauhtia ypilhuan omentin ynic ce ytoca Teçoçomoctzin ynic ome cihuatl amo huel momati yn itoca auh ynîn omoteneuh Teçoçomotzin ca ytech quiz ca ypiltzîn yn Axayacatzin tlahtohuani auh yece yn Teçoçomoctzin amo tlahtocat çan tlahtocapilli catca

Auh no yquac yn ipan in xihuitl mo/¨¨¨/miquillico ÿn Mactzin Atlauhtecatl teuhctli tlahtohuani Atlauhtlan Tenanco yn tlahtocat onpohual xihuitl ypan chiuhcnahuixihuitl

II Tochtli xihuitl Yn ipan in ayac tlahtohuani catca yn Atlauhtlan Tenanco

III Acatl xihuitl Nican ypan in motlahtocatlalli ÿn Popocatzin Atlauhtecatl teuhctli tlahtohuani Atlauhtlan Tenanco ynîn çan quauhpilli auh yquac tlacat in ipan in xihuitl yn ipiltzin yn itoca Cacamatl teuhctli Xocoyotl auh ça no yquac quinmictique yn ipan in xihuitl yn Tenânca Atlauhteca yn omentin ypilhuan yn tlahtohuani catca Mactzin Atlauhtecatl teuhctli yn tlaçopipiltin ca yehuantin intech pohuia ymaxca yn tlatocayotl auh cenca tlahuelliloque ynic conmocahuillique tlahtocayotl ynic ce ytoca Yxtliltzin ynic ome ytoca

Quetzalpahintzin çan tzonhuilloque ynic micque auh no yquac yn ipan in xihuitl yn omomiquillico yn Totequixtzin Opochhua teuhctli tlahtohuani Opochhuacan Chalco Tlalmanalco yn tlahtocat cenpohualxihuitl ypan chiquacen xihuitl auh no yquac tlalpolloto yn Mexica yn Itztonpatepec Chalchiuhteuhctli yhuan Quayahuintzin yquac momiquillique Chalca ymomextin auh Huexotzinca yn temictique

VI Tochtli xihuitl {ynin nelli} Nicân ypan in tlachapolqualloc temoque chapoltin yquac no mayanalloc {mochi quiquaque in tonacayotl }

Auh no yquac yn ipan in xihuitl yn iuh quitohua cequintin huehuetque Mexica ypan in yn chiquacen tochtli yn tzintic yaoyotl y peuh yn momah ynic quinpeuhque Chalca yeomito ipan VI Tochtli xihuitl yn tzintic yaoyotl auh cenpohual xihuitl yn tzauhticatca yn Chalco auh ca yuhqui in yn opeuh yaoyotl yn quimoni/¨¨¨/huaque nahuintin yn Mexica pipiltin yn Chalco yzca yntoca yn moteuhctitlanque ynic ce ytoca Tezcacohuatl ynic ome ytoca Huitznahuatl ynic ey ytoca Huecamecatl ynic nahui ytoca Mexicatl teuhctli yn moteuhctitlanito yn tencopa ÿn Huehue Moteuhcçoma Ylhuicamina yhuan ÿn Tlacayelel Cihuacoatl /¨¨¨/ onmocnoytohuaya huehuey quahuitl yn tictocayotia huepantli yhuan huapalli yn itech monequiz ynic motlapachoz yn ical yn Huitzillopochtli auh achto quimôncaquiltitiquizque yn Tlalmanalco tlahtoque yn itoca Quateotl tlahtohuani Ytzcahuacan ynic ome ytoca Toteoci teuhctli

tlahtohuani oncan yn Acxotlan Calnahuac auh yn Amaquemecan tlahtoque yehual yn itoca Huehue Aoquantzin Chichimeca teuhctli tlahtohuan Amaquemecan Ytztlacoçauhcan ynic ome ytoca Cohuaçacatzin Teohuateuhctli oncan tlatocati yn Teohuacan Amaqmecan auh ÿn Tzaqualtitlan Tenanco Amaquemecan tlahtohuani ytoca Quauhtlehuanitzin tlayllotlac teuhctli auh yn Atlauhtlan Tenanco tlahtohuani ytoca Popocatzin Atlauhtecatl teuhctli auh yn Tequanipan Amaquemecan tlahtohuani ytoca Quetzaltototzin yehuantin in yn Chalco tlahtoque yn quincaquiltito yn inteuhctlatol yn Mexico tlahtoque auh ynic çan omocnoyttohuaya yn Huehue Moteuhcçoma yn ihuan Cihuacoatl Tlacayeleltzin yn Chalco yehica ca ycohuapan catca yn iquaquin in ayemo ytepehualpan auh yn oqu ic ayamo quimonihuaya yn inteuhctitlanhuân yn Chalco yn Moteuhcçoma yhuân Cihuacohuatl Tlacayeleltzin ca achtopa quinnotzque y nohuiân altepetl ypan tlahtoque in ya yntepehual in ya ytech pohui altepetl Tenochtitlan ca huel yhyoma yn huallaque yn omoteneuhque altepetl ypan tlahtoque quicaquico yn inteuhctlatol yn Moteuhcçoma yhuan Cihuacoatl Tlacayeleltzin auh yz ca yntoca yn tlahtoque y nican huitza Mexico ynic ce Neçahualcoyotzîn tlahtohuani Tetzcoco ynic ome Acolnahuacatl Tzaqualcatl tlahtohuani Tlacopa yn iqu ey Ytztlollinqui

tlahtohuani Coyohuacan ynic nahui Xillomantzin tlahtohuani Colhuacan ynic chiquacen Tepanquizqui tlahtohuani Tepetenchi Xochmilco ynic chicome Quequecholtzin tlahtohuani Tecpan yn çan ya ompa Xochmilco ynic chicuey Tzompan Teuhctli lahtohuani/ tlahtohuani Cuitlahuac ynic chiuhcnahui Xochitlollinqui ynîn çan no Cuitlahuac tlahtohuani ca ometicatca yn tlahtoque ynic matlactli Quetzaltototzin Mizquic tlahtohuani o ca yehuantin in yn altepetl ypan tlahtoq yn quicaquico yn inteuhctlatol yn Moteuhcçomatzin yhuan Cihuacohuatl Tlacayeleltzin nican quinnahuatique nicân quinmacaque yn intequiuh yn tle yn quichihuazque yn itech monequiz yn inteouh yn Huitzillopochtli auh ca yuhqui hin ynic tequimacoque altepetl ypan tlahtoque auh ca ça no yehuatl {yca} yn Chalco ynic omocnoyttohuaya tlahtoque Mexico auh çan ic quallanque yn Chalco tlahtoque ynic quintequitlalhuito auh ca yehica ypampa ca ayemo ytepehualpan yn Mexicatl Tenochcatl ca çan oc ycohuapan catca auh ca yehuatl in ynic peuh yaoyotl ynic hualmotzauhc Chalco ynin quallantli yaoyotl yc motlalli ca oc yehuatl ytlapehualtil ytlatzintil yn Quateotl tlahtohuani Chalco Tlalmanalco y nehuan yn Toteoci teuhctli Tequachcauhtli tlahtohuani Acxotlan Calnahuac auh yn oyuh peuh yaoyotl Niman ipan in VI Tochtli xihuitl yn momiquilli yn omoteneuh Quateotl tlahtohuani Ytzcahuacan Chalco Tlalmanalco yn tlahtocat

cenpohualxihuitl ommactlactli ypan nauhxihuitl auh yn oc cequintin huehuetque yn iuh quitohua yaopan yn momiquilli Quateotzin tlahtohuani

VII Acatl xihuitl Nican ypan in y motlahtocatlallique yn omentin tlahtoque Chalco Tlalmanalco yn itoca Amihuatzin tlahtohuani Ytzcahuacan ynic ome ytoca Chalchiuhtlatonac tlatohuani Opochhuacan

VIII Tecpatl xihuitl {Ypan in nez ÿn cozhuahuanqui ÿn tlilquemitl yn totolitipetlayo y nochpallaxochyo tilmatli omentin ÿn cihua ÿntlanextil huey choquiztica yn quichiuhq no ypan yn Moteuhcçoma yn nez }

X Tochtli xihuitl Nican ypan in yquac chicahuac cehuetz ynic mayanalloc macuilxihuitl yn atle mochiuh qualloni yc ce xihuitl in Auh no yquac yn ipan in xihuitl yn momiquilli yn itoca Chalchiuhtlatonac tlahtohuani Opochhuacan Chalco Tlalmanalco yn tlahtocat nauhxihuitl

XI acatl xihuitl Yn ipan in ic oxihuitl yn ye mayanallo yquac peuhque yn ye tequacocoyo yn ompa Chalco yhuan ynic nohuian yhuan yn tzotzopillo ye tequa yn çan nohuian quauhtla tepetla çacatla yn mihmiquito ÿn telpochtli yn ipochtli ca ça yuhqui yn huehue nacayotl mochiuh ynic xoxollochauh yn innacayo yn telpochtli yn ipochtli catca ca cenca chicahuac yn mayanalloc auh no yquac yn ipan in xihuitl ye noceppa quinyaoyahuallozquia yn Mexica yn Colhuaque yn Huexotlaca yn Quauhnahuaca yn Xochmilca yn Azcapotzalca yn Tepaneca Coyohuaque yuh quitohua tehuan yn Chalca auh ca yehuatl yc oquallanque ynic hualcohuatequitia yn nican Tenochtitlan ynic ye quihualchihua yn ical yn diablo Huitzillopochtli yhuan yn tlahtocacalli in ye quiquetza yc omoxiuhtlatique y ye cianmiqui yc oquichihuazquia yaoyotl yn inpa Mexica auh que ya no oquimolhuique çan yohuatzinco tlaquallizpân

in ye nocuel tetlan hualcallacque yn izqui altepeme omoteneuhque ynic ye no ocontzitzquique yn tequitl yn Tenochtitlan amo tehuanme ÿn Chalca auh no yquac yn ipan in xihuitl yn motlahtocatlalli yn itoca Huitzilpopocatzin tlahtohuani Opochhuacan Chalco Tlalmanalco

XIII Calli xihuitl Yn ipan in yc nauhxihuitl yn atle mochiuh qualloni no ypan in cequintin huehuetque yn quimachiyotia ynic cenpeuh yaoyotl yn ça mochipa micallia yn Chalca yhuan Mexica ynic moyaotlaya

I Tochtli xihuitl Nican ypan in yn mitohua motenehua Necetochhuilloc mayanque yn Huehuetque huel nauhxihuitl yn atle mochiuh qualloni ynic monamacaque yn huehuetque {Mexica} ynic motenehua yn quahuitl {onactiaque} yn quauhcozqui yetia ynic huicoque y nohuian yn altepetl ypan yhuan huel micohuac ynic nohuian cemanahuac yhuan oncan mochiuh ynic cenca tequaque cocoyo yn tequanime yn tzotzopillo auh ynic necetochhuiloc ynic ontlamantli mitohua motenehua netotonacahuilloc yehica ypampa ca oc cenca yehuântin yn Totonaque yn quincohuaco tlaoltica in Mexica yhuan ompan yn Cuextlan yn tlaolmamato Mexica auh yhuan oncan patihuac oncân quiyauh {ynin nelli }

II Acatl xihuitl Nican ypan in yn toxiuh molpilli yc chicuexpa yn quilpique yn inxiuh yn huehuetq Chichimeca Mexica yn ixquich yc huallaq yn ompa huallaque Aztlan Teocolhuacan yhuân yn ipan in cenca quiyauh yc mochiuh yn tonacayotl {ycpac huetz yn tlequahuitl yn Huixachtecatl } {Ypan yn in yc cepa pehualloque yn Chalca }

III Tecpatl xihuitl Nican ypan in cenca mochiuh yn qualloni yn tonacayotl yhuân cenca micohuac yn cocoliztica yhuan no ypan in ynic tlalpolloto Mexica yn Panohuayan ynic yaoyotl quichihuato yn Amaquemecan çan oc oncan hualmocuepque yn Panohuayan ayemo acito yn Amaquemecan yhuan no yquac cenca tlaquimichqualloc

IV Calli xihuitl Yn ipan in ye Huitzilmetla yhcac yn diablo yn quitocayotia Tezcatlipoca yn inteouh catca yn Tlacochcalca Chalca yn yaoyotl quintoca

V Tochtli xihuitl Nican ypan in quimanque temallacatl yn Mexico auh no yquac ypan in yn tepeuh yn Huehue Moteuhcçoma Ylhuicamina yn Cohuayxtlahuacan auh no yquac yn ipan in tlalpolliuh Tepozcollolam tlaca pehualoque auh no yn ipan in mani yaoyotl Chalco {inin nelli}

VI Acatl xihuitl Nican ypan in yn tetecoque yn Chalco Tlalmanalco pipiltin ynic ce ytoca Chichicuepotzin ynic ome ytoca Nequametzin ynic ey ytoca Totomihuatzin ynic nahui ytoca Omacatzin ynic macuilli ytoca Macuiltzin ca ompa yn Amaquemecân tetecoque ynic nechalcanonotzalloc auh ca ypampa ynic quihualtlatlatolmacaya yn Moteuhcçoma /¨¨¨/ ynic hualyayaocallaquia y nican Mexico auh yn teteo ytoca Totomitl ca Conteca auh yn teuhctlato ytoca Huehuetepoz çan chollo

VIII Calli xihuitl Nicân ypan in tepeuh yn Huehue Moteuhcçoma yn Atezcahuacan tlaca quinpeuh auh yn ipan in mani yaotl yn Chalco {ynin nelli }

pipiltin quinmamatlahuique yn Chalco Amaquemecan ynic ce ytoca Quimitzin ynic ome ytoca Xochitzin ynic ey itoca Ce Acatzin ynic nahui ytoca Macuiltzin ynic macuilli ytoca Quahuintzîn ynic chiquacên ytoca Yaotzin ynic chicome ytoca Cuicaçacatzin ynic chicue ytoca Tozmacuextzin ynin ompa yn Amaqmecan mictilloque yn ipan in mani yaoyotl Chalco

XI Tecpatl xihuitl Nican ypan in in ya cuican yn acito yn Mexica yn Chalco yn Amaqueme ycpac quimiminato yn ical Tlacatecolotl yn quimoteotiaya Amaqmeq yhuan Tzaqualtitlan Tenanco diablo ycal catca yn quimiminato çan oc oncan acico yn yn ipan ipeuhyan tecpatl xihuitl auh ce xihuitl yn cactimanca y amo necallihuac auh no ypan in yn xihuitl yn tlacat yn tlahtocapilli yn itoca Neçahualpilli ypiltzin yn Neçahualcoyotl tlahtohuani Acolhuacan Tetzcoco Auh ça no yquac tonalhuacohuac {anoço tonaltlequiyauh } ayac tocac hehecatica motzitzineuh yn {huehuey} quahuitl auh ye ytlamian in yn matlactli once tecpatl xihuitl yn ya altepetl {Chalco} yn poliuh yn quipolloto Mexican oncan achto catca yn Chalco Atenco altepetl auh ypan in ynic onmiquani ynic ompa motecato Chalca yn axcân oncân ca altepetl Tlalmanalco auh no ypan in yn quimachiyotia yn huehuetque Chalca yn momiquillique yn tlahtoque omentin ynic ce ytoca Amihuatzin tlahtohuani Itzcahuacan yn tlahtocat caxtolli omey xihuitl auh ynic ome ytoca Huitzilpopocatzin tlahtohuani Opochhuacan yn tlahtocat matlactli onnahui xihuitl yn în

y momextin oncan tlahtocatia yn Chalco Atenco auh amo nelli yn momiquillique çan ompa onyaque yn Amaquemecan ynic quintocaque Mexica yn oncân Chalco Atenco Auh ye ytlamian in ÿn matlactli once tecpatl xihuitl yn itech acito yaoyotl yn altepetl yn Amaqmecan yhuan ynic nohuian prouincias Chalco auh ca ye oxicauhca ye opanahuilloca ÿn Mexica yn ômpan Chalco auh ye chocaya y Moteuhcçoma yn ihuan Cihuacohuatl Tlacayeleltzin ya mellaquahuaya ynic ye hualmocuepaya yn Tenochca auh oquimoncahuato yeyntin tlaçopipiltin Mexica oncan yaomicque yn Acolco ynic ce ytoca Tlacahuepan ynic ome ytoca Chahuacue ynic ey ytoca Quetzalquauh ynin micque ynmac yn Chalca auh yntlacamo tecolotl quinnotzani in Mexica ynic ye no mochi cauhque ynic mocuepque ca quimilhui yn tecolotl yn Mexica ca polihuiz yaz yn Chalcayotl auh ca yehuatl ipampa yn in ye no moquichquetzque yn Mexica auh yn ipilhuan yn Quateotl tlahtohuani catca Tlalmanalco ca maltique nicân Mexico hualhuicoque yxpan yn Huehue Moteuhcçoma nican quicihuamacac ya mani yaoyotl Chalco

XII Calli xihuitl Nican ypan in in yaqui altepetl yn Amaquemecan yn connalquixtique yn Mexica ynic techpeuhque auh çan tlaquallizpan yn tocnihuan mochiuhque yn Mexica hualquiça tonatiuh yn techpeuhque ynic cen nahui altepetl Chalco Amaquemecan Tlalmanalco Tenanco Xochmilco Chimalhuacân oncan yahque yn Aoquantzin Chichimeca teuhctli yhuan Cohuaçacatzin Teohuateuhctli ynin ymomextin Amaquemecan tlahtoq

{Yc oppa poliuh yn Chalcatl II ôncexiuhtica auh no ypan în tlacat y Neçahualpilli Tetzcuco yehuatl in moneltiliz } {Ypan in momiquillico yn Ueue Chimalpilli yppan XII Calli ÿn tlahtocat años } yn yahque ompa Huexotzinco auh yn Tenanco omêntin yn tlahtoque yn yaque ompa Huexotzinco Quauhtlehuanitzin Tlayllotlac teuhctli yhuan Popocatzîn Atlauhtecatl teuhctli auh yn Tequanipan yn yahqui Huexotzinco ytoca Quetzaltototzin auh yn Panohuayan tlahtohuani ytoca Teuhctlaçocauhcatzîn Tlamaocatl teuhctli auh yn Huehue Aoquantzin Chichimeca teuhctli yhuan yn Cohuaçacatzin Teohuateuhctli yn tlahtocatque onpohualxihuitl oncaxtolli ypan ce xihuitl auh yn Quauhtlehuanitzin Tlayllotlac teuhctli yn tlahtocat onpohual xihuitl ypan chicuexihuitl yn Tenanco auh yn Popocatzin Atlauhtecatl teuhctli yn tlahtocat Atlauhtlan cenpohualxihuitl ypan exihuitl auh yn techpeuh Mexico tlahtohuani ytoca Huehue Moteuhcçoma Ylhuicamina auh ytlan tlatzôntequia yn iquac yn itoca Cihuacoatl Tlacayeleltzin auh yn oyuh techpeuh Mexicatl cenpohual xihuitl ypan onxihuitl yn cactimanca yn ayac tlahtocat yn Amaquemecân auh çan yehuantin yeÿntin tlaçopipiltin yn quipieya altepetl ynic ce ytoca Quetzalpoyomatzin ynin ypiltzin yn Huehue Quetzalmaçatzin Chichimeca teuhctli ynic ome ytoca Quauhtlaltzin ynin ypiltzin yn Temiztzin Teohuateuhctli ynic yeyntin ytoca Yaotzitzin ynin ypiltzin Aoquantzin Chichimeca teuhctli ca yuhqui tlahtocapouhticatca auh yn Tzaqualtitlan Tenanco tlahtoque yn quincauhtiaque yn inpilhuan yzca yntoca Xiuhtzin Tlalquicatzin ynin ypiltzin yn Quauhtlehuanitzin Tlayllotlac teuhctli ynic ome ytoca Cacamatzin Xocoyotl ynin ypiltzin

omoteneuh altepetl auh yn çan iyocan yn çan ixquich nican Amaquemecan ÿn mocauh maceualli ça yxquich onxiquipilli yn motlallique ynic macuilcan quiztica altepetl Amaquemecan auh ynin tlatolli y nican omotlalli ca ytech tlaquixtilli yn Chalco Amaquemecan Chronica Auh no ypan in yn xihuitl y motlallico yn Capolloac tlaca

XIII Tochtli xihuitl Nican ypan in quinpeuhque yn Tepeyacac tlaca oc yehuatl tepeuh yn Huehue Moteuhcçoma Ylhuicamina

I Acatl xihuitl {ynin ye nelli } Nican ypan in yn peuh ynic coppahuique yn ical yn diablo Huitzillopochtli yn quichiuhque in Mexica auh ça no ypan in yn xihuitl yn quinpeuh yn Huehue Moteuhcçomatzin yn Tlatlauhquitepeca polliuhque {ynin nelli ypan }

III Calli xihuitl Nican ypan in mellahuac yn momiquillico yn Huehue Moteuhcçoma Ylhuicamina quitotia yehuatl tlahtocatiz yn Axayaca yn tlahtocat Moteuhcçomatzin cenpohualxihuitl ypan chiuhnauhxihuitl auh çan macuilxihuitl yn imacehualhuan mochiuhq Chalca auh ça niman ye omotlahtocatlalli yn Axayacatzin ynin ypiltzin yn tlahtocapilli Teçoçomoctzin auh ye cuel yxhuiuh yn Itzcohuatzin yn Axayacatzin auh yn oqu ic ayamo motlahtocatlalliaya yn Axayacatzin auh yehuatl quixquetzaya tlahtocatizquia ce ypiltzin yn Huehue Moteuhcçoma ytoca Yquehuac ynic ome quixquetzaya ytoca Machimalle auh yn onmotlahtocatlalli yn Axayacatzin niman no quicocollique oquinamoxque yn intlacallaquil yn Cohuayxtlahuaque

yhuan otlanamoxque yn innanhuan yn tecpan cihua otlaquixtique auh yn onezque yc ocholloque yaque yn campa opollihuito yc oquipolloque yn inpillo yn înmahuiço auh yn quinchiuhtehuac yn ipilhuan yn Huehue Moteuhcçomatzin Ylhuicamina chicueyntin çan cen yn oquichtli ye omotocateneuh ytoca Yquehuac inic ome ytoca Chichimeca cihuatl auh yn oc chiquacemin çan moch cihua amo huel momati yn itoca Auh yn ipan in xihuitl yn oquihualma yehuatl Moquihuixtli tlahtohuani Tlatillolco yn onmotlahtocatlalli Axayacatzin yn Tenochtitlan niman quito cuix oquichtli ypan ninocêntlalliz nicmomoyahuaz in Mexicatl yn Tenochcatl auh niman ic ôntenotz yn Moquihuixtli yn Huexotzinco yn Quaochpanco yn Matlatzinco ynic toca necentlalliloc yn Tenochca

IV Tochtli xihuitl Nican ypan în polliuhque yn Cuetlaxteca oc ypan yn in peuh yaoyotl yn Huehue Moteuhcçomatzin Ylhuicamina auh yehuatl quitlamico in Axayacatzin auh ça no yquac yn ipan in xihuitl yn tepeuh yn Axayacatzin yn itocayocan Totonacapan Quaxoxouhcan {Ynin nelli ypan }

V Acatl xihuitl Nican ypan in pehualloque Xochitlan tlaca yehuatl quinpollo yn Axayacatzin Auh ça no ypan in yn xihuitl yn quinpeuh yn Axayacatzin yn Tepeticpac tlaca y Tonalli ymoquetzan tlaca y Maçahuaq in ye motenehua Xiquipilca {Qtzalmamalitzin nican quipalehui yaoc yn Axayacatzin yn Maçahuacan }

Auh yn in yn oquimonpeuh yn Axayacatzin yn Tepeticpac tlaca yn Maçahuaque auh niman n ic oncallac yn Michhuacan yn Axayacatzin ynic oquinpehuato yn Tlacimalloyan

tlaca oquito yn Axayacatzin çan niman tacizque yn Michhuacan ompa otemac huehuetzito yn huehuetque yn Mexica ompa oyxpollihuito otlamito yn Quauhhuehuetque yn Yaotzin yn Quahuehuetzin yn Huitznahuatl yn huehuetque yn pipiltin ypan ÿn tlahtohuani Michhuacan yn itoca Camacoyahuac yquac pehualloque

VI Tecpatl xihuitl Nican ypan in yn momiquillico y Neçahualcoyotzin tlahtohuani Acolhuacan Tetzcoco yn tlahtocat {cenpohual} onpohualxihuitl ypan onxihuitl auh ça niman iquac motlatocatlalli yn ipiltzin ytoca Neçahualpilli tlahtohuani Acolhuacan Tetzcoco

VII Calli xihuitl Nican ypan in ipan yn pehualloque Chiapan tlaca Auh no ypan in yn xihuitl yn iquac polliuhque Tlatillolca {yn in nelli ypân} amo huecauh yn quimonpeuh Axayacatzin ca moquichnenequia yn Moquihuixtli tlahtohuani Tlatilolco ynehuan yn itoca Teconal ÿn tlacamo yehuatl Quaquauhtzin yn ipan tlato ca huel popolihuizquia auh yn oyuh pehualloque Tlatilolca yc no poliuh yn tlahtocayotl auh çan tlaquallizpan quihuallalique yn onpoliuhque ya yquac ÿn quin yacac in tlatoltique Tlatilolca auh in yehuatl Moquihuix y teocalticpac tlecoque yhuan yn itepotzo yquetzalpatzac yn comaquiticaca ycpac yn ical yn intlacatecolouh ÿn quimoteotiaya Tlatillolca yhuân yn itepotzo auh ynic ompa ycpac tlecoque yn inteocal ompan tlecohuayan ynic tlayxnamiquia auh ompa ynpan tlecoque yn Mexica Tenochca ompa quinhualmimilloto quihualmayahuito yn Moquihuixtli yhuan itepotzo auh çan no Tlatillolco ychan ytoca Quetzalhua

yn quihualmimillo auh no ypan in yn xihuitl yn peuhque Chalca yn ya hualtequiti Mexico Tenochtitlan

{Yn ipan VIII Tochtli xihuitl ihcuac ompa Maçahuacan yaoc temac huetzca yn Axayacatzin auh yehuatl quimaquixti in Quetzalmamalitzin tlahtohuani Tihuacan yaoc quiquixtito }

VIII Tochtli xihuitl {Ypan in poliuhque Matlatzinca } Nican ypan in quichihuazquia yaoyotl yn Huexotlaca

IX Acatl xihuitl Nican ypan in quinpeuhque Tollocan tlaca Matlatzinca yehuatl tepeuh yn tlahtohuani Axayacatzin yhuan yquac tlallolin cênca totocac miyec yn tepetl xixitin yn huihuiton auh moch papachiuh yn calli {tlallolin}

X Tecpatl xihuitl Nican ypan in in polliuhque yn Ocuilteca yhuan Chontalcohuatlan tlaca yehuatl tepeuh yn Axayacatzin auh çan no yquac quinpeuh yn Quauhnahuac tlaca auh no ypan in yn cequintin quitohua yn qualloc tonatiuh Ynin nelli ypan Ocuilteca poliuhque {Ynin nelli ypan poliuhq ÿn Quauhnahuaca }

{ynin nelli Ypan in XI Calli xihuitl ÿn motlahtocatlalli Matlaccovatzin tlahtohuani Hecatepec xihuitl yn quauhtlatoloc ypan i pehualloq Tullocân tlaca yn iuh quitohua oc cequîntin vehuetq Mexica }

XII Tochtli xihuitl Nican ypan in polliuhque Calliymanyan tlaca Matlazinca {vel ynomah ompa huiya yn Axayacatzin micallito} auh oc cequintin huehuetq quimachiyotia ypan in yn pehualloque yn Xiquipilca Tollocan ynahuac {Xiquipilca poliuhque }

XIII Acatl xihuitl Nican ypan in mellahuac yn poliuhque Xiquipilco tlaca oncan quimetzhuitecque yn tlahtohuani Axayacatzin cenca iquimahuiztlalli yn altepetl Xiquipilco yhuan yquac quallac tonatiuh moch nezque in cicitlaltin

Auh çan no yquac quinpeuhque Tochcalco tlaca auh no yquac yn ipan in xihuitl yancuica cuicaco ÿn nican Mexico yn Amaquemeque yehuatl quehuaco yn cihuacuicatl quicuicatico yn Axayacatzîn

tlalli quixotlac yn Axayacatzin yn Chalco Amaquemecan ytocayacân Xocoyoltepec yhuan Oztoticpac yntech pouhqui yntonal yn Mexico tlahtoque catca auh no yquac tlamato Ahuilliçapan yn Neçahualpilli tlahtohuani Tetzcoco yn cacito ça no tlahtohuani auh ça no ypan in yn xihuitl in momiquilli yn Tlaçolyaotzin tlahtohuani Huexotlan auh çan niman n iquac motlahtocatlalli contlallique yn itoca Cuitlahuatzin tlahtohuani Huexotlan

II Calli xihuitl Nican ypan in momiquillico yn Axayacatzin yn tlahtocat Tenochtitlan matlactli omey xihuitl auh yn quincauhtia yn ipilhuan caxtolli omome ynic ce ytoca Tlacahuepan Xocoyotl tlahtohuani ynin amo huel momati campa yn tlahtocatito auh ynic ome ipilhuan Axayacatzin ytoca Teçoçomoctli {Acolnahuacatl} /Xocoyotl ynic ey ytoca Tiçoçic ynic nahui ytoca Ahuitzotl/ ynic macuilli ytoca Yxtlilcuechahuac tlahtohuani ynin amo huel momati campa yn tlahtocatito auh ynin Yxtlilcuechahuac yn ihuan /Ahuitzotzin {Huehuetlacahuepan} ca ça ce/ ynnantzin yn imomextin yn cihuapilli yn innântzin ytoca Mizquixahualtzin ynin Tollancihuapilli ompa hualla ca ya ytlacamecayo yn tlacpac omotocateneuh yn Cuitlachtzin yn ompa tlahtocatito Tollam yn ipiltzin Acamapichtli auh ynic chiquacen yn ipilhuan yn Axayacatzin ytoca Macuilmallinal ynic chicome ytoca Moteuhcçoma Xocoyotl ynic chicuey ytoca Cuitlahuatzin ynic chiuhcnahui ytoca Matlatzincatl

{Auh quin huel yehuatl quipeualti yn Tiçoçicatzin yn ical Huitzilopochtli ca çan oc centlacol ÿn quichiuh ÿn Tiçocicatzin }

ynic matlactli ytoca Yopihuehuetl ynic XI ytoca Coyoltzillin ynic XII ytoca Cecepatic ynic XIII  ytoca Teoyohualpachohua auh yn oc macuiltin amo huel momati yn itoca tlahtocapipiltin auh yn oyuh momiquilli Axayacatzin çan niman iquac motlahtocatlalli yn {itiachcauhtzin} /yn ipiltzin/ yn itoca Tiçocicatzin tlahtohuani Tenochtitlan auh yn quitocatehuac tonacayotl yn Axayacatzin ayocmo yehuatl quiqua yn mochiuh Chalco Xocoyoltepec ya yehuatl quiqua /in ipiltzin/ {in itiachcauhtzin} yn Tiçocicatzin

III Tochtli xihuitl Ypan in yn cequintin huehuetq quimachiyotia y motlahtocatlalli yn Tiçocicatzin auh no yquac yn ipan in xihuitl yancuica quintequiuhti tlahuillantli yn Chalca yn Tiçocicatzin ompa mohuillan yn Popocatepetl inacaztlan ytocayocan Xochiquiyauhco ynin huelhuey quahuitl yn mohuillan Auh no yquac yn ipan in xihuitl callaliloque ÿn Huexotzinca cenca tlahuelliloque catca oc tehuânme tepeuhque yn Tzapotzan yn Tochpan auh oquitoque tacizque yn Anahuac atle ypan tiquittazque yn quexquich auh oquito yn Tiçocic oquimilhui yn tlahtoque tlaxihualhuian yn antlahtoque ma quenmanian topan yaotlahtoti auh niquitohua y nehuatl ca ninonoz yn tençacatl yn tlalpilloni yn nacochtli

Auh yn oquicacque yn omononotzque tlahtoque Mexica niman nonpeuhque yn oquincâllalique auh ompa xaxamacaya ompa onixpollihuia yn teteuhctin yn tlahtoq

ompa oquicuia yn pipiltin yn tençacatl yn xoxouhqui yn coztic yn iztac tençacatl auh yn tlaçotilmatli o yhuin in callaliloq Huexotzinca

IV Acatl xihuitl Nican ypan in quitetzonmanque yn ical catca yn diablo Huitzillopochtli Cozcaquauhtenanca Tlaollan tlaca yn inca momamal auh no yquac yn ipan in xihuitl yn oyxpollihuito yn Quauhnahuaca yn ompa Atlixco cenca miyec yn ompa yaomiquito çan ninneyxcahuil mochiuh yn Quauhnahuaca yn yaoyotl

V Tecpatl xihuitl Nican ypan in temictique yn Matlatzinca quinmictique ÿn Mexica yn calpixque yhuan cihuatequitque ypampa yn tlacallaquilli auh yquac nican hualcallac yn Chimalteuhctli tlahtohuani Callixtlahuacan nauhxiuhtico yn Mexico auh ça no yehuatl oquihuaque yn onocacito yn imaltepeuh quin yehuatl quitlequechito yn inteocal catca yn Callixtlahuaque auh no yquac ypan in xihuitl tlamato yn Neçahualpilli tlahtohuani Tetzcoco yn Huexotzinco yquac cacic yn itoca Xocoyotl Huehuetzin tlahtocapilli ompa yteyccauh yn Toltecatl teocuitlahuehuetl yn itlahuiz hualmochiuhtia yn Neçahualpilli auh ça no teocuitlahuehuetl yn itlahuiz hualmochiuhtia yn Huehuetzin yn Huexotzinco Auh no ypan in yn xihuitl yn macuilli tecpatl de yn ocallac yn intlahtocatecpanchantzînco yn tlahtoque Reyes Don Fernando yhuan Doña Isabel tlahtoque yn Castilla auh yehuatl yn itoca Don Christoval Colon yn callac tecpan

 ynin amo español amo huel oncan ychan yn España auh ca ye ompa chane ompa huallehua yn itlahuillanalpa ym apan yn altepetl yn motenehua Genova yn altepetl ytoca Neruy yn in huel oncan ychan yn Christoval Colon ynin huey tlalmatini in yhuan hueyamatini ynic mitohua motenehua cosmographo ca mochintin quinmachtiaya yn atlan nemia yn marineros Auh ypan in yn xihuitl yn oquipehualti in ye quinmitlanillilia inhuellitzin yhuan yntepallehuillitzin yn tlahtoque Don Fernando yhuan Doña Isabel ynic huallaz nican ypan Nueva España ynic quinextiquiuh yancuic tlalli yn intechtzinco pohuiz tlahtoque España auh yece amo niman iciuhca quimomaquilliq yn inhuellitzin maço nellihui yn tetech quimocahuilliaya tlahtoque ynic quittazque quinemillizque yn tle yn quitlani yn aço huel mochihuaz auh yece amo no huel quittaya quinemilliaya yn intech quimocahuilliaya ÿn tlahtoq ynic ça no ye quitlacohuaya quitzaqua ÿn tlatollli auh ynic on tlamantli ynic amo yciuhca quimomaquilliq yn inhuellitzin tlatoque ynic huallaz nican ca yehica ypampa no yquac mania yaoyotl yn ipan in xihuitl yn ompa Granada ynic çan quilhuiq ma oc tlami ma oc tzonquiça yn yaoyotl Granada auh niman mitoz mottaz yn monetequipachol yehica ypampa oc cenca pollihui yn tomin auh ynic moyolleuh ynic cenca quinec

huallaz yn quinextiquiuh tlalli nican auh yuhqui in nenemia {ce tlacatl} yn ipan hueyapan yn quinenemiltia huey acalli {calachixqui} auh yece yn itoca amo huel momati yhuan campa tlacat amo huel mellahuac momati auh cenca chicahauc yn ipan hualla yn ahehecatl huallitztia tonatiuh yquiçayampa auh cenca huecauhtica yn manca yn ahehecatl ynic amo huel omotzicoque cana auh yca yn inemachilliztica yn oquinhualhuicac acico yn oncan ycallaquiampa tonatiuh auh ypampa yc quittaco yn atentli yhuan yn tlalli nican ypan yâncuic cemanahuac auh yuh quitohua yn ipohualloca ynin tlatolli yn tlacatl yn anenemia acaltica amo quiz amo can amo ypan moquetzaco yn tlalli çan quihuallitac auh yc no ceppa mocuep auh maço nellihui yn ye no cuel huecahuac yn atitlan ya ompa yn tonatiuh yquiçayampa auh ynic cenca huecahuac in ipan in ynetequipachol ynic anene ynic huecahuac yhuan ypân quiz ypan mochiuh hueymayanaliztli apizmiquiliztli auh ynic ompa atenquiçato yn atenco ytocayocân Madera yn oncan acito ça quexquichtin yn momaquixtiq cenca mochtin mococohua ynic mochintin momillique Auh oncan catca yniquac yn ipan omito omoteneuh atentli yn Don Christoval Colon ye omoteneuh huey tlamatini yn itechpa tlalli yhuân yn atl yn quenin ca auh ynin yn queni yn iuh oquimittac yn cênca yntech tlamonequi yn cênca motollinitihuitze ynic quihualhuica

acalli yc quicentlalli quinpapaquilti yn ichan yn quinenemiltiaya acalli auh ynic yehuatl yn queni yc huitz yn aocmo chicahuatihuitz onmomiquilli ça quexquichcauhtica auh yn oqu ic ayamo momiquilliaya ynic cenca quihuellamachtiz yn oquimocallotilli yhuan ynic oquipallehui ynic quicnelli yn oquimomacehui auh yehuatl ynic quimacac amatl yn çan no yehuatl oquichiuh yehica ypampa ca cenca huey no amatini oncan quicuillo yn quenin caca tlalli yhuan yn ipan yn ixquichtlamântli quittac yn huell oquinemilli ynic oquittac ynic yehuatl Don Christoval Colon huel quipaccacelli yehica yn iuh omito omoteneuh ca çan no yuhqui yn itequiuh ynic nemia ynic moyolleuh ynic quilnamic yn quinextiquiuh yancuic tlalli ynic niman mononotzque mixtlatique yn imochtin oc cequintin tlaca huey tlamatinime atitlan yn iuhqui yhuellitilliz Auh ynic oquilnamic yn quitemoz yn intepallehuiliz yn aca ceme tlahtoque Christianos ynic yca yntoca monextiz yn tlalli yâncuic Auh yece ye omito yn iquaqu in huell oqu ipan nemia yn tlahtohuani Don Fernando Rey yn yaoyotl yc manca yn Granada auh yehuatl ypampa ynic mieccampa tetlatlauhtito ynic amo çan nen nemiz quitlatlauhtito yn Portugal tlahtohuani Don Juan Segundo amo quinec auh no quitlatlauhtito yn tlahtohuani

Rey Ingalaterra amo no quinec yhuân oc omentin Duques yn intech mocahuaya amo noquinecque yehica ypampa yn iuh quittaya yn çan motollinicatzintli yc atle ypan quittaque ynic çan tepan yehuantzitzin yntech mocauh yn tlahtoq España Don Fernando yhuan Doña Isabel catolicos ynic quimopallehuilique yn itechpa yn quellehuiaya ypan in yn xihuitl quipehualti yn ya quitlani yn intepallehuillitzin yhuan ynhuellitzin ÿn tlahtoque Castilla

VI Calli xihuitl Nicân ypan in yn miquico yn Quauhpopocatzin tlahtohuani Cohuatlychan auh çan niman yquac motlahtocatlalli yn itoca Xaquintzin tlahtohuani Cohuatlychan yhuân quitohua yquac yc oppa tlalpolloq yn Mexica yn Matlatzinco yhuân Maçahuacan

VII Tochtli xihuitl Yn ipan in xihuitl ye o yuh ye nepa cenpohualxihuitl ypan onxihuitl pehualloque yn Chalca ynic mochi Amaquemecan ynic ye no ni cuel motlallique tlahtoq yn Amaqmecan yhuan Tlalmanalco ye omito cenpohual xihuitl ypan onxihuitl yn cactimanca yn ayac tlahtocat yn Amaqmecan auh yeyntin yn omoteneuhque yn tlacpac yn tlapiaya pipiltin yn quipiaya altepetl in ixquichcauh yn aoc ac tlahtohuani catca ynic ce ytoca Quetzalpoyomatzin ypiltzin yn Huehue Quetzalmaçatzin ynic ome itoca Quauhtlaltzin ypiltzin

Temiztzin ynic ey ytoca Yaotzitzin ypiltzin Huehue Aoquantzin auh yn Tlalmanalco yn tlapiaya yn iuhqui tlahtocapohuia ytoca Xaltemoctzin tlacuillo teuhctli ynic ome ytoca Yaotentzin auh yn tlahtohuani Tiçocicatzin oc yehuatl quilnamic yn tlahtocayotl Chalco quintemo yn tlahtocatepilhuan oc yehuatl quintlallitehuac yn Amaquemecan tlahtoq yn itoca Toyaotzin Chichimeca teuhctli mochiuh yhuan yn itoca Cacamatzin Xocoyotl Teohua teuhctli mochiuh ynin tlahtoq Amaqmecan auh yn Tlalmanalco quintlahtocatlalli ynic ce ytoca Ytzcahuatzin tlatquic Itzcahuacan tlahtohuani ynic ome ytoca Yaotentzin tlahtohuani Opochhuacan auh yn Tepetlyxpan ytoca Quetzaltototzîn auh yn o yuh motlahtocatlallique yn tlahtoq Chalco oc nahuilhuitique yn nican Mexico yn moteuhcçauhque auh niman yc onehuaque yaque oc concauhtiaque yn Tiçocicatzin auh çan imicampa yn onmomiquilli Tiçocicatzin yn tlahtocat Tenochtitlan chiquacen xihuitl auh ye acalco hui yn Chalco tlahtoq yn quihualmatque omomiquilli yn tlahtohuani Tiçocicatzin auh ynin Tiçocicatzin oc no yehuatl quitlatocatlallitehuac yn itoca Huitznecahualtzin tlahtohuani Acxotlan Chalco ynin ypiltzin yn itoca Atlauhtzin Tequachcauhtli auh ye yxhuiuh yn Toteoci teuhctli catca auh ca

yxiptla mochiuh ynin yn Iztaccoyotzin yn Tequachcauhtli catca auh yn o yuh momiquilli yn Tiçocicatzin auh çan niman iquac motlahtocatlalli yn iteyccauh ytoca Ahuitzotzin tlahtohuani Tenochtitlan ynin çan no ypiltzin yn Axayacatzin auh yn quincauhtia ypilhuân yn tlahtohuani Tiçocicatzin matlactli omome ynic ce ytoca Yaotzin ynic ome ytoca Amaquemetzin ynic ey ytoca Ymactlacuia ynic nahui ytoca Tezcatlpopoca ynic macuilli ytoca Mauhcaxochitl auh yn oc chicome amo huel momati yn intoca tlahtocapipiltin auh yn Chalco Amaqmecan tlahtoq yn Toyaotzin Chichimeca teuhctli yn ihuan Cacamatzin Teohuateuhctli yn onmotlallito yn intlahtocayopan niman ye mononotza yn aquin tlahtocatiz ÿn Tzaqualtitlan Tenanco yhuan Tequanipan yhuan Panohuayan yhuan yn Atlauhtlan yn izquican in auh yn omononotzque yn oquînpepenque yn aquique tlahtocatizq oncan yn ipan omoteneuh izqui altepetl Amaquemecan auh yc niman quinhualtitlanq y nicân Mexico yn ixpa tlahtohuani Ahuitzotzin auh ye onneciz yn intoca

VIII Acatl xihuitl Nican ypan in omomamal yn teocalli yn ical catca tlacatecolotl Huitzillopochtli auh yn oncan yn omicque yn mamaltin yn inca momamal Tziuhcohuaca yhuan Maçateca yhuan Tlahpaneca ynic ye mochi yn mamaltin yn otzetzelliuhtoca y nohuiân yn altepetl ypan y nican Mexico yn Tlalhuactlipan yn Chinampa yn Acolhuacân yn Matlatzînco

yn mamaltin yn ye mochi quinnechicoque yn quincentlallique yn mocenpouhque on xiquipilli Tzapoteca yexiquipilli yn Tlahpaneca onxiquipilli yn Huexotzinca auh yexiquipilli Tziuhcohuaca ypan centzontli ypan matlacpohualli anoço matlactecpantli mitohua auh ca yxquichtin in yn tzetzelliuhtoca yn pieloya y nohuiân yn altepetl ipan yntech yahualloticate

{Ynin nelli yuan yn ôncan micque yn tlahtoq yn ica ilhuiuh quiz ÿn Huitzillopochtli yn inca momamal yn altepetl yteocal Huitzilopochtli Mexico ÿn tlahtoque yehuantin in Cozcaquauhtenânca Tziuhcohuaca Quauhnahuaca }

IX Tecpatl xihuitl Nican ypan in iquac quinpeuhq Tziuhcohuac tlaca yhuan Tetzapotitlan tlaca auh no yquac yn ipan în xihuitl yn huallaque yn quihualhuicaq nahuintin pipiltin yn Chalco Amaquemecan yn quimixpantico yn tlahtohuani Ahuitzotzin ynic yehuatl quinmacaz tlahtocayotl ynic ce ytoca Xiuhtzin Tlatquic ynin ypiltzin yn Quauhtlehuanitzin Tlayllotlac teuhctli tlahtohuani catca Tenanco ynic ome ytoca Huehueyotzintli ynin ypiltzin yn Cacamatzin Teohua teuhctli tlahtohuani Amaquemecan auh yn iqu ey amo huel momati yn itoca yehica camo tehuan tlayxquetzalli tlapepentli ca ça tlahantli ca çan yehuantin yn omotocateneuhq omêntin yn tlapepenaltin yn tlayxquetzaltin ce tlahtocatizquia Tlayllotlacan Tenânco ynic ome ompa tlahtocatizquia yn Atlauhtlan Tenanco auh ynic nahui yn ompa huallaque Amaqmecân ytoca Quauhcececuitzin Panohuayan tlahtocatiz Auh yn o yuh quimittac yn Ahuitzotzin niman quinmacac yn tlahtocayotl auh yece

ça ce motlalli tlahtohuani yn Tzaqualtitlan Tenanco ytoca Huehue Yotzintli Tlayllotlac teuhctli mochiuh ynin ypiltzin yn Cacamatzin Teohua teuhctli auh yhuan omentin yteuhctlatocahuan ynic mochintin quintlalli Ahuitzotzin ynic ce ytoca Xiuhtzin Tlatquic Tlayllotlac teuhctli ye omito tlacpac ynin ypiltzin yn Quauhtlehuanitzin ynic ome teuhctlato ytoca Atlauhtecatl teuhctli auh ynic ça ce quitlalli Ahuitzotzîn yn tlahtohuani Tenanco yehica ypampa ca çan ic ce altepetl yn Atlauhtlan ça ce tecpacalli quipiaya yn achto yn omentin tlahtoque catca auh yehuatl quipollo yn Ahuitzotzin yn Atlauhtlan tlahtocayotl ynic ça teuhctlato contlalli ompa yhuan Tlayllotlacan ca ça tlanepantla catca yn tlahtohuani Huehue Yotzintli auh ynin Huehue Yotzintli amo no huel yehuatl ynemac yaxca yn tlahtocayotl Tenanco auh ca huel yehuatl yn yaxca ynemac catca yn tlahtocayotl yn Xiuhtzin Tlatquic yn ipiltzin tlahtohuani Quauhtlehuanitzin Tlayllotlac teuhctli ca yehuatl tlahtocatizquia yn Tlayllotlacan Tenanco auh ynic yehuatl motlahtocatlalli Huehue Yotzintli ca çan n in tlatlatlauhtiliztica yhuan yn tepopolloliztica yn ittatzin Cacamatzin Teohua teuhctli yn ihuân Toyaotzin Chichimeca teuhctli ynic cênca ye huellitia yn ixpan Ahuitzotzin ca nel achto motlahtocatlallico y nican Tenochtitlan auh

no yehica ynic ça ce motlalli tlahtohuani Tzaqualtitlan Tenanco ypampa yn tlacoxeliuh macehualli yn iquac ompa yc tepehuato ÿn Huehue Moteuhcçoma Ylhuicaminatzin yxquich yn yaopan mic auh no yxquich yn quinhuicaq tlahtoque Quauhtlehuanitzin Tlayllotlac teuhctli yhuan Popocatzin Atlauhtecatl teuhctli ynic ompa yaque Huexotzinco auh no yxquich yn campa tepan moyahuac macehualli yn altepetl ipan yaque auh ca ça yuhqui yn altepetepiton yc onmotlalli Tzaqualtitlan Tenanco ynic ca ce tlahtohuani ommotlalli oncan auh yn Panohuayan yehuatl motlahtocatlalli yn itoca Quauhcececuitzin Tlamaocatl teuhctli mochiuh auh ynic motlahtocatlallique ye o yuh nepa exihuitl tlahtocati yn Ahuitzotzin auh no yhuan ye yuh nepa cenpohualxihuitl ypan exihuitl ye yn altepetl yn Chalcayotl yhuan ynic cactimanca yn ayac tlahtocat Tzaqualtitlan Tenanco yhuan Panohuayan auh no yquac chapolqualloc toctli yn Chalco yuhqui yn mixayahuitl anoço yuhqui yn mixtli ynic tetzahuac ynic huia auh yuh mito yuh moma ycpac hualquizque yn Popocatepetl auh yn o yuh quintlahtocatlalli yn Ahuitzotzin yn Chalco tlahtoq yn Huehue Yotzintli Tlayllotlac teuhctli yhuan Quauhcececuitzin Tlamaocatl

teuhctli yhuan yn omentin teuhctlatoque ynic yaque Chalco ca quincahuato y nohuian tlahtoque altepetl ypan yn Tlacopan yn Coyohuacan yn Colhuacan yn Xochimilco ynic cen chinanpanecatl quincahuato yn Chalco tlahtoque ynic quinmahuiçotique

X Calli xihuitl Nicân ypan in tlallolin yhuan yquac ye no quinpeuhque yc oppa yn Tlapantzinca yhuan Totoltenanco tlaca yhuan Atlchayahuacan tlaca yn oxihuitl macuilcan yn tepeuh yn Ahuitzotzin yhuân no yquac monexti yn quitocayotitiaque huehuetq moyohuallitohua auh no yquac in ipan in xihuitl quiz in itocatzin Temaçatl yn Quauhnahuac auh ompa yn mac huetzito in Xochmilca ômpa quitetecque

XI Tochtli xihuitl Nican ypan in teciuh moch micque in mimichtin yhuan yn ixquichtin atlan chaneque yn atlan onoque auh no yquac quinpeuhque Quauhtepec tlaca

Auh no yquac yn ipan in xihuitl tlamato y Neçahualpilli tlahtohuani Tetzcoco yhuan tlamato yn Totollapaneca yn Huexotzinco yn ye mochi Huexotzinca yhuan Coçolteca yn mamaltin quintemacac yn Ahuitzotl yn ompa Quauhnahuac ynca momamal yn diablo ycal auh no yquac yaomiquito Atlixco yn Ilhuicaminatzin tlahtohuani Xochmilco auh niquitohua oc ceppa ypan în pehualloq Huexotzinca

XII Acatl xihuitl Nican ypan in tlachapolqualloc temoq chachapolme yhuan yquac quinpeuhq Yztac Tlallocan tlaca

yquac yn mayanaloc netotonacahuilloc ye no cuel oc no ompa tlaolmamalloto yn Cuextlan yhuan yquac qualloc tonatiuh auh no yquac quinpeuhq Acatlan tlaca

Auh no yquac yn ipan in xihuitl yx xitin yn Chalco Amaqmecan tepetl yn quitocayotia Yxmatlatzin ynin nepantla actica Yztac cihuatl yhuan Popocatepetl auh cenca miyec yn quiçaco atl ynic yx xitin tepetl no yhuan cenca miyequintin nezque yn tequanime cenca miyequintin quimquaque pipiltzitzintin auh ca no yquac tlacat yn ipiltzin Cacamatzin Teohua teuhctli tlahtohuani Amaqmecan yn ipiltzin ytoca Quetzalmacatzin teonca yn iuhqui yntoca auh yn çatepan yn iquac acico yn itlanextzin yhuan yneltococatzin tt Dios ynic moquatequi ytoca n Don Thomas de S Min Chichimeca teuhctli mochiuh auh no yquac tlacat yn Aoquantzin çân no teonca yn iuhqui yntoca auh no yquac yn ipan in xihuitl motlahtocatlalli yn Miccacalcatl tlahtohuani Tequanipan Chalco Amaqmecan Chichimeca teuhctli mochiuh quin icel yn iuhqui ytoca mochiuh ompa yn in Mexicatl ompa contlahtocatlalli yn Ahuitzotzin tlahtohuani nican Tenochtitlan

Auh no yquac yn ipan in XIII Tecpatl xihuitl yn tlamico yaoyotl yn Granada yc niman quimomaquillique yn inhuellitzin yn tlahtoq Don Fernando yhuân Doña Isabel

Reyes España yn Don Christoval Colon yn quimomaquillique ey yn Castilla acalli tlayaochichiuhtli yhuan chiquacenpohualli yn itehuicalycnihuan Españoles tlaxtlahuilloque yhuan mochi ynixquich acalco monequiz yhuan yc quitocamacaque ynic General hualmochiuhtia ca quinhualpachotia yn Españoles Auh ynic ompa huallehuaq ynic hualquizque ynic hualmacallaquiq yn oncan neacallaquilloyan ytocayocan de Palos de Noguel ypan viernes yc mani metztli Agosto yn ipan omoteneuh xihuitl auh yc niman ypan hualquizque yn tlalli yn itocayocan en La Gomera auh ynic onpa quihualcenmatque ynic ohualhueyapannenenque ynic ohuallaque yn tonatiuh ycallaquiânpa yatihuitze hueyanentihuitze ya huecauhtica ye achi quexquichcauhtica ynic cênca nentlamattihuitze ynic cênca hueca ynic amo huel neltilliztica yn amo huel mellahuacatica ynic nenemi huey apan auh ypan viernes ynic mani metztli otubre yn çan ya ypan xihuitl de ye ometzillini yn ye tlatlalneci tlahuizcalpan yn quinextiq tlalli ynic mochintin mopapaquiltique ynic cenca moyollalique ynic ohuacico ye ypan tlacatli ynic quitlamellahualtique yn acalyacatl yn tlaltenco ynic oncan ohuacalquizque yn atenco ytocayocan Guanahami oncan huallehuaq oc ceccan oyaque niman n ic ocallaquico yn oncan ça no acalquixohuayan yn itocayocan Sanctiago de Cuba yhuan oncan motecaque motlallique

anoço motlallico yn oncan atenco yn itocayocan Haiti ca ye oncan yn Sancto Domingo yhuan yn çatepan yn oquiximatque yn oc cequi atentli yn quiyahuallotoc auh yc quicauh oncan Don Christoval Colon yn Capitan ytoca Diego de Arana ytlan quincauh cenpohualli oncaxtolli ypan ey yn Españoles ynic quicaquizq oncan tlatolli yhuan yn tle yn motlatitoc yn ipan tlalli auh ynic yehuatl niman mocuep yn ihuan oc cequintin ycnihuan Españoles yhuan matlactin yn macehualtin quinhuicac yhuan cequi yn tle ÿn mochihua yn ipan oncan tlalli yhuan yn inexillo coztic teocuitlatl yn Castilla ynic ompa onacic ypan Viernes ynic caxtolilhuitl mani metztli Março

I Calli xihuitl Nican ypan in quinpeuhque Xicochimalco tlaca auh çan no yquac quinpeuhque poliuq yn Xaltepeca yhuân Totomihuaque {Ynin nelli ypan poliuhque yn occan }

Auh ça no yquac yn ipan in xihuitl yn momiquilli ytoca Yaotentzin yn tlahtohuani Opochhuacan Chalco Tlalmanalco yn tlahtocat chicue xihuitl auh no yquac yn ipan in xihuitl ynic mocuep don Christoval Colon yn ompa España quinhuicac yn ocequintin ycnihuan Españoles yhuân matlactin macehualtin yhuan cequi yn tle yn mochihua oncan ypan tlalli yhuan quiteyttito quitenextillito yn coztic teocuitlatl yn Castilla ynic ompa acito ypan Viernes ynic caxtolilhuitl mani metztli Março yn ipan omoteneuh xihuitl de  Auh huel qualli

yc quihualmonamiquilliq in yehuantzitzin tlahtoque Reyes Don Fernando yhuan Doña Isabel catholicos auh cenca mopapaquiltique yn ipampa yn itenonotzalliz ymixpantzinco quitlalli quinmocaquiltilli ynic nimân cenca tepan cahuan tepan actimotecac ynin in ynic mochi nohuian España auh in yehuantzitzin tlahtoq Reyes cenca quimomahuiztillilique yn Don Christoval Colon yhuân yc nimân quimomaquilliq yancuic tocaytl ynic ytoca Almirante de las Indias yhuan ytlahuiz y armas ynic pilli quimochihuilliq ynic quitlalli yn quiyahuallotoc tlatolli yn letras yn quitotoc ypampa yn Castilla yhuân ypampa yn Leon in yancuic cemanahuatl oquittac yn Colon

Auh niman in yehuântzitzin tlahtoq Reyes Don Fernando yhuan Doña Isabel Catholicos yc oquimotlallilique yn intlalnamiquillitzin yn intechpa yn innemilizcuepalloca yn macehualtîn ynic niman comomachiztillique yn innetequipacholtzin yn Sancto Padre ytocatzin Alexandro Sexto auh ynic no cenca huey papaquiliztica netimaloliztica yn quihualmocelili yn quihualmonamiquilli tlatolli yn quimocaquilti yn oc cênca cêntlamantli yancuic tlatolli ynic quinhualmotitlamilili in iBullatzin yn ipampa ynic quimochicoxelhuia ynic quimillochchicotlaxillia yn çan inenomazhuiliztlanequillitzintica yn iuh ytech onca yn ipan Bulla yn intech quimopohuilli yn mellahuac yn tlahtocayotl yn ipan {yn mochi} yn ixquich yn oquinextique yhuân yn oc ompa titzihui yn quinextizque auh ynic amo tle yqu inpan yazq yn tlahtoque Reyes yn Portugal

ynic no quinextia ye quezqui xihuitl yn ipan tlalli yn tonatiuh yquiçayanpa auh ynic amo tle onyez yn Pleytos yn nechallanitinemiliztli ynic amo mochallanizque quenmanian yntla monequiz yn intlan yn innepantla yn tlathtoq yn Castilla yhuan Portugal yn ipampa yn tepehualiztli auh quimomellahuili yn çan ya yehuatl ypan Bulla ynic quimoxelhui cemanahuatl ynic ceceyaca cece yehuantin tlahtoq yn intech pouhqui yez yn quipehuazque auh yniqu ipampa in motlanahuatilli ynic çan ye molnamiquiz yc neyolnonotzaliztica mottaz yn ce quaxochtli ynic nipa tlanepântla yn amilpampa tiquitohua {yhuân} ynic tonatiuh ycallaquiampa auh yhuan yn mochi yn ixquich tlalli yhuan yn Provincias {nipa} yn onca tonatiuh ycallaquiyampa ca ytechpouhqui {yez} yn itepehualiz yn itlahtocayo yn icorona yn Castilla yhuân de Leon auh yn ipan onca yn omoteneuh omito yn tlanepantla yn amilpampa ynic tonatiuh yquiçayampa ytech pouhqui yn tlahtocayotl yn Portugal o yuhqui yn ynic quinmoquaxochmaquilli tlahtoque yn Santo Padre yn oc câmpa ynic tepehuazque

Auh yca ynin yn tlahtoque Reyes don Fernando yhuan Doña Isabel quimolnamiquillique ynic mocuepaz Don Christoval Colon yhuân oc cequi tlacatl quinhualhuicaz ynic motecaquihui

motlalliquihui yn oncan atentlipa yn çan ye motta mana yn itlanequillitzin Sancto Padre auh ynic yntech monequiz yc motlanahuatillique yciuhca mochichihuaz caxtolli omome yn Castilla acalli yhuan yxquich etzontli ypan caxtopohualli yn tlacatl yaz auh matlactli omome clerigostin yhuân ce teopixqui San Benito ca yvicariotzin ypampatzin hualmochiuhtia yn Sancto Padre yhuan ompa hualquizque huallaque yn ixquichtin tlachichiuhq officiales yhuan tlalchiuhque yhuân quihuallacallaquique yn mochi yn ixquich nepapan yn quaquahueque yn ichcame ÿn tentzoneque ynic moxinachozque oncan auh çan no yuhqui quihualhuicaque yn tlaolli ÿn trigo y ceuda yhuan yn oc cequi yn iyacho nepapan quillitl auh ynic ompa hualquizque huallehuaque yn itocayocan Cadiz ypan Miercoles ynic cenpohualli onmacuilli mani metztli Setiembre yn ipan omoteneuh xihuitl de auh yn achto tlalli yn ipan in yc hualnenenq hueyapan yn quinextico ca oncan cecni atenco yn quintocayotique La Dominica yehica ypampa ca yn quinextique ca Domingo ypan ynic ye ylhuitl mani Noviembre auh ynic oncan ypan niman oquipanahuiq oc cequi atentli yc niman n ômpa yaq yn Españoles ompa cate ynic ompa acito yn atenquixohuayan yn itocayocan de Navidad yc cêmpohualli onchicuey mani metztli Noviembre auh niman quicac quimattacico yn Don Xr oual Colon Almirânte

yn quenin yehuantin macehualtin oquinmictique yn cenpohualli oncaxtolli ypan ey tlacatl yn oncan macauhca yn i mochtin Capitan Diego de Arana auh yn ipampa ynon {in iuh} quitohua ca ye ypampa ynic mocepayxnamicque ynic monetechchallanique yn amo yllocacopa yn amo ytlanequiliztica yn Capitan ynic quiçaya ÿn quihuatlacuicuilliaya yhuân quinhualtolliniaya yn macehualtin auh ynic quinmictique yn oc cenca tlapanahuia miyequintin in yehuântin macehualtin hueca yn amo ytlan ynin yaocatl Españoles auh yn çatepan quinyaoyahualloco {oncan} yhuan quintlatillique ynin yaocatl yn itic catca yehica çan moch quahuitl auh yn ixquich tlacatl Españoles yn itic catca yc mochtin momayauhque yn hueyapan ynic omochtin oncan micq atitlan

Auh cenca quitequipacho yn Don Xr oual Colon Almirante ynin omito ynic amo qualli omochiuh auh ynic aocmo tle n huel yc quichihua ôncân yn ipampa yn auh niman ic ya quihuicac yn Castilla acalli oc ceccan atenquixohuayan yn çan ya no atenco yn oncan oquitlalli huey altepetl ciudad quitocayoti La Isabela ynic oncan quincauh cenca miyec tlacatl in Españoles tehuan in iteycauh ytoca Diego Colon yhuan tlatecpantehuac tlatlatlallitehuac yn tle yn oncan mochihuaz auh ynic no ceppa ya yni mochtin yn oc cequi tlacatl

Españoles caxtolli omey leguas ynic hueca tlalli yn itic Provincia ynitocayocan Cibao yn ômpa conmatia oncan yn coztic teocuitlatl yhuân cenca huehuey ynic onoque macehualtin auh ynic onacic niman yc tlanahuati ynic mochihuaz ce yaocalli quitocayoti Sancto Thomas ynic oncan quicauh onpohualli oncaxtolli yhuan ce tlacatl yn Españoles auh ynic yehuatl no ceppahuatl mocuep çan n inca yn imacehualhuan yn oncan onoque Isabela ynic oncan quimitztacico cequi tlacatl omomiquillique yhuân cenca miyequintin yn mococohua yhuan cenca nentlamattoque moyoltequipachohua yn ipampa yn ixquich yntech monequi ynic tlayhiyohuia yn ittacatl yhuan yn queni cenca monequi ynic tequittihuaz yn ipan ynic motlallia altepetl ciudad yhuân ynic mochihuaz molinos yhuan yn oc cequitlamantli monequi ynic huel mochipa yez altepetl auh cenca monec ynic tequitizque mochintin yn amo tle yc nechallaniliztica yn amo tle yc neyxnamiquînliztica tequitizq auh yc motequipachoque yn pipiltin mahuiztique tlaca yc peuhque in ye quiteyxpanhuia in ye quiteylhuia Don Xr oual Colon Almirante auh ynic motlatlallili quiteneuh ynic quichihuaz yn itla tetlatzacuiltiliztli auh ynic oncan conanq yn quallantli çomalli ynic ye quixnamiqui yn oc cenca yehuatzin Padre Fray Boyl S Benito teopixqui auh yn iqu ac achi omocehuique ynin ynchachallacaya

yhuan oc cequi tlamantli yn teamanaliztli yn teyoltequipacholliztli yn quichihuaya macehualtin yn aytic chaneque yc niman quinemilli ynic yaz oc cecni yn quinextitiuh tlalli yn itocayocan Jamayca

II Tochtli xihuitl Nican ypan in quinpeuhque Mizquitlan tlaca yhuan Quahpillolan tlaca yhuan Tzapotlan tlaca auh no yquac yn ipan in xihuitl yn motlahtocatlalli yn itoca Xochpoyontzin tlahtohuani Opochhuacân Chalco Tlalmanalco

{Ypan in yn Tochtli xihuitl ÿn oquittaco yn Hecatepeca yn Moteuhcçomatzin tlacateccati ytlan yn Ahuitzotzin cequintin quimachiyotia ypan in ÿn momiquilli Matlaccohuatzin tlahtohuani Hecatepec yece ynin amo yeuatl moneltiliz qui ye moneltiliz ÿn tlani catqui }

Auh no yquac yn ipan in xihuitl oquicahuilli yn Don Xr oual Colon Almirante ynic Presidente mochiuh yn oncan motenehua Española yn aytic yn Don Diego Colon yhuan ynic ytenanamiccahuân ytetlayxtlaticahuan mochiuhq yn Padre Fray Boyl yhuan oc cequi tlacatl auh ÿn Don Xr oual Colon yc omacallaqui quinhuicac yn ixquich tlacatl yn huellitiq ynic quihuicac ey acalli ynic tlalnextitihui auh ynic oncan quiz yn ipan altepetl Isabela yc cenpohualli onnahui mani metztli Abril yn ipan xihuitl de ynic catentocac yn iyatenyo {tlalma} altepetl yn itocayocan Cuba ye nipa ytztia {ytechpa} yn tehuantin tiquitohua amilpampa ynic quinextito atentli yn itocayocan Jamayca yhuan oc cequi atentlalli auh yn çatepan yn o ypan quiz miyec

netequipacholliztli yn ipan in ynic quinexti tlalli niman yc hual mocuep yn oncan ytocayocan Isabela ynic oncan ohuacico ypan yc cenpohualli onchiuhcnahui mani metztli Setiembre oncân oquitztacico on oacico oncan yn iteyccauh ytoca Don Bartolome Colon ey yn acalli oquihualhuicac yn ompa Castilla ynic cenca opapac auh yehica ypampa aoqu ic oquittaya yn ica ompa quititlan Ynglaterra yn oc ompa Castilla yc catca auh yc nimân contocamac ynic Adelantado mochiuh yn ompa ypan tlalli yn quin connextito

Auh yn oquic ayamo yn Don Xr oual Colon Almirânte huallacia yn ôncan Isabela auh in yehuatzin Padre Fray Boyl yhuan oc cequi tlacatl yn moyolcocoltia ynic quixnamiqui Don Xr oual Colon Almirante niman no macallaquiq yn itic ey Castilla acalli ynic hualla Don Bartolome Colon auh yc yaque yn Castilla ynic niman quinmononochillitacique yn tlahtoque Don Fernando yhuan Doña Isabel ynic quixnamiqui quiyaochihua Don Xr oual Colon Almirante yn quitotaciq yn ixquich yn quexquich yn oquito don Xr oual ca çan nechachamahualiztli nehueyliztli yhuan teca netenquelloliztli auh ça no xiuhtico yn hueyatlalman itic yn Fray Boyl S¨ Benito teopixqui auh yc cen ya yn Castilla yn iquac quin

yn ipan in xihuitl yn macehualtin yn oncan tlaca huey aytic huey atlalmanpa auh quin iquaqu in ynic necia yuhqui ma nelli huel teycnihuan ca çan motlapiquiaya auh huel quimellauhq ynic teyaohuan huel monextique auh mocenquixtiq monechicoq ynic ye quimixnamiqui yn Españoles ynic mocentlamantillique yaoquizque yn ye mochi matlactli omome xiquipilli ypan matlactzontli ynic mitohua de cien mil hombres yn macehualtin yn quixnamicq Almirante Niman quiz yn cah ynic quimixnamic yntlocquiz in ye mochintin micalque Españoles matlacpohualli ypan onpohualli tlacatl ynin oc achi tlatlacoq tlayxpolloq yn amo mach iuhqui quichiuhque yn oc achi yn ixquich macehualli auh oncan mochiuh yn necalliliztli yn ipan yxtlahuatl yn quitohua quitenehua La Vega Real yn ipan ypeuhyan metztli Abril yn ipan in xihuitl omoteneuh ynic quinmomoyauhq quincencenmanq yn macehualtin auh amo çan quexquich ynic miec yn micque yhuan cequintin ylpilloq auh yn oc no cequintin miyec yn tlacochihualloq

Auh yn in tepanahuiliztli yn tepehualiztli auh ca yc yehuatl ypampa yn otetechpouhq ohuillanoq yn ça tepan yn ixquich tlacatl yn aytic tlaca ynic otlacallaquique auh ¨¨¨

IV Tecpatl xihuitl {Ypan in tonatiuh qualoc huel nezque yn cicitlaltin iuan tlallolin cenca totocac mochi tzatzayan in tlalli }

V Calli xihuitl Ipan in poliuhque yn Amaxteca {yhuan Xochitlan tlaca poliuhque}

VI Tochtli xihuitl Nican ypan in miquico yn Chiauhcohuatl tlahtohuani catca yn Chiapantzinco yn Huexotzinco {Ypan in VI Tochtli xihuitl momiquillico ÿn Matlaccouatzin tlahtohuani catca Hecatepec yn tlahtocat xihuitl yn in ypiltzin yn Veve Chimalpilli ymatian Ahuitzotzin } {No ypan in ÿn Tochtli xiuitl motlahtotlalli ynic ome Chimpilli Hecatepec ypan ce ocelotl }

VII Acatl xihuitl años Ypan in nican quiz yn Acuecuexatl ynic apachiuhque Mexica amo ciaya yn tlacatl Tepiltzotzomatzin tlahtohuani catca Cuyohuacan yn huallaz Mexico auh yc {ypampa} quimictique ytencopa yn Ahuitzotl tlahtohuani catca Tenochtitlan auh yn tlacatl Huitzillatzin tlahtohuani catca Huitzillopochco no ypâmpa mictilloc yn Acuecuexatl ynin huel neltilliztli yn ipan xihuitl

XI Acatl xihuitl Años Nican ypan in yn omomiquillico yn Ahuitzotzin auh ça niman iquac motlahtocatlalli y Moteuhcçomatzin Xocoyotl

XII Tecpatl xihuitl Años Nican ypan in yn omomiquillico yn Tehuehueltzin tlahtohuani catca Quauhnahuac niman iquac motlahtocatlalli in ixiptla yn itoca Ytzcohuatzin

I Tochtli xihuitl Años {Nica poliuhq çoçollan tlaca }

II Acatl xihuitl Años Nican quilpilliq yn ixiuh yn huehuetque yn Chichimeca Mexica yc chicôntetl auh çan no yquac mic yn Cuitlahuatzin tlahtohuani catca yn Huexotlan auh

ynic huetz tlequauitl Teuhctepeca yn inca momamal y Huixachtla nohuian ocuihualloco yn tletl yn cemanahuac yntech yahuallotoc ynic omahuiçoticatca yn altepetl o nican huallitztoca in ye yxquich altepehua

V Tochtli xihuitl Nican neztica yn iquac peuh y hualmoquequetzaya yn ilhuicatitech yn tlanextli yn iuhqui mixpanitl auh nohuian ohuallitoc yn cemc yntech yahuallotoc nohuian onetetzahuilloc y tlanextli yn hualmoquequetzaya

VI Calli xihuitl Años Nican ypan in poliuhque yn Tlachquiauhca {yhuan Ycpatepeca yhuan Nopallan tlaca ypan Acatl ihuan Yzquixuchitepeca }

VII Tecpatl xihuitl Años {Nican poliuhq Chichihualtatacallan tlaca ypân Tecpatl yhuan ÿn Tlachquiyauhco tlaca } Nican ypan in yn omiquico yn Itzcohuatzin tlahtohuani catca Quauhnahuac yn tlahtocat xihuitl auh ye xihuitl yn ayac yn tlahtocat Quauhnahuac Auh no yquac ypan in yn hualcallacq y Huexotzinca yn iquac y yaomayaque y moyaochiuhticatca yn Tlaxcalteca y Huexotzinca yn Chololteca nican nauhxiuhtico yn Mexico Tenochtitlan y nohuian altepetl ypan auh yn ocallaquilloq yn oquihualtzauhcque

X Acatl xihuitl Años Nicân ypan in omiquico yn tlacatl y Neçahualpitzintli tlahtohuani catca Aculhuacan Tetzcoco auh ce xihuitl yn ayac tlahtocat Tetzcoco {I tlahtocat Años } {no yhuan ypan in in pehualloq Tlatlauhquitepeca Acatl }

XI Tecpatl xihuitl Años Nican ypan in motlahtocatlalli yn tlacatl Cacamatzin tlahtohuani Tetzcoco ypiltzin y Neçahualpitzintli {Nican pehualoq Tepeyacac tlaca ça no ypan tonatiuh qualoc }

XII Calli xihuitl Años {Nican poliuhq Calliymayan tlaca }

I Acatl xihuitl Años Nican ypan in yn ohuacico Marques del Valle yn Don Fernando Cortes ye omoteneuh ypan ce Acatl xihuitl ypan cemilhuitlapohualli ce hecatl

Auh nican neztica ynic quinamic yn tlacatl catca Moteuhcçomatzin yn Acachinanco ynic quinamic teocuitlacozcatl quimotlatlauhtilli quimolhuilli oticmihiyohuilti oticmociyahuilti ca mochantzinco ca mocpaltzin ca mopetlatzin yn otiqualmomachilti auh nohuian ymixpan yn altepetl ypan tlahtoque

Auh ypan metztli Quecholli auh yn cemilhuitlapohualli ye omoteneuh ce hecatl yn ipân callacque Españoles yn itecpanchan yn Moteuhcçomatzin oncan quitlamique yn Quecholli niman Panquetzalliztli niman Atemoztli niman Tititl niman Yzcalli Atlcahualo niman Tlaccaxipehualiztli niman Toçoztontli niman Huey Toçoztli niman ye Toxcatl y tlamian niman ye quitohua yn Capitan tle yn inteouh ma quichihuacan ye yc peuh oquichiuhque oquitlacatillique yn tzohualli yn oqu ipan tlazque yn ipân yn icpac yn iteocal yn Huitzilopochtli niman ye yc yauh yn Capitan

ypan otlecoc yn tzohualli oquittac yn iuhqui yn quichihuaya oquihuitec yxayacapan in diablo ixiptla yc opeuh in yaoyotl oquallamque yn tlamacazque yn telpopochtin niman oquinpehualtin yn Capitan Don P de Alparado Tonatiuh ynic ye quinmictia yn mococollohuaya yn mitotiaya yn atecaya yn tiacahuan yn Mexica auh yn ontemictique Españoles niman yc mocaltenq yn caltzauhcticatca quitlamique yn Etzalqualiztli yn cênpohual tlapohualli auh ypan Tecuilhuitontli in ye no achi hualquiquiça auh ypan Huey Tecuilhuitl in yeneque quichiuhque yn yaoyotl yn mixnamique yn Tenochca yn i mochtin Españolesme auh ynic quizque Españoles oyaque auh oncan oyxpoliuhque yn Tolteca Acalloco yc otenque yn acallotli auh miec yn oncan poliuh yn intlatqui yn Castilteca caxtoltecpântli yn ôncân yxpoliuhq in Españoles yxquich y Huexotzinca yn Tlaxcalteca oncân cequi opoliuh yn quicecênquixtica ÿn coztic teocuitlatl auh ça quexquich yn quiquixtique yn tetlahuicalhuan yn Huexotzinca yn Tlaxcalteca auh ynin y mochihu in ca yohualnepantla auh yn tlatlalchipahuac ye cate acuenco in Españoles auh ompa cemilhuitl yn quiyaoyahualloq auh ytlamian ÿn Huey Tecuilhuitl ynic oyaque yn Tepotzotlan niman yohualnepantla y no olimq y no yaque in Tepotzotlan yn itecpanchan yn tlahtohuani catca yn itoca Quinatzin ye no yohuan in yaque Españoles ¨¨¨

{Auh in oyuh micque Totepeuh yhuân Topil oc macuilpohualxihuitl yn ayac tlahtocat Culhuacan }

{niman contoquilli Topil motlahtocat centzon xihuitl yn i quitech tlamico Moteuhcçoma Xocoyotl tlahtohuani Tenochtitlan ynic momiquillico }

Nican ompehua ontzinti nican mottaz nican nic liuhtoc in cenca cualli in cenca nezcaliltlahtolli in itechpa tlahtohua yn inelhuayo in itepecho in itzintica yn itauhca yn itlahtollo in ipohualloca in huehuenemiliztli motenehua Chronica yn iuh nelhuayotica in yuh tzintitica yn yuh peuhtica huehuetlahtolli in huehuenemiliztenonotzaliztli yn icemihtauhca yn icentlahtollo yn icenpohualoca yn itepecho yn inelhuayo in ipan ceme yn macuiltlayacatl inic macuilcan xeliuhtica tzontecoyotica tlahtocayotica yn tecpilaltepetl ini motenehua Chalchiuhmomozco Amaquemecan Chalco yn oncan ypan yc ontlayacatl yn quitocayotia Tzacualtitlan Tenanco Chiconcohuac yn iuh tzintitica in yuh peuhtica in yuh quihtotiaque in yuh quitlalitehuaque inin huehuetlahtol in ye huecauh onemico in tlaçohuehuetque in tlaahtoque in tlaçotlahtocapipiltin catca yn illque in huehueyntin Teochichimeca catca yhuâ in iz ça tepa onemico in tocihuan in tocolhuâ tonhuan in tomintonhuan in topiptonhuan chichicahuan in yuhqui yn innenonotzal motiuh yn otechcahuilitiaque yn intechcopa iça in tineme axcan cahuipan Ayc polihuiz cahuiz mochipa pialoz ticpiazque yn tepilan in titeixhuihuan in teteyccahuan in titeminnhuan in titepiptonhuan in titechichicahuan n titetentzonhuan in titeyxquamolhuan in titeteyztihuan in titetlapallohuan in titehezçohua in titlayllotlacatepilhuan in ipan otiyolque otitlacatque inic cetlaxillacalyacatl motenehua Tlayllotacan Tecpan y huel oncan catca yhuel oncan omotlahtocatillico yn izquintin in tlaçohuehuetque in tlaçotlahtoque Chichimeca in tlayllotlacatlahtoque in tlayllotlacateteuhctin ynic mihtohua inin tlahtolli Tlayllotlacan Tecpâ pielli auh yehica in ye huecauh ca chicuacen calpoltlaxillacalli macehualli oncatca yn ipanin omoteneuh ce tzontecontlayacatl motenehua Tzacualtitlan Tenenco yhuan ome tlahtocayotl ypan catca oncan ipan inic ome calpoltlaxillacalli motocayotia Atlauhtlan yece yn oncan in catca tlahtocayotl çan tlahtoquilotl mochiuhticatca yn ipan Tenancayotl auh ca yehuatl huel tachcauh catca in tlahtocayotl in ipan catca calpoltlaxillacalyacatl Tlayllotlacan oncan hueycan Tecpan catca ynic oncan huel pielli omochiuh ynin huehuenemiliztlahtolli nican ye motenehuaz yn iuh niman ye onneciz auh yn omoteneuh Atlauhtlan ayc ompa ticuililozque yehica ca nel amo yehuantin yn pialmochiuhtiuh in ye motenehuaz huhuenemiliztlahtolli yhuan nican tocateneuhtoque yn izquintin yn aquique yn cenca huehueyntin oquichtin tiyacahuan yn cenca tlapaltique chicahuaque in tlaçohuehuetque in tlaçotlahtoque in tlaçotlahtocapipiltin in motenehua Teochichimeca Heztlapictin Aztlan tlaca Chicomoztoca quinehuayan tlaca Tzotzôpan tlaca Teotenanca cuixcocca Temimilolca Yhuipaneca Çacanca ca nahuintin in yn ehcoque yn ahcico in tlaltemoco in tlalmecehuaco ynic ontlamantin in huel achtopa tlatzonilpico cococayotica ^y nican Tolteca tzacualtitlan Tenanco in quahuatl ymancan yn chiconcohuatl yyonoyan Auh ye omoteneuh ca macuilcan quiztica macuilcan xeliuhtica macuil tlayacatl ynic tzontecoyotica macuilli tlahtocayotica ynin ce altepetl mochiuhtica yuhqui yn yn catqui y huel achto yc cetlayacatl y huel quiyacatihtica yn iuhqui ymiyahuayocan mochiuhtica altepetl ynic ce tlahtocantli oncan catca huey tecpan ytocayocan ytztlacoçauhcan Chalchiuhmomozco huel oncan in yn achtopa yc quinotzque Totolimpa Amaquemecan auh ynic ontlayacatl yn iuhqui yc occan ymiyahuayocâ mochiuhticatca altepetl ynicc occan tlahtocantli oncâ catca no huey Tecpan catca ye oncan in yn omoteneuh ytocayocan Tolteca tzacualtitlan tenanco chiconcohuac Auh ynic Etlayacatl ynic Excan tlahtocantli oncan catca ytocayocan Tecuanipan auh ynic nauhtlayacatl ynic nauhcan tlahtocantli oncan catca ytocayocan Panohuayan auh ynic macuiltlayacatl ynic macuilcan tlahtocantli oncan ytocayocâ tlayllotlacan auh ynin omoteneuh ynic macuilcan quiztica ynic çan cepan catqui inic amo hueca mocauhtoque ynic çan netechantoque in macuiltlayacatl in macuilcan tlahtocayotl ynic macuilcan quiztica xeliuhtica altepetl yn icenmacuilcanixtican ic mocennotza mocentocayotia chalchiuhmomozco Amaquemecan ytenyocan ymachiyocan in totolimpa quauhtlitempa in cepayauhtenco in motenehua xilliquehuac xuchithualco Ayahuithualco yn iztac çolli inmellan yn cohuatl ymomanayan yn ocellome ymnemiyan yn tamoanchan xuchitl icacan yn oncan hecoque ahcico in tepehuaco huel achtopa in ye cuel teyxhuihuan Temintonhuan no nahuintin yn huehueyntin y no cenca tlapaltique chicahuaque y tlaçohuehuetque in tlaçotlahtoque in tlaçotlahtocapipiltin in motenehua Teochichimeca ytztlacoçauhque Tololimpaneca Amaquemeque ynin nahuintin ca huel yehuantin yn achtopa nican tlaltemoco yn tlalmacehuaco yn tlatzonilpico cococayotica yn oncan quitzintico quinelhuayotico quitepechotico quitlalico yn omoteneuh centlayacatl altepetl ytlacoçauhcan chalchiuhmomozco ynic ye no quitocamacaco yca oc centetl yancuic tocaytl ynic quitocayotique Amaquemecan ytemcopa mochiuh yn inteouh catca yn itoca Totollin ye omoteneuh nahuintin in Chichimeca huallaque ce tlahtohuani hualmochiuhtia yhuan Eyntin tlaçotlahtocapipiltin y hualteyacanque yn tiyacacahuan hualmochiuhtiaque yn quitzintico yn quitlallico altepetl ynic ce in tlahtohuani hualmochiuhtia yehuatl in tlacatl Atonaltzin yn iteuhctoca hualmochiuhtia yn ipan quitlahtocatlallique quitocayotique chichimeca teuhctli ynic ome ahçico huel ytiachcauhtzin yehuatl yn tlacatl tliltecatzin tlahtocapilli yn iteuhctoca hualmochiuhtia in ipan quiteuhctlahtocatlallique chichimeca yaotequihua auh ynic Ey ahçico çâ no ynteyccauhtzin yehuatl yn innepantla hehua in tlacatl ytoca Mapihuatzin yn iteuhctoca hualmochiuhtia in ipan teuhctlahtocatlaliloc cohua yaotequihua auh ynic nahui ahcico huel yntlatzin yehuatl yn tlacatl xuchitzin auh ynin omoteneuhque nahuintin ahcico chichimeca auh ca oc cenca yehuantin no nican huel teneuhticate yn omentin omoteneuhque tlaçotlahtoque yn tlacatl Atonaltzin chichimeca teuhctli yhuan yn  tlacatl Tliltecatzin Chi chimeca yaotequihua yn itechpa ynin tlahtocatlacamecayotica ynic quenin huel yehuantin tlahtocaquauhtzonme tlahtocatlacaxinachtin mochihuaco in tlahtocatlacamecayotica yn ipan yc cetlayacatl ytztlacoçauhcayotl yhuan ypan inic macuiltlayacatl yn omoteneuh Tlayllotlacayotl yehica yn oncan in tlahtocanelhuayotl in tlahtocayotl yc peuh motlalli çan oncan hualla çan oncan hualquiz yn itztlacocauhcan y conpehualtico tlahtocayotl yn itoca Temiztzin teohua teuhctli çan oncan yntech hualquiça yn itztlacoçauhcan tlahtoque ynic mihtohua çan ic cectiticate ynin tlahtocatlacamecayotica auh yn omoteneuhque omentin tlahtoque yn Atonaltzin chichimeca teuhctli yhuan Tliltecatzin chimeca yaotequihua ca huel yehuantin yntech hualpeuh hualtzintic yn intlahtocatzintitlizpehualiz in intlahtocatlacatiliz yn intlahtlocatlacamecayo yn iuh tzintitica yn iuh peuhtica in motenehua ingeneraçion yn izquintin in tlaçochichimecateteuhctin in tlaçochichimecatlahtoque yhuan teohuacateteuhctin teohuacatlahtoque motenehua reyesme yhuan tzompâhuacateuhctin tzompahuacatlahtoque// quezquintin yn tlaçochichimecatepilhuan yn omotlahtocatillico ypâ yc cetlayacatl altepetl ytztlacoçauhcan yhuan tlayllotlacan y tzompanhuacan Tecuanipan Auh yn omoteneuh ynic ontlayacatl ypan Tolteca tzacualtitlan tenanco chiconcohuac yn oncan hecoque ahcico Bin ye cuel  temintonhuan yn ça no nahuintin y no cenca huehueyntin y no cenca tlapiltique chicahuaque yn amo panahuiliztin in tlaçohuehuetque yn tlaçotlahtoque in tlaçotlahtocapipiltin in ça no motenehua Teochichimeca Tulteca tzacualtitlan Tenâca chiconcohuaca ynin no nahuintin ca huel no yehuantin yn achtopa in çan cenacico çan huel nimâ hualtetocatiaque in no nican tlaltemoco in tlalmacehuaco in tlatzonilpico Cococayotica yn oncan quitzintico quinelhuayotico quitepechotico quitlallico yn omoteneuh yc ontlayacatl altepetl Tulteca tzacualtitlan tenanco chiconcohuac Amaquemecan chalco ye omoteneuh no nahuintin in yn chichimeca huallaque omentin yn tlahtoque hualmochiuhtiaque yhuan omentin tlaçotlahtocapipiltin yn ohualteyacanque in tiyacahuan hualmochiuhtiyaque in quitzintico in quitlallico yc ontlayacatl altepetl ynic ce in tlahtohuani tlahtocatachcauh hualmochiuhtia yehuatl in tlacatl Quahuitzatzin yn iteuhctoca hualmochiuhtia in ipan quitlahtocatlallique quitocayotihque tlayllotlac teuhctli ynic ome ahcico tlahtohuani yehuatl in tlacatl huehue ytzquauhtzin yn iteuhctoca hualmochiuhtia yn ipan tlahtocatlaliloc Atlauhtecatl teuhctli ynin omoteneuhque omentin huel tlahtoque catca auh ynic e^ytin ahçico çan teuhctlahto yehuatl in tlacatl Quachipaçoltzin yn iteuhctoca hualmochiuhtia yn ipan Teuhctlahtocatlaliloc Tlacateuhctli auh ynic nahui ahçico çâ no teuhctlahto yehuatl in tlacatl Teccizmitl ynin yn iteuhctoca hualmochiuhtia yn ipan Teuhctlatocatlaliloc Amilcatl teuhctli auh ynin omoteneuhque nahuintin ahçico Chichimeca auh ca oc cenca yehuantin no nican teneuhticate yn oc no omentin omoteneuhque tlaçotlahtoque in tlacatl Quahuitzatzin tlaylotlac teuhctli yhuan in tlacatl huehue ytzcuauhtzin Atlauhtecatl teuhctli yn itechpa ynin tlahtocatlacamecayotica ynic quenin huel no yehuantin tlahtocaquauhtzonyome tlahtotlacaxinachtin mochihuaco in tlahtocatlacamecayotica yn ipan yc ontlayacatl tzacualtitlan Tenancayotl chiconcohuac yhuan ycalpoltlaxillacalocmapan motenehua atlauhtlan huel yehuantin intech hualpeuh hualtzintic yn intlahtocatzintilizpehualiz yn intlahtocatlacatiliz yn intlahtocamecayo yn iuh tzintitica yn iuh peuhtica in motenehua ingeneraçion yn izquintin in tlaçotlaylotlacateteuhctin in tlaçotlaylotlacatlahtoque motenehua Reyesme yhuan  atlauhtlan Duquesme in tlaçochichimecatepilhuan yn omotlahtocatillico ypan yc ontlayacatl altepetl Tulteca tzacualtitlan Tenenco yhuan ymapan atlauhtlan ynic occan catca tlahtocayotl yn ipan tzacualtitlan Tenancayotl auh yn oc occan ypan calpoltlaxillacalli in motenehuaya tlacatecpan yhuan amilco ye omoteneuhque yn oncan ahçico çan Teuhctlahtoque motenehua Senadoresme yn oncan ocatca atle copilli corona quitlaliaya yn oncan oteuhctlahtoco ynic mihtohua çan teuhctlahtoloyan catca ynic nauhcan tlahtolloyan catca ypan Tenancayotl yhuan ça no cotonico ça no popolihuico ça no tlamico yn intlacamaceyo yn omoteneuhque teuhctlahtoque yn oyeco yn otlahtoco yn ipan omoteneuh occan calpoltlaxillacalli tlacatecpâ yhuan amilco catca oncan cotonico popolihuico yn ipâ XII calli xihuitl años in ihquac techpeuh tichalca in tlacatl huehue Moteuhcçuma ylhuicamina chalchiuhtlatonac Tlahtohuani Mexico Tenuchtitlâ ynehuan yn itlahtoca Teyxtlaticauh yn itlahtocatenanamiccauh catca y huel ytiyachcauh catca in cenca tlapaltic chicahuac yn amo panahuiliztli catca in huey yaotachcauhcatca in tlacatl Tlacaeleltzin cihuacohuatl auh yn omoteneuhque oc omentin tlahtoque in tlacatl Quahuitzatzin tlaylotlac teuhctli yhuan yn itehuapauhcauh yn itlahtocateyxtlahticauh yn itlahtocatenánamicauh catca tlacatl huehue ytzcuauhtzin Atlauhtecatl teuhctli ca amo can ocotonico amo can opolihuico amo can otlamico yn iuh niman ye onnecitiuh yn itlahtocatlacamecayo ca oncatqui ca yoltica in ye ixquichica ye centzonxihuitl ypan chiuhcnauhxihuitl axcan ynic ompa itech hualpeuhtica y yehuatl tlacatl Totoltecatl Tzompachtli tlaylotlac teuhtli y huel achto intlahtocauh hualmochiuhtia Teotenanca ynic ompa huallhuaque ynchan in oncan motenehua cuixcoc Temimilolco yhuipan Çacanco Teotenanco auh yn omoteneuh tlahtohuani Totoltecatl Tompachtli tlaylotlac teuhctli yehuatl in yttatzin catca yn omoteneuh tlacatl Quahuitzatzin tlaylotlac teuhtli ^y nican hecoc ahcico ^y nican nemico ynic yehuatl nican oquinchihuaco ytech oquizque ytlaquillohuan ytlahtocatlacamecayohuan yn nahuintin ça tepan oquitoquillico tlahtoque in oncan in omotlahtocatilico ^y tlacatl nuchhuetzin yhuan in tlacatl cihuatlahtohuani Xiuhtoztzin yhuan in tlacatl ytztlitzin yhuan in tlacatl Huehue Chimalpahitzin mocauhqui ynin yehuatl tlahtocatizquia tlaylotlacteuhctizquia auh çan quicauhque in tle ynic quicauhque Tenanca ynic oquitocayotique mocauhqui auh ye yehuatl tlahtocatlaliloc yn iteyccauhtzin yn itoca Quauhtlehuanitzin yehuantin in yn otlaylotlacteuhctico yn otlaylotlacatlahtocatico motenehua tlahtocachichimecatepilhuan auh y ye nican ça tepan çan nahintin yn amo ytech quiça yn amo ytlacamecayohuan yn omoteneuh tlacatl tlahtohuani Quahuitza teuhctli yn nican otlahtocatico tlayllotlacan macihui çâ no tel  tenanca yece atlauhtlan chaneque ompa tepilhuan yn eyntin yehuatl yn tlacatl huehueyotzintli tlaylotlac teuhctli mochihuaco yhuan in tlacatl Don Thomas de San Martin tlaylotlac teuhctli mochiuhca in tenanco chicoconohuac auh çan chiuhcnauhpohualilhuitl yn ontlahtocatico auh ça tepan ni cuele ompa tlahtocatito yn itztlacoçauhcan ompa Chichimeca teuhctli mochihuato ypampa ynâtzin ynic Eyntin tlahtohuani mochihuaco nicâ tzacualtitlan tenanco yehuatl yn tlacatl Don hernando cortes cihuayllacatzin ytztlacoçauhcan tlahtocatepiltzin quihualpatlato çan quicuilito yn itlahtocayo ^y yn omoteneuh Don Thomas de San martin Quetzalmaçatzin ynic nahuintin tlahtohuani mochihuaco nican tzacualtitlan tenâco yehuatl yn Don Joseph de castilla hecaxoxouhqui tlaylotlac teuhctli mochihuaco auh y yehuâtin in omoteneuhque Eyntin in tlahtocatico tlaylotlacan macihui yn iuh omoteneuh yn ompa inchan yn ompa Tepilhuan atlauhtlan ca oc cecni quizticate oc no centlamantli tlacamecayotl quipia yn iuh niman ye onnecitiuh tlatzintla tlayxpan yn ipan in huehuetlacamecayoamoxtli auh yehica ypampa amo no yehuatl ytech quiça amo no ytlacamecayohuan yn omoteneuh yn ahçico tlahtohuani huehue ytzcuauhtzin atlauhtecatl teuhctli in quauhtzonyotl mochihuaco tlahtocatlacamecayotica atlauhtlan ypampa yn oquichtlachihualiztica ytlahtocatlacamecayo çan cotonico opolihuico otlamico yn ipan años ytech ynic chicuey tlahtohuani yn itoca Mactzin atlauhtecatl teuhctli auh ynin tlahtohuani yn ihcuac momiquilli macihui yn quincauhtiaca omentin ypilhuan oquichtin ce ytoca catca yxtlilchamapol ynic ome ytoca quetzalpahin catca yn telpopochtin auh ynic aocmo yehuantin in ceme tlahtocatlaliloque ypampa cenca tlahueliloque catca amo tlacanemia Temimictiaya Temihminaya cemihcan yntlahhuitol tetinemia atle ypan teytztinemia auh yehuatl ypampa ynic amo quimonnecque ynic aocmo yehuantin ceme tlahtocatlaliloque yc conmocahuilique in tlahtocayotl o yhui yn yn polihuico yn cotonico yn oquichtica oquichotica ytlahtocatlaquillo yn itlahtocatlacamecayo yn oteneuh tlahtohuani catca huehue Ytzquahtzin atlauhtecatl teuhctli ^y nican hecoc ahcico ^y nican nemico ynic yehuatl in nican oquinchihuaco ytech oquizque ytlaquilihuan ytlahtocatlacamacayohuâ in chicomentin ça tepan oquitoquilico in  atlauhtecateteuhctin yn atlauhtecatlahto^q yn oncan in atlauhtlan omotlahtocatilico in tlacatl yllancuetzin ynic ome ytoca ytzcuauhtzin yn tlotli tlatquic y huecontzin yn oçomateuhctli yn huetzin teuhtli niman ic yehuatl yn omoteneuh Mactzin teuhtli yehuantin in yn oatlauhtecateuhctico yn oatlauhtecatlahtocatico motenehua tlahtocachichimecatepilhuan auh yn o yuh momiquilli omoteneuh tlahtohuani Mactzin teuhctli yc niman mictiloque tzonhuiloque yn omoteneuhque omentin ypilhuan yn itoca yxtlilchamapol yhuan ytoca quetzalpahin (auh macihui yn ompa atlauhtlan yntech in yn omoteneuhque tlahtoque ompa yntech hualmoquixtia tlacamecayotica in tlacatl señor don domingo hernandez Ayopochtzin ca amo oquichtechihualiztica ca ça cihuatechihualiztica ynic ompa tetech hualmoquixtia omonello omonepano yn imezco yn intlapallo in itlahtocatlacamacayoc omoteneuh tlahtohuani Quahuitzatzin tlayllotlac teuhctli ynic necoccampa innehuan in tlahtocatlacamecayotitech hualmoquixtia yn omoteneuhzino Don domingo hernandez Ayopochtzin ) Auh yn o yuh momiquilli omoteneuh tlahtohuani Mactzin ataluhtecatl teuhtli yc niman hualmotlahtocatlalli yn ixiptla mochiuh yehuatl yn itoca Popocatzin atlauhtecatl teuhtli yc techiuhcnauhca tlahtohuani mochiuh yn atlauhtlan contzinti oc centlamantli tlahtocatlacamecayotl yehica ynin omoteneuh Popocatzin amo yntech quiça  amo quen quinnotzaya yn omoteneuhque achtopa chicueyntin otlahtocatico atlauhtlan ypampa yn omoteneuh Popocatzin atlauhtecatl teuhctli mochiuh ca çan ce tlátlaymetl catca yhuan yn  ittatzin ynantzin çan macehualtzitzinti catca yn tatli ytoca catca quiyauhtzin yuh mihtohua çan cocoxcatzintli catca yhuan huel tenancatl huel ompa chane catca ^y quaxochtenco atlauhtlan yn axcan ye motenehua s Miguel ynic huel tlahtocatlaliloc omoteneuh Popocatzin yn ipan iii acatl xihuitl de años çan ipampa ynic hualmacoc yniqu icihuauh mochiuh tlahtocacihuapilli yn iyoca cohuanêtzin ychpochtzin in in tlacatl cohuaçacatzin Teohua teuhctli tlahtohuani catca ompa tlaylotlacan Amaquemecan ynic quihualmacac ^y ychpochtzin çan quittili yn iaxca ytlatqui quipiaya Popocatzin auh yn o yuh quihualmacac ychpotzin cohuaçacatzin ipampa yc niman tlahlocatlaliloc in Popocatzin çan ipampa cihuapilli tlahtocat ynic niman yehuâtin oquichiuhque in cacamatzin ynic Teomeca yn iuhqui intoca omochiuh ^y in ça tepan ompa canaco yn tlayllotlacan Amaquemecan ompa tlahtocatito Teohua teuhctli mochihuato ypampa yn inantzin ompa hualmohuicaca yn iuh niman ye onnecitiuh tlatzintla ynic ye centlamantli ytlacamecayo omoteneuh Popocatzin atlauhtecatl teuhctli yancuican ye no ceppa yehuatl tlahtocaquauhzonyotl omochiuh yn atlauhtlan in ça cemi oquitzacuico otlahtocatico atlauhtlan yece macihui yn iuh mihtohua ^y in çan macehualtzintli catca Popocatzin ca oquinnehnehuilico yn achtopa omoteneuhque chicueyntin otlahtocatico yn iuhqui Duquesme catca yn iuh copilli corona ca quiaya yntzontecompa ca no yuhqui ocaquitia ytzonteconpa yn omoteneuh Popocatzin ynic nelti ca tlahtohuani catca ynic yehuatl ynehuan quipiaya tzacualtitlan tenancayotl in tlahtocatachcauh catca Quauhtlehuanitzin tlaylotlac teuhctli yniqu inehuan yehuantin impan mochihuaco ynic pehualloque chalca yehuantin tepehuaco yn  omoteneuh^q in tlacatl huehue Muteuhcçuma ylhuicaminatzin yn inehuan ytiachcauh tlacaeleltzin cihuacohuatl auh yn o yuh tepeuh chalco Mexicatl yc cen ça cemi oncan cotonico oncan polihuico yn atlauhtlan tlahtocayotl aoqu ic ceppa ompa otlahtocatlaliloc ce tlahtohuani yn iuh  nepa tlatzintla hualmotlalitihuia tlahtoque auh in yehuantin in omoteneuhque tlahtoque catca yn oc tlateotocanime motenehua gê tilesme catca yn intlahtocatilizpan huel oncatca inhuelitiliz yn inpan ynmacehualhuan ynic oquinpiaco oquinpachoco ynic oquinmamaco oquimitquico yn incuitlapilhuan ymatlapalhuan tzacualtitlan Tenâca chiconcohuaca huel ynmac oncatca miquiliztetlatzontequiliztli ce quauhcalli quipiaya yn oncan teylpiaya huel quittaya mellahuac yehuantin ynic tle ^yn Justicia ^ynpan quichihuaya inmacahualhuan tenanca ynic oteyacanaco otepachoco yn ipan cetlayacatl ymaltepeuh tzacualtitlan tenanco cenca otlacamachoco yhuan otlamamauhtico otlacala//[entre líneas ^q

qui]lliloque yhuan ocaltiloque oyellimiquilloque otexilliloque otequipanolloque yn ihcuac yehuantin oc moyomahtlahtalhuiaya yn oqu iuh yyoca catca yn ayamo yuh quinhualpehuaya Mexico tlahtoque ye omotocateneuhque auh yhuan nican quezquintin Teneuhtoque yn omoteneuhque ytztlacoçauhcan chichimeca teteuhctin yn chichimeca tlahtoque yhuan in yehuantin in çâ no chichimeca teteuhctin yn  ça no chichimeca tlahtoque yn oncan omotlahtocatillico omoteneuh Tecuanipan yn ipan calpoltlaxillacalli huixtoco yhuan in yehuantin yn tlamaocateteuhctin in  tlamaocatlahtoque yn oncan omotlahtocatillico ypan nauhtlayacatl Panohuayan No yhuan nican  pouhtoc Teneuhtoc in cecenyaca cecenme in tle in xihuitl in ipan motlahtocatlallique No yhuan in tle in ^y xihuitl yn ipan mo miquillique yhuan yn quecizqui xihuitl in motlahtocatillique No  yhuan nican tocateneuhtoque yn omoteneuh teuhctlahtoque motenehua Senadoresme catca yn icizquintin yn ipan omoteneuh oc oncalpoltlaxillacalli motenehua Tlacatecpan yhuan amilco ynic cececni oncan oteuhctlahtoco// yn oyeco onemico yn oquimixtlatico yn oquinnanamiquico omoteneuhque omentin in huel yehuantin tlahtoque ynic oquinauhcahuico oquipiaco ye  huecauh yn itzinecan Tzacualtitlan tenancayotl auh in ye oncan in omoteneuh occan in tlacatecpan yhuan amilco  yn ôcan hualyetihuiya omoteneuhque Teuhctlahtoque ca no yhcuac oncan polihuico in Teuhctlahtoliztli ynic techpeuh tichalca Mexica ynic oncan in huel neci motta ca yn oc ye huecauh yn  itzinecan Tzacualtitlan tenancayotl cenca hueycan catca yn axcan ye popolihuiznequi yn ipan in xihuitl de años in ça yuhqui calpoltlaxillacalli yn iuh ypan neztica auh ynin omoteneuh tenancayotl ynitzinecan yn ihcuac hecoque ahcico ca niman yhcuac occan xeliuhque yxtlapanque in tenanca ynic cequintin ompa hualmocauhtiquizque ayotzinco auh ça tepan oncan hualmicuanique in tepopolla Texocpalco ynic no oncan Tenanco mochiuh yn axcan ye motenehua S Juan baptista ynin ce altepetl yc catqui ce gouernador oncan tlapia yhuan oncan moyetzticate Teoyotica oncan motepachilhuia in tlaçoteopixque Sto Domingo auh yn oc cequintin tenananca (!) ompa hualmocauhtiaque omoteneuh atenco ayotzinco yn axcan ye ce altepetzintli yc catqui ye motenehua Sancta catalina Martyr yhuan oncan moyetzticate teoyotica oncan motepachilhuia in tlaçoteopixque S Augustî yhuan ce alcalde oncan tlapia auh ynin omoteneuh altepetzintli Ayotzinco ompa pouhtica ytech yn altepetl Tepopolla Texocpalco Tenanco ytlatititzal ytlahuillanal ySujecto mochiuhtica auh ynic occan ytlatitizal ytlahuillanal ySujecto mochiuhtica yn omoteneuh altepetl Tenanco Tepopolla Texocpalco yehuatl yn altepetzintli xuchitepec yn axcan ye motenehua Sto Domingo yhuan oncan moyetzticate Teoyotica oncan motepachilhuia in tlaçoteopixque yn itlaçopilhuantzitzinhuan omoteneuhtzino totlaçottatzin Sto Domingo yhuan ce gouernador oncan tlapia ynî Xuchitepeca no motenanca ytohua yece amo neltiliztli yehica ypampa ca oc centlamantin oc ce tlacamecayotl quipia ca inhuan pohuan inxeliuhcayohuan in ciudad xuchimilco tlaca achtopa ompa ymacehualhuan catca yn ompa otlapachoco tlahtoque ypan etlayacatl altepetl xuchimilco yn oncan motenehua Tepetenchi yhuan Tecpan yhuan ollac yuh mihtohua ynic nican huallaque yniqu imac motlallico omoteneuh altepetl Tenanco Tepopolla Texocpalco ynic oncâ quinmomacaco yn oncan tlaylotlacateteuhctin yn tlaylotlacatlahtoque yn oncan otlahtocatico yhuan no yehuantin yn ixquichtin in cenca miequintin yn onca hualmocauhtiquizque oncan quinhualcauhtiquiz in tlahtohuani Quahuitzatzin tlaylotlac teuhctli yn tlaçotlahtocapipiltin Teuhctlahtoque moch huehueyntin yn oncan hualmocauhque yn ihcuac yancuica hecoque ahcico auh yehuantin in anoço ye ynpilhuan ymixhuihuan yn oncan quincelique quinmomacehualtihque yn omoteneuhque xuchimilca in axcan ye motenehua xuchitepeca in ye o yuh motemacato intemilticahuan ymelimiccahuan inquaxochpixcahuan quinchiuhque ynic achitzin yntlal quinmacaque Tenanca ynic ompa quintecato ompa cequintin quincahuato yn inquaxochpan tlahtoque Texocpalca yn itocayocan callayoco yhuan quauhtzontzonco yhuan xuchitepec yn oncan axcan omololoque omaltepetlalique auh ynic oncan in omotlalli gouernaçiô ca çan oquintlaócollique oquimocniuhmacaque otehuelitiltihque in Tenanca Tepopolla Texocpalco tlaca ynic ça tepan virreyes oquinmotlachicahuililique yn xuchitepeca yehica in yehuantin xuchitepeca ca amo pilloque amo tlahtocayoque catca auh yn axcan ompa gouernadorti ca çan quauhpipiltin Auh ynic occan xeliuh Yxtlapâ tenancayotl ye oncan in in motenehua tzacualtitlan tenanco chiconcohuac yn axcan ye motenehua Stiago yn oncan hecoco ahcico yn omoteneuh y ye mache huel yehuatl y centlahtocauh catca yn ixquichtin omoteneuh ytoca quahuitzantzin tlaylotlac teuhctli nican achtopa ycpac Amaquemeque tepetl motlallico yn oncan moyetzticate teoyotica oncan motepachilhuia in tlaçoteopixque Sto Domingo auh ynin Tzacualtitlan tenanco chiconcohuac Amaquemecan ca inxeliuhcayohua inhuanpohuan huel oc no yehuantin Tenanca yn otecauhque nican tzacualtitlan tenanco yn ompa omololoto yn ompa omaltepetlalito omoteneuh quaxochtenco atlauhtlan yn ipan xihuitl de años yn ihcuac omochiuh congregacion auh yn ica teoyotl ytech omopouhque yn altepetl chimalhuacan in çan no yehuantzintzin ompa Teoyotica motlapachilhuia Teopixque Sto Domingo ynic cemeyehuantzintzin ompa atlauhtlan missa quimonmottitilia Tenanca atlauhteca ynic no ce alcalde oncan tlapia yece aocmo mochtin huel Tenâca yn oncan in atlauhtlan omololoco ca cequi ytztlacoçauhque yhuan cequi tlaylotlaque Teohuacâ tlaca quaxochpique yn oncan ohualmololoque yn oncan ohualmopouhque intlan yeppa atlauhteca oncan onoque inic cepan ye tlatenancatilia ahnoço ye tlaatlauhtecatilia o izquican in nauhcan quizticate yn axcan Tenanca chalca No yhuan nican tocateneuhtoq^ yn ixquichtin tlahtocatepilhuan motenehua Principes yhuan in tlahtocateychpochhuan motenehua Princesas yn inpilhuantzitzinhuan yn omoteneuhque in tlaçotlaylotlacateteuhctin in tlaçotlaylotlacatlahtoque yhuan yn atlauhteteuhctin yn atlauhtecatlahtoque yn oc yehuantin tlateotocanime motenehua gentilesma catca No yhuan nican Teneuhtoc ynic onenepaniuh ynic oneneliuh in tlahtocatlacamecayotl in tlahtocaeztli in tlahtocatlapalli ynic nican ypan macuiltlayacatl yn oncan yc macuilcan catca tlahtocayotl ye huecauh yn itztlacoçauhcan Totollimpa Amaquemecan yhuan Tecuanipan yn Panohuayan in tlaylotlacan Teohuacan yn oc tlateotoquilizpan catca yhuan yn axcan ye christianoyopan ynic omotlalli in tlahtocahuayolcayotl cihuatica yn izquicampa yn intlacamecayoc yn omoteneuhque yzquicampa tlaçotlahtoque auh oc cenca yehuantin nican tenehuallo in tzompahuacan Tecuanipan tlahtoque catca çan quezquintin yhuan Ytztlacoçauhcan tlahtoque catca yehica ca ompa yntech yyocampayxti onancaticatqui ytlacamecayo yn omoteneuh tlacatl Señor Don domingo hernandez Ayopochtzin auh yn Panohuayan yhuâ tlaylotlacan teohuacan atle ompa quipia tlahtocatlacamecayotl çan tiquincahua yn ompa tlahtoque catca amo nican tiquintlacamecayotenehua mochintin çan yehuâtin nican tenehuallo yn oneliuh yntlacamecayo mochi nican pouhtoc teneuhtoc ma yc timotlapololti yn ac tehuatl in tichristiano macamo mitztlapololtiz xicmoneltoquiti çan huel ce nelli Dios

Nican Umpehua ontzinti oc centlamantli çan ye no tenonotzaliztlahtolli ymellahuaca yn intlahtocatlacatiliznelhuayo yn intlahtocatlacamecayo in Teteuhctin in tlahtoque in tlahtocapipiltin y huel nican intlacatyan inchan in Tulteca tzacualtitlan tenanco chiconcohuac Amaquemecan yn onemico oyeco otlahtocatico yhuan yn intlacamecayohuan oc cequinquin nemi yn axcan cahuipan nemi pipiltin yn oncan tetechpa hualquizticate Cenca tetech monequi ynic huel momatiz ycuiliuhtiez yehica in tepilhuan in teyxhuihuan in mohuapahua mozcaltia axcan yhuan in quin ya tlacatiquihui yn amo quimatia ytech quittazque quimatizque ytech concuizque conanazque yn iuh catqui tlahtocayeliztli tlahtocatlacamecayotl in campa hualla y huel yehuatl achtopa nican tlahtocaquauhtzonyotl mochihuaco conmatizque in quenî Peuh Tzintic yn imezço in intlapallo yn intlillo in huehuetque tzacualtitlan tenanca yn onemico nican ytlalticpactzinco in tlacatl Totecuiyo Jesuchristo

Itlatlalil itlatecpan in Don domingo de S Anton Muñon Chimalpain Quauhtlehuanitzin yxhuiuh yn omoteneuh tlacatl Señor Don Domingo Hernandez Ayopochtzin catca umpa ychan yquizcan yolcan yn ipan omoteneuh yc ontlayacatl altepetl Tzacualtitlan tenanco Amaquemecan Prouincia chalco auh maço nellihui yn amo ymacehual ylhuil ycnopil yniqu itequiuhti in quimocuitlahuia yn iteopancaltzin in iSancta Yglesiatzin in cenquizca yxtililoni mahuiztililoni in mocenquizca centlamachtiani in hueytettatzin S Antonio Abbad yn ipan in Tecpilaltepetl hueycan ciudad Mexico Tenuchtitlan yn oncan omohuapauh ytequiuhti ymamal mochuihua ynic quitta quimocuitlahuia yn omoteneuh yTeopancaltzin ySancta yglesiatzin Sancto in ye yxquichica cempohuallonchicuacen xihuitl axcan ypan in ticate xihuitl de Auh ynin huehuetlahtocanemiliztli in huehuetlahtocatenonotzalizamoxtlahtolli nican ye mihtoz ye motenehuaz in ye mopohuaz ca amo çan çaçanilli ca amo çan tlapipictli amo çan tlahtlaquetzalli ynic tlatecpantli ca mochi neltiliztli ca mochi omochiuh ca yuh oquitotehuaque ca yuh oquiteneuhtehuaque yuh otechtlalilitehua^q yn inhuehuetlahtol in huehuetque yllamatque in tlahtoque in pipiltin tzacualtitlan tenanca in tocihuan Tocolhuan in tachtonhuan in tomintonhuâ in topiptonhuan nican onemico yn iuhqui yn innenonotzal mochiuhtiuh yn otechcahuilitiaque ynin altepenenonotzaliztlahtolli yhuan tlahtocatlacamecayonenonotzaliztlahtolli in tliltica tlapaltica ycuiliuhtoc machiyotoc amapan ayc polihuiz ayc ylcahuiz mochipa pieloz auh ca yetlamantli ^y nican ye mihtoz ye motenehuaz in tlaçotlahtocatlacamecayotl in ipan oncatqui yn omoteneuh ynic ontlacayacatl altepetl tzacualtitlan Tenanco chiconcohuac yn ipehuayan yn itzinecan auh oc cenca yehuatl achtopa nican mihtoz motenehuaz oc cenca yehuatl  achtopa nican neztica oncan in mottaz mopohuaz yn ipan in yc centetl huehuetlahtocanemilizamoxtenonotzaliztli yn itlahtocatlacamecayotzin yn omoteneuh yehuatzin tlacatl Señor Don domingo hernandez Ayopochtzin motenehua huel oc yehuatl in chichimecatlahtocapilli catca in tzacualtitlan Tenanco chiconcohuac Amaquemecan chalco chane catca yn oquimohuiquilli tt Dios yn ipan yc mani metztli Abril yn ipan xihuitl de años ynic oncan yxquichica ^y caxtolpohualxihuitl ypan Epohuallonchiuhcnahui xihuitl in çan niman amo cana ocoton opoliuh yn itlahtocatlacamecayotzin yn ompa yxquichica ytech hualeuhtica hualpeuhtitica in tlacatl Totoltecatl Tzompachtli tlayllotlac teuhctli y huel achtopa ycentlahtocauh catca yn ixquichtin Tenanca in quinhualyacan in quinhualhuicac yn ompa ye no yc huallehuaque yn oncan miec xihuitl mochantica yn oncan motenehua Teotenanco cuixcoc Temimilolco yhuipan çacanco quin oncan in quihualcuitiquizque in Teocchichimeca ynic otocayotiloque cuixcocca Temimilolca yhuipaneca çacanca auh yn ompa chicomoztoc yc huallehuaque ca çan oqu ixquich yn ompa yntoca hualmochiuhtia heztlapictin chicomoztoca auh yn omoteneuh tlahtohuani Totoltecatl Tzompachtli tlaylotlac teuhctli in tlahtocatachcauh hualmochiuhtia ca huel oc yehuatl ompa ^ytech hualquiztica hualleuhtica yn intlacamecayopan yn imezçopan yn intlapallopan ynic motenehua intzicuehuillo intlapanca yntech hualquiça in yehuantin omentin tlahtoque chichimeca omoteneuh Totoltecatl tzompachtli tlaylotlac teuhctli ynehuan huehue ytzcuauhtzin atlauhtecatl teuhctli in ye yxquichica ompa omoteneuh ynic huallaque ynic acico nican tzacualtitlan Tenanco y huel ye nican ahcico tepiltzin tlahtohuani quahuitzatzin tlaylotlac teuhctli ca chicontlamanpa ye ixhuiuhtzin yn omoteneuhtzino tlacatl señor Don domingo hernâdez hualtzintli amo pilli catca nican tlacocalecan Tepepan tzacualtitlan Tenanco chane catca O yhui yn in quimotenehuilitia omoteneuhtzino tlacatl Señor don domingo hernandez Ayopochtzin catca auh yn i nantzin catca huehueyotzintli amo yhuan quimotenehuilitiuh yn tle y// Auh ynic omentin omoteneuh huehuetque in quineltilitihui ^y omoteneuh ytlacatiliz huehueyotzintli in camo ypiltzin omoteneuh tlacatl cacamatzin yehuatzin in tlacatl Señor Don Feliciano de la Sumpcion calmaçacatzin catca yn oquimohuiquili tt Dios Ypan xihuitl de años Yz catqui yn itlahtoltzin mochiuhtiuh yuhqui ^y yn oquimihtalhuitia in yehuatzin tlacatl huehueyotzintli tlahtohuani mochiuh in nican tzacualtitlan tenanco tlaylotlacan yn inantzin catca ytoca Yztac xuchitzin ompa tlacat in tlacpan Tepepâ yn itocayocan tentzonpolecan ynahuac ^y in S Martin ymichpoch catca ^y in ceme calpolleque tlaxillacaleque motenehua panhuaque auh in yehuatl omoteneuh ymichpoch yn itoca Ytztac Xuchitzin yn ihcuac ye otztli quimacato quitlauhtito in panhuaque yn omoteneuh tlacatl cacamatzin oqu itelpochtian quiceli ycihuauh mochiuh auh amo huel momati in tle yca ^y tle ypampa yn quimacato yn quitlauhtito pahuaque tle yc quinec in cacamatzin yn omoteneuh cihuatzintli in çan macehualpan motlacatilli amo nel ahço qualli mahuiztic cihuatl catca ahço yehuatl yc quinec yc conan yn cacamatzin ynic quimocihuauhti tle noço quittili yhuan huel quimatqui in cihuatl ye quimaca ca ye otztitihuitz piltontli ye yhtic huitz ahnoço yetihuitz ynic çan quihto cacamatzin  yn on piltontli yhtic yetihuitz ma nohuehueyo auh yn o yuh macoc cihuatzintli yc niman quixima ytlan motecan in cacamatzin ynic mihtohua ca ça tlatlapihuilli xinachtica in tlacatl cacamatzin ynic huel quimopiltzintli yn ihcuac tlacatico piltzintli ynic quitocayoti huehueyotl yyacapantzin mochiuh quizcalti quihuapauh hueyyaco auh yn ihcuac tlayllotlacan Amaquemecan canaco yn omoteneuh tlacatl cacamatzin ynic onpa tlahtocatito toehua teuhctli mochihuato ypampa yn inatzin auh yehuatl ytlaytlaniztica mochiuh Mexico yxpan in omoteneuh tlahtohuani Ahuitzotzin ynic nican tzacualtitlan tenanco tlayllotlacan quihualtlahtocatlalli Yn ipiltzin ye omoteneuh huehueyotzintli ynic yehuatl tlaylotlac teuhctli mochiuh ca atlauhtlan yn tlahtocatiquia  yn auh çan quicuilico yn in tlahtocayotl Texihxicoliztica in tlacatl Xiuhtzin tlatquic yehuatl oncan in tlahtocatizquia huel yehuatl axcahua catca yehica ca ytlaçopiltzin in catca in tlahtocaTachcauh catca ypan tzacualtitlan tenâcayotl in tlacatl Quauhtlehuanitzin tlaylotlacteuhctli tlahtohuani catca ynipan mantia Chalcayotl auh ça yteuhctlahtocauh mochiuh yn omoteneuh Xiuhtzin tlatquic o yuhqui yn in quimihtlalhuitiuh omoteneuhtzino tlacatl Señor Don feliciano de la Sumpcion calçamatzin auh ça yxquich amo tle yhuan quimotenehuilitia aquin achtopa cotzti aquin yoquichhui catca omoteneuh cihuatl yztac xuchitzin yn icihuauh mochiuh omoteneuh tlacatl cacamatzin auh yn ixquichtin ytlaçopilhuan oquîchiuh yhuan yxhuihuan yccatotonhuan omoteneuh tlahtohuani huehueyotzintli ca onoyehuatico omahuiztico in tlahtocayotica pillotica yn ipan tzacualtitlan Tenancayotl yehica ca oncan in ce ypiltzin otlahtocatico ytoca Don Joseph de castilla hecaxoxouhqui auh quillmach ynin ychtacaconetl catca amo huel ypiltzin catca in tlahtohuani huehueyotzintli catca auh ca çan no yuh yehuatzin quimihtalhuitiuh yn omoteneuhtzino tlacatl Señor Don Feliciano de la Sumpcion calçacatzin catca yuhqui yn yn oquimihtalhuitia in yehuatzin tlacatl cihuapilli catca Doña Magdalena de S Pedro xiuhcacaltzin yn inantzin catca tlacatl Don Juan Maldonado Mihiçahuitzin tlahtohuani catca ytztlacoçauhcan y huel oqu ichpotzin catca omoteneuh tlahtohuani huehueyotzintli huel yehuatzin ycamapatzinco niccan nechmolhuilitia nehuatl Don Feliciano de la Sumpcion in cihuapillim in yehuatl niuhc Don Joseph de castilla hecaxoxouhqui amo huel ypiltzin catca in tlacatl tlahtohuani huehueyotzintli yn tottatzin catca yehica y huel tipilhuan tizquintin y huel tiezçohuan Tiuhque yn Timahuiztique Tichipahuaque yn itech tiquiça huehueyotzintli auh yn Don Joseph amo quiquixti amo no techquixti yehica amo chipahuac amo no qualxayaque ca nel amo ypiltzin// in tlahtohuani catca huehueyotzintli yehica yn inantzin catca Don Joseph de castilla hecaxoxouhqui yn itoca catca achtopa yn oc tlateotoquilizpan ynic quinotzaya chimalmantzin auh yn ça tepan ic moquaatequi ytoca mochiuh Doña catalina ychpotzin in catca yn itzcahuatzin tlatquic tahtohuani catca yn itzcahuacan tlalmanalco chalco yn omoteneuh cihuapilli Doña catalina chimalmantzin quitlaxin ychtaca in tlahtohuani huehueyotzintli amo quimomachilti in quimomecatiaya cihuapilli ychtaca callaquia tecpâ oquichtli ytoca quehquetza nican tenanca o yhui yn oncan tlami yn yn itlahtoltzin omoteneuhtzino tlacatl Don Feliciano de la Sumpciô calamçacatzin auh yn iqu iuhqui ^y quimihtalhuitia Doña Magdalena de S Pedro xiuhcacaltzin ca quimotiliaya ypampa ce ynantzin catca ^y auh macihui yn iuh omihto yn yn amo huel ypiltzin catca//hueyotzintli yece ynic cenmochintin Tenanca yhuan Amaquemeque quicenpiltzintique in huehueyotzintli ynic huel tlahtocat Don Josep de castilla hecaxoxouhqui nican Tzacualtitlan Tenanco // O yehuatl in oncan tlami yn yn itlahtollo in quenin nican tzacualtitlan Tenanco yetlamantli oncatqui in tlahtocatlacamecayotl in huel cececcan quiztica auh  yn achtopa omoteneuh tlaçotlahtocatlacamecayotl ca huel ompa quihualhuicaque in canin Teotenanco hualehuaque Teochichimeca auh yn oc ontlamantli omoteneuh çan nican tzacualtilan tenanco otzintico opehuaco in tlahtocatlacamecayotl çan ^y tlanequiliztica mochiuh yn oc cequintin tlahtoque ynic quintlahtocatlalique omoteneuhque tlacpac in ye no yancuican quitzintique tlahtocatlacamecayotl yece tel amo oquichtiliztica in quicuique in tlahtocayotl mahuizçotl amo quinnehnehuilizque yn iuh yehuantin achtopa otlahtocatico in motenehuaya tlaçochichimecatepilhuan ynin  hueytiacauhchicahualiztica yn iuh yehuantin yxquichtlamantli oquichihuaco ynin chichimecanemiliztica ynin yaooquichtiliztequiuhtica ynic onemico amo quinencuique in tlahtocayotl in mahuizyotl yn ipan in tzacualtitlan Tenancayotl